Wednesday, June 13, 2007

പൂച്ചക്ക്‌ പിഴക്കുമ്പോള്‍

ചെറുതും വലിതുമായ എലികളെ പിടിച്ച്‌ മുന്നേറിയ VS ന്റെ പൂച്ചകളെ ഇന്നലെ അദ്ദേഹം തന്നേ താക്കീത്‌ ചെയ്തതോടെ കൊട്ടിഘോഷിക്കപ്പെട്ട മൂന്നാര്‍ ഒഴിപ്പിക്കല്‍ പുതിയ വഴിത്തിരിവിലേക്ക്‌. ഈ അവസരത്തില്‍ ഈ സംഭവങ്ങളെ ഒന്ന് പിന്നോട്ട്‌ ഓടിച്ച്‌ നോക്കുകയാണിവിടെ. സിണ്ടിക്കേറ്റ്‌ പത്രങ്ങള്‍ (കടപ്പാട്‌ അഡ്വ:ജയശങ്കര്‍) എന്ന് വിളിക്കപ്പെടുന്ന മാധ്യമം, മാതൃഭൂമി, തുടങ്ങിയ പത്രങ്ങളിലെ ലിങ്കുകള്‍ പരാമവധി നല്‍കിയും ചില വാര്‍ത്തകള്‍ ബദല്‍ സിണ്ടിക്കേറ്റ്‌ © പത്രമായ ദീപികയിലെയും കൊടുത്തുകൊണ്ടാണ്‌ ഇതെഴുതുന്നത്‌.

CPI യുടെ ഓഫീസ്‌ പൊളിച്ച ശേഷം ഏതാണ്ട്‌ 2 ആഴ്ചകള്‍ക്ക്‌ ശേഷം സ: പന്ന്യനും ഇസ്മായേലും മൂന്നാറില്‍ വച്ച്‌ നടത്തിയ പത്രസമ്മേളനത്തില്‍ കോട്ടിട്ട ആളും അതിന്‌ മുകളിലുള്ള ആളും പൊളിക്കലിന്‌ സമാധാനം പറയേണ്ടി വരും എന്ന് പ്രസ്താവിച്ചതോടെയാണ്‌ പ്രശ്നങ്ങള്‍ തുടങ്ങിയത്‌


എന്നാല്‍ പിറ്റേന്ന് VS മറ്റൊരു പൊതുയോഗത്തില്‍ CPI ക്ക്‌ ഒളിയമ്പുകളുപയോഗിച്ച്‌ മറുപടി പറയുകയും ദൌത്യസംഘത്തെ പരമാവധി ന്യായീകരിക്കുകയും ചെയ്തു. തുടര്‍ന്ന് CPI പല യോഗങ്ങള്‍ കൂടുകയും LDF ലും മുഖ്യമന്ത്രിക്കും പരാതി നല്‍കുകയും ചെയ്തു.എന്നാല്‍ വെളിയത്തിന്റെ വിമര്‍ശനം ഏശിയില്ല എന്നാണ്‌ പിറ്റേന്ന് മാധ്യമങ്ങളില്‍ വന്ന വാര്‍ത്ത
അങ്ങനെ CPI യുടെ പരാതി പരിശോധിക്കാന്‍ ഉപസമിതിയേയും തീരുമാനിച്ചു. അതോടെ കേരളത്തിലെ മാധ്യമങ്ങള്‍ ഉണരുകയും ടറ്റയുടെ ഭൂമിയിലേക്ക്‌ ദൌത്യ സംഘം തൊട്ടതാണ്‌ CPI യെ പ്രകോപിച്ചതെന്നും പിണറായി വിജയന്റെ പിന്തുണയോടെയാണ്‌ CPI ഇപ്പോള്‍ രംഗത്ത്‌ വന്നതെന്നും വിവിധ മാധ്യമങ്ങള്‍ എഴുതി.
അതിന്‌ വേറോരു സാമ്പിള്‍ ഇവിടെ വായിക്കുക. അതിനിടെ രവീന്ദ്രന്‍ പട്ടയം നിലനില്‍ക്കില്ലാ എന്ന് സുരേഷ്‌ കുമാര്‍ പറയുകയും ചെയ്തത്‌ CPI ക്ക്‌ ഇരുട്ടടിയായി കാരണം ഈ പട്ടയം നല്‍കിയത്‌ LDF ന്റെ കാലത്തായിരുന്നു.

അക്ഷരാര്‍ത്ഥത്തില്‍ പ്രതിസന്ധിയിലായ CPI നേതാക്കള്‍ ചാനലിലൂടയും പത്രങ്ങളിലൂടെയും തങ്ങളുടെ ഭാഗം ന്യായീകരിച്ചുകൊണ്ടെയിരുന്നു. വനം മന്ത്രി ബിനോയി വിശ്വം TATA തന്നെ കൈയേറി എന്ന് സമ്മതിച്ച്‌ 3000 ഏക്കര്‍ തിരിച്ച്‌ പിടിക്കാന്‍ നോട്ടീസ്‌ നല്‍ക്കാന്‍ പോകുകയാണെന്ന് പത്രസമ്മേളനം നടത്തി മാത്രവുമല്ല TATA യെ തൊട്ടാല്‍ CPI ക്ക്‌ കൈപൊള്ളില്ല എന്ന് പറയുകയും ചെയ്തു. എന്നാല്‍ ഗതികെട്ട നേരത്ത്‌ ചെയ്യുന്നതെല്ലാം കുരിശാകും എന്ന പോലെ 50000 ഏക്കര്‍ കൈയേറി എന്ന നിയമസഭ ഉപസമിതിയുടെ റിപ്പോട്ടിനെ തുടര്‍ന്ന് നടത്തുന്ന ഉപഗ്രഹ സര്‍വേേയുടെ ഫലം വരാനിരിക്കെ ടാറ്റയേ സഹായിക്കാനാണ്‌ ഇതെന്ന് സാറാ ജോസഫടക്കം ആരോപിക്കുന്നതിലെത്തി. അതിനിടെ സാംസ്കാരിക പ്രവര്‍ത്തകര്‍ മൂന്നാറിലെത്തി ദൌത്യസംഘത്തിനും മുഖ്യമന്ത്രിക്കും വേണ്ടി പ്രചരണം നടത്തുകയും CPI യെ കുത്തി നോവിക്കുകയും ചെയ്തു. എന്നാല്‍ ഇത്‌ ഒരു സ്പോണ്‍സേഡ്‌ പരിപാടിയായിരുന്നു എന്ന് ദീപിക പറഞ്ഞു (ലിങ്ക്‌ ലഭ്യമല്ല.). എന്നാല്‍ LDF ഉപസമിതിയുടെ പരിശോധന നടക്കുന്നതിന്‌ മുന്‍പ്‌ സുരേഷ്‌ കുമാര്‍ വെടിപൊട്ടിച്ചു നോക്കുകുത്തിയായി തുടരില്ലാ എന്നായിരുന്നു സുരേഷ്‌ കുമാര്‍ പറഞ്ഞത്‌. അതിനിടെ മന്ത്രിസഭ ഉപസമിതിക്ക്‌ സുരേഷ്‌ കുമാര്‍ നല്‍കിയ റിപ്പോട്ട്‌ മാധ്യമങ്ങള്‍ പ്രസിദ്ധീകരിച്ചതോടെ പ്രശ്നം വഷളായി. ഇന്നലത്തെ ക്രോസ്‌ വിസ്താരത്തില്‍ CPI ക്കാര്‍ സുരേഷ്‌ കുമാറിനെതിരെ ആഞ്ഞടിക്കാന്‍ ഇതും വഴി വച്ചു. പ്രശ്നം കൈവിട്ടു എന്ന് തോന്നിയതോടെ മുഖ്യമന്ത്രിയും നിലപാട്‌ മാറ്റി CPI നിലപാട്‌ സാധൂകരിച്ചു. രവീന്ദ്രന്‍ പട്ടയങ്ങളെല്ലാം വ്യാജമല്ലെന്നും ദൌത്യസംഘത്തെ താക്കീത്‌ ചെയ്തെന്നും പറഞ്ഞൊഴിഞ്ഞു.

ഇത്രയും കാര്യങ്ങള്‍ ഓടിച്ച്‌ നോക്കുമ്പോള്‍ എന്താണ്‌ നമ്മള്‍ മനസിലാക്കേണ്ടത്‌. ദൌത്യസംഘം കുറ്റക്കാരാണോ. അതോ ദൌത്യസംഘം തെറ്റിദ്ധരിക്കപ്പെട്ടോ? എന്താണ്‌ കത്തി ജ്വലിച്ച്‌ നിന്ന VS നെ പിന്നോട്ടടിപ്പിച്ചത്‌. ADB വിഷയത്തില്‍ ഉദ്യോഗസ്ഥരെപ്പഴി പറഞ്ഞ്‌ VS ഒഴിഞ്ഞത്‌ പോലെ ദൌത്യസംഘത്തെ താക്കീത്‌ ചെയ്ത്‌ രക്ഷപ്പെടുകയാണോ? അതോ CPI വല്ല ബോംബും പൊട്ടിച്ചോ ? ഇന്നലെ വരെ VS പറഞ്ഞതല്ല ഇന്ന് പറയുന്നത്‌. രവീന്ദ്രന്‍ പട്ടയം വ്യാജമെന്ന നിലാപാടാണ്‌ സുരേഷ്‌ കുമാറിനുണ്ടായിരുന്നത്‌. അത്‌ പ്രകാരം അദ്ദേഹം പൊളിച്ച വല്ല റിസോര്‍ട്ടുകാരും കേസുമായിപ്പോയാല്‍ സര്‍ക്കാരിന്റെ ഈ നിലപാട്‌ കുരിശാകുമോ ? . എന്താണ്‌ ഇതിന്റെ മൂല കാരണം സുരേഷ്‌ കുമാര്‍ മാധ്യമ പ്രശസ്തിയില്‍ മതിമറന്ന് ചെയ്തകാര്യങ്ങള്‍ അദ്ദേഹത്തിന്‌ വിനയായോ. അതോ അദ്ദേഹത്തെ VS സ്വന്തം നേട്ടത്തിന്‌ ദുരുപയോഗം ചെയ്തതായിരുന്നോ. എന്തായാലും മാധ്യമം പത്രം പറയുന്നത്‌ CPI സമ്മര്‍ദ്ദത്തിന്‌ ഉപസമിതി വഴങ്ങി എന്നാണ്‌ എന്നാല്‍ മാതൃഭൂമി പറയുന്നത്‌ തന്ത്രപരമായ നീക്കത്തിലൂടെ താന്‍ നടത്തിയ പോരാട്ടങ്ങള്‍ക്ക്‌ പിന്തുണ നല്‍കിയ CPI യേ അനുരഞ്ജനത്തിന്റെ പാതയിലേക്ക്‌ കൊണ്ടുവരികയാണ്‌ VS എന്ന് കണ്ടെത്തുന്നു. എന്നാല്‍ ബദല്‍ സിന്റിക്കേറ്റ്‌ © പത്രം പറയുന്നു മുഖ്യമന്ത്രി മുട്ടുമടക്കി.

മൂന്നാര്‍ ചരിത്രം വാര്‍ത്ത ശേഖരം വായിക്കുക.

21 comments:

കിരണ്‍ തോമസ് said...

ചെറുതും വലിതുമായ എലികളെ പിടിച്ച്‌ മുന്നേറിയ VS ന്റെ പൂച്ചകളെ ഇന്നലെ അദ്ദേഹം തന്നേ താക്കീത്‌ ചെയ്തതോടെ കൊട്ടിഘോഷിക്കപ്പെട്ട മൂന്നാര്‍ ഒഴിപ്പിക്കല്‍ പുതിയ വഴിത്തിരിവിലേക്ക്‌. ഈ അവസരത്തില്‍ ഈ സംഭവങ്ങളെ ഒന്ന് പിന്നോട്ട്‌ ഓടിച്ച്‌ നോക്കുകയാണിവിടെ.

മിടുക്കന്‍ said...

അയ്യട വെലമേ...
പറ്റിച്ചു കളഞ്ഞല്ലൊ...!
ഇനി പൊളിക്കല്‍ കാഴ്ച കണ്ട് കോരിത്തരിക്കാന്‍ വകുപ്പുണ്ടാകില്ലേ..?

കിരണ്‍ തോമസ് said...

തനിമലയാളം എന്നെ ബഹിഷ്കരിച്കോ ?. എന്റെ പോസ്റ്റ്‌ അവിടെ മാത്രം അപ്ഡേറ്റ്‌ ചെയ്യുന്നില്ല. ചിന്തയിലും മലയാളം ബ്ലോഗ്സിലും വന്നു. എന്തെങ്കിലും പ്രശ്നമുണ്ടോ ?

njjoju said...

കിരണ്‍,

കഴിഞ്ഞ ഞായറാഴ്ച സൂര്യ ടി.വി യിലെ “വര്‍ത്തമാനം” എന്ന പരിപാടിയില്‍ ജോണ്‍ എന്ന പരിസ്ഥിതി പ്രവര്‍ത്തകനുമായി അനില്‍ നമ്പ്യാര്‍ നടത്തിയ അഭിമുഖം കണ്ടു കാണും എന്നു കരുതുന്നു.
ഇല്ലെങ്കില്‍ റീ ടെലികാസ്റ്റ് കാണാന്‍ ശ്രമിയ്ക്കുമല്ലോ.മതികെട്ടാനിലെ ഭൂമി കയ്യേറ്റവും മൂന്നാറിലെ കയ്യേറ്റങ്ങളും പൊതുജനശ്രദ്ധയില്‍ കൊണ്ടുവരുവാന്‍ പ്രയത്നിച്ച വ്യക്തിയാണ്. സി.പി.ഐ യുടെ കയ്യേറ്റത്തെക്കുറിച്ച് അദ്ദേഹം പരാമര്‍ശിയ്ക്കുന്നുണ്ട്. (വിശ്വസനീയയോഗ്യം എന്ന് എനിയ്ക്കു തോന്നി.)

രവീന്ദ്രന്‍ പട്ടയങ്ങളെല്ലാം വ്യാജമല്ലെന്നു പറയുന്നതിന്റെ അര്‍ത്ഥമെന്താണ്? ചിലതു ശരിയും ചിലതു തെറ്റുമാണെന്നല്ലെ. അതില്‍ അപാകതയില്ലേ?
പട്ടയം വിതരണം ജില്ലാകളക്ടറുടെ അധികാരത്തില്‍ വരുന്ന ഒന്നായയിലയ്ക്ക് ഒരു സ്പെഷ്യല്‍ ഓര്‍ഡര്‍ വഴി ഡപ്യൂട്ടി തഹസീല്‍ദാറെ കൊണ്ട് ചെയ്യിക്കാനുണ്ടായ സാഹചര്യമെന്തണ്?

രവീന്ദ്രന്‍ പട്ടയം വ്യാജമാണോ എന്നു പരിശോധിക്കേണ്ട്ത് കോടതിയാണ്. പക്ഷേ കയ്യേറ്റം ഒഴിപ്പിക്കുന്നതില്‍ നിന്നും ആരാധനാലയങ്ങളെയും രാഷ്ടീയപാര്‍ട്ടീ‍ ഓഫീസുകളെയൂം ഒഴിവാക്കണം എന്ന നിര്‍ദ്ദേശം ആരെയൊക്കെ രക്ഷിക്കാനാണ്.

ഏഴു സെന്റിന് അപേക്ഷനല്‍കിയാല്‍ സെന്റ് പന്ത്രണ്ടു സെന്റ് അനുവദിക്കാനാവുമോ?

അന്ന് റവന്യൂ മന്ത്രി ആരാണെന്നു പറയേണ്ടല്ലോ. അദ്ദേഹം തന്നെ ഉപസമതിയില്‍(?) ഉള്ളപ്പോള്‍ (ഉപസമതിയില്‍ ഇല്ലെങ്കില്‍ ഉപസമിതിയ്ക്ക് ഒപ്പമുണ്ടായിരുന്നു.) ഇങ്ങനെയൊക്കെയേ സംഭവിയ്ക്കൂ.

Radheyan said...

ചേരികള്‍ ഇടിച്ച് നിരത്തുന്ന,അനേകം തൊഴിലാളികളുടെ തൊഴില്‍ അവസരങ്ങള്‍ നശിപ്പിക്കുന്ന ഒരു ജുറാസിക്ക് യന്ത്രമയിരുന്നു ജെ.സി.ബി കഴിഞ്ഞ കുറച്ച് നാള്‍ മുന്‍പ് വരെ.അതിന് ജനകീയ മുഖം നല്‍കിയത് നമ്മുടെ ജനകീയനായ മുഖ്യമന്ത്രിയും അദ്ദേഹത്തിന്റെ നിറം നിര്‍ണ്ണയിക്കപ്പെടാത്ത 3 പൂച്ചകളും ആയിരുന്നു.ആദ്യമാദ്യം തോന്നിയ രസം പൊളിക്കല്‍ മുന്നോട്ട് പോകും തോറും ഒരു ഭീതിയായ് വളര്‍ന്നു.ചെറുകിടക്കാരെയും പാവങ്ങളെയും ഒഴിവാക്കും എന്ന് മുഖ്യമന്ത്രിയും മന്ത്രിമാരും പലവുരു പറഞ്ഞുവെങ്കിലും ആരെങ്കിലും അത്തരത്തിലുള്ളവര്‍ ഇതില്‍ പെട്ട് പോയാല്‍ എന്തായിരിക്കും അവസ്ഥ.

ഇരമ്പുന്ന ജനകീയഘോഷം,ശക്തമായ മാധ്യമ പിന്തുണ,ലൈവ് വീഡിയോ കവറേജ്;സെക്രട്ടറിയേറ്റിന്റെ ഇരുണ്ട ഗുഹകളില്‍ മന്ത്രിമാര്‍ക്ക് ചരമോപചാരം എഴുതി കൊടുത്തും പൊതുജനത്തോട് നിഴല്‍ യുദ്ധം നടത്തിയും നിര്‍വൃതി കൊള്ളുന്ന ബ്യൂറോക്രാറ്റ് സിംഹത്തിന് മെഗലോമാനിയ (കട:രണ്‍ജി പണിക്കര്‍)പിടിപെടാന്‍ ഇതില്‍ പരം എന്ത് വേണം.പോരാഞ്ഞ് പൈങ്കിളീ പെണ്മാസികകളില്‍ വീരനായക പദവി.I am the state, atleast in Munnar; എന്ന് മാന്യദേഹത്തിന് സന്ദേഹം തോന്നിയില്ലെങ്കിലേ അല്‍ഭുതം.

മുഖ്യമന്ത്രിക്ക് പരമസന്തോഷം.ഭരണത്തിലെ പോരായ്മകള്‍ ജനം മറന്നു.ഏഡിബി ട്രപ്പീസിലെ മലക്കം മറിച്ചിലും നടുവടിച്ചുള്ള വീഴ്ച്ചയും വീണത് വിദ്യയാക്കിയുള്ള നടപ്പും ജനം മറന്നു.പാര്‍ട്ടി പിണറായി കൊണ്ടു പോയപ്പോള്‍ സമസ്തവും നഷ്ടപ്പെട്ട അവസ്ഥയല്ല ഇന്ന്.പുതിയ ഒരു പോര്‍മുഖം തുറക്കാന്‍ സാധിച്ചിരിക്കുന്നു.മകന് ചെയ്ത് കൊടുത്ത ചെറിയ സഹായമുണ്ടാക്കിയ വിവാദത്തില്‍ നിന്ന് പരിക്കില്ലാതെ മുന്നോട്ട് വരാന്‍ സാധിച്ചിരിക്കുന്നു.

ഇതിലുമപ്പുറം ഇടതുമുന്നണിയില്‍ താനല്ലാതെ അഴിമതിക്കാരനല്ലാത്തവരായി ആരുമില്ലെന്ന് വരുത്താന്‍ സാധിച്ചിരിക്കുന്നു.കഷ്ടകാലസമയത്ത് കൂടെ നിന്നവരാണ് വെളിയവും ചന്ദ്രചൂഡനും.ഇതില്‍ വെളിയത്തിനെങ്കിലും ഒരു പണി കൊടുത്ത് ഉപകാര സ്മരണ കാട്ടേണ്ടേ.ആര്‍.എസ്.പിക്ക് ആകെ ഉള്ള ഒരു രക്ത്സാക്ഷി മണ്ഡപമാണ് ചന്ദനത്തോപ്പിലേത്.അത് പൊളിച്ച് ചന്ദ്രചൂഡനും ഒരു പണി കൊടുക്കണമെന്നാഞ്ഞതാണ്.നടന്നില്ല.എങ്കിലും സാരമില്ല സി.പി.ഐ യെ ഒതുക്കാന്‍ നമ്പൂതിരിപ്പാട് പാടെത്ര പെട്ടതാണ്.ഇന്ന് സി.പി.ഐയെ മൊത്തം വനം കൊള്ളക്കാരും കൈയ്യേറ്റക്കാരും റ്റാറ്റയുടെ സില്‍ബന്ധികളുമാക്കാന്‍ സാധിച്ചു.റ്റാറ്റയുടെ സാമ്രാജ്യത്തില്‍ പകുതി 1971 പിടിച്ചെടുത്ത് സര്‍ക്കാര്‍ ഭൂമിയാക്കിയത് അചുതമേനോനും സിപിഐയും ആണ്.പഴങ്കഥയൊക്കെ ആരോര്‍ക്കാന്‍.ഇപ്പോള്‍ വി.എസ് അല്ലാതെ ആദര്‍ശവാദി ഈ ഭൂമിമലയാളത്തില്‍ മരുന്നിനു പോലും കിട്ടാനില്ലാത്ത അവസ്ഥ.ചത്തുപോയവരിലും ഇല്ല ജീവിച്ചിരിക്കുന്നവരിലും ഇല്ല.

1999ല്‍ നല്‍കിയ പട്ടയം നിയമവിരുദ്ധമാണെന്ന് സുരേഷ്കുമാര്‍.ആ പട്ടയത്തെ രവീന്ദ്രന്‍ പട്ടയമെന്നാണ് വിളിക്കുന്നത്.അന്നത്തെ കലക്ടര്‍ വി.ആര്‍.പത്മനാഭന്‍ നല്‍കിയ സ്പെഷ്യല്‍ അധികാരമുപയോഗിച്ച ദേവികുളം അഡീഷണല്‍ തഹസില്‍ദാര്‍ ആയിരുന്ന ശ്രീ രവീന്ദ്രന്‍ കൊടുത്ത പട്ടയങ്ങളാണ് പില്‍ക്കാലത്ത് രവീന്ദ്രന്‍ പട്ടയങ്ങളെന്നറിയപ്പെട്ട 1999ലെ പട്ടയങ്ങള്‍.

അഡീഷണല്‍ തഹസില്‍ദാറിന് ചാര്‍ജ്ജ് നല്‍കിയതില്‍ അപാകതയുണ്ടോ എന്ന് നോക്കേണ്ടത് കോടതിയാണ്.പിന്നെ ആ പട്ടയം കൊടുക്കാന്‍ തീരുമാനിച്ചത് ഇടതുമുന്നണിയും അതിന്റെ സര്‍ക്കാരും.അന്നത്തെ മുന്നണി കണ്‍വീനര്‍ ഇന്നത്തെ മുഖ്യമന്ത്രി സാക്ഷാല്‍ വി.എസ്.അന്നത്തെ മുന്നണിയുടെ ഒരു രാഷ്ട്രീയ തീരുമാനത്തിന്റെ ഗുണദോഷങ്ങള്‍ പരിശോധിക്കാനുള്ള പ്രത്യേകാധികാരവും വി.എസ്.തുല്യം ചാര്‍ത്തി നല്‍കിയിട്ടുണ്ടോ ഈ പൂച്ചക്ക്? അന്നത്തെ രാഷ്ട്രീയ തീരുമാനം തെറ്റായിരുന്നുവെങ്കില്‍ അന്ന് മന്ത്രി ആയിരുന്ന ഇസ്മയിലിനെക്കാള്‍ ഉത്തരവാദിത്തം കണ്‍വീനറായിരുന്ന അങ്ങേയ്ക്കല്ലേ?

മേല്‍പ്പറഞ്ഞ പട്ടയപ്രകാരം 25 സെന്റ് കിട്ടിയിട്ടുണ്ട് മാര്‍ക്സിസ്റ്റ് പാര്‍ട്ടിക്ക്.അവിടെ പാര്‍ട്ടി ഓഫീസും അതിനോട് ചേര്‍ന്ന് ഒരു ലോഡ്ജുമുണ്ട്.അല്ലയോ നീതിമാനായ മുഖ്യമന്ത്രി,അങ്ങയുടേ പൂച്ച പറയുന്നതെല്ലാം സത്യമാണെങ്കില്‍ ആ ജെ.സി.ബി ആകുന്ന അങ്ങയുടെ രഥം തെളിക്കേണ്ടത് ആ പാര്‍ട്ടി ഓഫീസിന്റെ നെഞ്ചത്തേക്കാണ്.ഇപ്പോള്‍ പൊളീറ്റ് ബ്യൂറോയില്‍ നിന്ന് സസ്പെന്റ് ചെയ്യപ്പെട്ടിട്ടേ ഉള്ളൂ. അത് എന്നെന്നേക്കുമായുള്ള പുറത്താക്കലായി മാറ്റിയ്യെടുക്കാം.പിന്നെ ഫുള്‍ റ്റൈം ജനകീയനായി വേലിക്കകത്ത് വീട്ടിലിരിക്കാം.
ഇത്തിരി പുളീക്കും അല്ലേ... പിന്നെ അതിനല്ലേ ഞാ‍ാ‍ാ‍ാ‍ാ‍ാ‍ാ‍ാന്‍ ഈഈഈഈഇ പാടൊക്കെ പെട്ട് ഈഈഈഈഈഈ കസേരയില്‍ കയറിയത് ...

Radheyan said...

1937ല്‍ ചെമ്പ് പട്ടയം കിട്ടിയ ഭൂമിയാണ് സി.പി.ഐയുടേത്.പിന്നീട് 1959‍ അത് 19000 രൂപ കൊടുത്ത് പാര്‍ട്ടി സെക്രട്ടറിയുടെ പേരില്‍ വാങ്ങി(അന്ന് എം.എന്‍ ആണ് സെക്രട്ടറി).ആ ആധാരത്തില്‍ ഏഴര സെന്റ് സ്വന്തം സ്ഥലവും ബാക്കി 4 സെന്റ് വിരിവുമായിരുന്നു.ആ വസ്തുത ആധാരത്തില്‍ പറയുന്നുമുണ്ട്.സ്വന്തം ഭൂമിയോട് ചേര്‍ന്നുള്ള റെവന്യൂ ഭൂമി കൈവശം വെച്ച് ആദായമെടുത്ത് അനുഭവിക്കുന്ന ഭൂമിയെയാണ് വിരിവ് എന്ന് പറയുന്നത്ത്(കൃത്യം ലീഗല്‍ വ്യഖ്യാനം നിയമവിദഗ്ദ്ധര്‍ പറയട്ടെ)
പാര്‍ട്ടി അവിടെ കെട്ടിടം കെട്ടാന്‍ ആരംഭിച്ചപ്പോള്‍ അന്നത്തെ കോണ്‍ഗ്രസ് നേതാവും ഇന്നത്തെ എന്‍.സി.പി നേതാവുമായ കുപ്പുസ്വാമി കെ.ഡി.എച്.നിയമത്തിന് വിരുദ്ധമാണ് കെട്ടിടനിര്‍മ്മാണം എന്ന് പറഞ്ഞ് സെഷന്‍സ് ജില്ല ഹൈക്കോടതി വരെ കേസിന് പോയി.കേസ് ചെലവ് സഹിതം തള്ളുകയും ഏഴര സെന്റ് സി.പി.ഐയുടെ സ്വന്തം സ്ഥലമാണെന്നും അവിടെ കെട്ടിടം കെട്ടുകയോ കുഴികക്കൂസ് കുത്തുകയോ കൊട്ടാരം പണിയുകയോ ഒക്കെ ഉടമകളുടെ ഇഷ്ടമാണെന്നും അടിവരയിട്ട് വിധിക്കുകയും ചെയ്തു.


സി.പി.ഐക്ക് ഏഴര സെന്റ് സ്വന്തം ഭൂമിയും അതിനോട് അനുബന്ധമായി 4 സെന്റോളം വിരിവും ഉണ്ടെന്ന് നേരത്തെ പറഞ്ഞുവല്ലോ.ഏഴര സെന്റ് അന്ന് സെക്രട്ടറി ആയിരുന്ന പി.കെ.വിയുടെ പേരിലേക്ക് നിയമാനുസ്രതം മാറ്റപ്പെട്ടിരുന്നു.ബാക്കി നാല് സെന്റ് വിരിവിന് പട്ടയം നേടാന്‍ പാര്‍ട്ടി തീരുമാനിച്ചു.സ്വാഭാവികമായി ഏഴര സെന്റിന്റെ ഉടമക്ക് മാത്രമേ വിരിവിന് പട്ടയം അപേക്ഷിക്കാന്‍ സാധിക്കൂ.അത് കൊണ്ട് മാത്രമാണ് അത് പി.കെ.വിയുടെ പേരില്‍ അപേക്ഷിക്കപ്പെട്ടത്.സ്വാഭാവികമായും ഏഴര സെന്റിന്റെ ഉടമസ്ഥതയെ കുറിച്ചുള്ള കോളത്തില്‍ മനോരമയില്‍ പറയുന്ന പോലെ പൂരിപ്പിച്ചിട്ടുണ്ടാവാം.ഒരു ഫോര്‍ജറി ആണ് ഉദ്ദേശമെങ്കില്‍ പളുങ്കു പോലെ പവിത്രനായ പി.കെ.വിയെ പാര്‍ട്ടി ഇതിലേക്ക് വലിച്ചിഴക്കുമെന്ന് ആരെങ്കിലും കരുതുന്നിണ്ടോ.ഒരു വെറും സാധാരണ നടപടി ക്രമത്തിനെ അസാധരണമാം വിധം പെരുപ്പിച്ച് കാട്ടിയും അസ്ഥാനത്ത് നിന്ന് ചില വിവരങ്ങള്‍ മാത്രം പ്രസദ്ധീകരിക്കുകയും ചെയ്തത് പി.കെ.വിയേയും പാര്‍ട്ടിയേയും ഒരു പോലെ കളങ്കപെടുത്താന്‍ മാത്രമാണ് മനോരമയും മറ്റ് മാധ്യമങ്ങളും ശ്രമിച്ചത്.മഹാനായ ആ വലിയ മനുഷ്യന്‍ മരിച്ചപ്പോള്‍ പൊഴിച്ചതെല്ലാം മുതലക്കണ്ണീറായിരുന്നു എന്ന് തെളിയിക്കുക്ക കൂടി ആയി മാധ്യമങ്ങള്‍.

കിരണ്‍ തോമസ് said...

ജോജു CPI യുടെ 11 സെന്റിനെപ്പറ്റി എനിക്കറിയാവുന്നത്‌ രാധേയന്‍ പറഞ്ഞു കഴിഞ്ഞു. ഇനി രാഷ്ട്രീയപ്പാര്‍ട്ടികളുടെ ഓഫീസും ആരാധനാലയങ്ങളും പൊളിക്കരുതെന്നത്‌ LDF തീരുമാനമോ ഉപസമിതി തീരുമാനമോ അല്ല എന്നാണ്‌ ഇന്നലെ ഇസ്മായീല്‍ പറഞ്ഞത്‌ . CPI യുടെ ഓഫീസ്‌ 7 സെന്റ്‌ പട്ടയ ഭൂമിയില്‍ ആണെന്നും 4 സെന്റ്‌ മാത്രമാണ്‌ രവീന്ദ്രന്‍ ഭൂമിയെന്നുമാണ്‌ CPI ക്കാര്‍ വിശദീകരിച്ചത്‌. അതിനെതിരെ തെളിവ്‌ ഹാജരക്കാന്‍ എല്ലാവരേയും അദ്ദേഹം വെല്ലുവിളിക്കുകയും ചെയ്തു. അപ്പോള്‍ രാഷ്ട്രീയപ്പാര്‍ട്ടികളുടെ ഓഫീസും ആരാധനാലയങ്ങളും പൊളിക്കരുതെന്നത്‌ എന്നത്‌ VS ന്റെ നിര്‍ദ്ദേശമാണെന്ന് വേണം മനസിലാക്കാന്‍ . ഇതേപ്പറ്റി ഇന്ന് മനോരമയില്‍ M.V. ദേവനാണെന്ന് തോന്നുന്നു പറഞ്ഞതിങ്ങനെയാണ്‌. പാര്‍ട്ടിക്കാരും ദേവന്മാരണെന്ന സന്ദേശമാണ്‌ ഇത്‌ നല്‍കുന്നതെന്നാണ്‌. ഏറ്റവും രസകരമായ വസ്തുത CPM ഓഫിസ്‌ കം ലോഡ്ജാണ്‌ ശരിക്കും രവീന്ദ്രന്‍ പട്ടയത്തില്‍ ഉള്ളതെന്നാണ്‌ ഞാന്‍ മനസിലാക്കുന്നത്‌. CPI ഓഫീസില്‍ തൊട്ട സ്പെഷ്യല്‍ ഓഫീസര്‍ CPM ഓഫിസില്‍ തൊട്ടാല്‍ ഇപ്പോഴെ താഴ്‌ന്നിരിക്കുന്ന പാര്‍ട്ടിക്കാരുടെ പിന്തുണ കുത്തനേ ഇടിയും എന്ന ഭീതിയുമാകാം VS നെ ഇങ്ങനെ പറയാന്‍ പ്രേരിപ്പിച്ചത്‌. പിന്നെ ഒന്നു കൂടി കേട്ടു. ഈ നിര്‍ദ്ദേശം പണ്ടെ നല്‍കിയിട്ടുണ്ടത്രേ. സുരേഷ്‌ കുമാറിന്റെയോ VS ന്റെയോ കണക്കുകൂട്ടല്‍ എവിടെയോ പിഴച്ചൂ. അത്രമാത്രം . പക്ഷേ VS 4 കാലില്‍ തന്നേ വീണൂ എന്നത്‌ ശ്രദ്ദേയം

Radheyan said...

ആരാധനാലയങ്ങളും പാര്‍ട്ടി ഓഫീസുകളും
-----------------------------------

ആരാധനാലയങ്ങളും പാര്‍ട്ടി ഓഫീസുകളും പൊളിക്കേണ്ട എന്ന ഉത്തരവിന് പിന്നില്‍ സി.പി.ഐ ആണത്രേ.ശരിക്കും ഇങ്ങനെ ഒരു ഉത്തരവിന്റെ ആവശ്യം സി.പി.ഐക്ക് ഇല്ല.കാരണം സ്വന്തം ഭൂമിയിലാണ് പാര്‍ട്ടി ഓഫീസ് നില്‍ക്കുന്നത് എന്ന് ഹൈക്കോടതി വിധി ഉള്ള കാലത്തോളം സുരേഷ് കുമാറിന് അത് തൊടാനാവില്ല.സി.പിഐക്ക് പട്ടയം കിട്ടിയ നാല് സെന്റിലല്ല പാര്‍ട്ടി ഓഫീസ്.അത് അവിടെ വെറുതേ കിടപ്പുണ്ട്.എന്നാല്‍ സി.പി.എമ്മിന്റെ പാര്‍ട്ടി ഓഫീസ് പൂര്‍ണ്ണമായും പട്ടയഭൂമിയിലാണ്.സി.പി.ഐയുടെ പാര്‍ട്ടി ഓഫീസിന്റെ പോര്‍ട്ടിക്കോ പൊളിക്കാന്‍ കാരണം അത് ദേശീയ പാതയോട് നിശ്ചിത ദൂരം പാലിച്ചില്ല എന്നതിനാലാണ്.സി.പി.ഐയുടെ ഓഫീസ് തൊടുമ്പോള്‍ പ്രതിഷേധമുണ്ടാവും എന്നും അതിന്റെ മറവില്‍ സി.പി.എം ഓഫീസ് രക്ഷിച്ചെടുക്കാം എന്നും സുരേഷ്കുമാറും മുഖ്യമന്ത്രിയും കരുതി എന്നതാണ് വാസ്തവം.അതിനാലാണ് ഇപ്പോള്‍ ആരാധനാലയങ്ങളെയും പാര്‍ട്ടി ഓഫീസിനെയും തൊടണ്ട എന്ന് മുഖ്യന്‍ പറയുന്നത്.ഇനി തൊടാന്‍ പറഞ്ഞാലും അത് സി.പി.ഐയെ ബാധിക്കില്ല.കാരണം ആ ഓഫീസ് സ്വന്തം ഭൂമിയിലാണെന്നത് തന്നെ കാരണം

കിരണ്‍ തോമസ് said...

രാധേയ അപ്പോള്‍ VS നാടകം കളിക്കുകയാണോ ? ADB വിഷയത്തില്‍ ഉദ്യോഗസ്ഥരെ ബലിയാടാക്കി രക്ഷപ്പെടാന്‍ ശ്രമിച്ചതു പോലെ ( പക്ഷെ പാലോളി സമ്മതിച്ചില്ല) സുരേഷ്‌ കുമാറിനെ Vs ബലി കൊടുക്കുകയാണോ ? VS നെ അനുകൂലിക്കുന്നവര്‍ സാറാ ജോസഫടക്കം ഇന്നലെ കളം മാറി ചവിട്ടിത്തുടങ്ങി. ADB വിഷയത്തില്‍ രക്ത സാക്ഷി പരിവേഷം സാറ ടീച്ചര്‍ VS ന്‌ ചാര്‍ത്തിക്കൊടുക്കാന്‍ ശ്രമിച്ചിരുന്നു. പക്ഷെ ഇതില്‍ അവര്‍ക്ക്‌ അതാകില്ലല്ലോ. മാത്രവുമല്ല അവര്‍ പിന്തുണ പ്രഖ്യാപിച്ച്‌ ജാഥ നടത്തി മണിക്കൂറുകള്‍ക്കകം VS കളം മാറിച്ചവിട്ടിയത്‌ ഞെട്ടലോടെയല്ലെ സ്വീകരിക്കാന്‍ പറ്റൂ. എന്തായാലും thatsmalayalam.com ഇല്‍ ഒരു ഒളിയമ്പുണ്ട്‌. ഇവിടെ വായിക്കുക

njjoju said...

രാധേയനെയും കിരണിനെയും ഒരുമിച്ചു കിട്ടിയസ്ഥിതിയ്ക്ക് ഞാന്‍ ഒന്നുകൂടെ ആവര്‍ത്തിക്കട്ടെ.
കഴിഞ്ഞ ഞായറാഴ്ച സൂര്യ ടി.വി സം‌പ്രേഷണം ചെയ്ത് “വര്‍ത്തമാന”ത്തിന്റെ റീടെലികാസ്റ്റ് കാണാന്‍ മറക്കരുത്.

കിരണ്‍ തോമസ് said...

ജോജു എന്നാണ്‌ റീ ടെലികാസ്റ്റ്‌ എന്നറിയാമോ സ്മയവും വേണം

Radheyan said...

എന്ന് ഞാന്‍ പറയില്ല കിരണ്‍,പക്ഷെ അങ്ങനെ അനുമാനിച്ചേ മതിയാവൂ.ഒഴിപ്പിക്കല്‍ ഇടതുമുന്നണിയുടെ പരിപാടി ആയിരുന്നു.പക്ഷെ അത് ഹൈജാക്ക് ചെയ്ത് ഇമേജ് ബൂസ്റ്റിംഗിന് ശ്രമിച്ചത് കൊണ്ടാണ് വി.എസ്സിന് ഈ പഴി കേള്‍ക്കേണ്ടി വന്നത്.കോണ്‍ഗ്രസ്സില്‍ ആന്റണി ഇറക്കിയ കാര്‍ഡാണ് താന്‍ മാത്രം പുണ്യാളന്‍,ബാക്കി എല്ലാവരും സംശയനിഴലില്‍.സുധീരന്‍ ഈ വഴി പിന്തുടര്‍ന്നു.ഇതേ കാര്‍ഡാണ് വി.എസ്.ഇറക്കി നോക്കിയത്.കുറേ ഏറെ നാള്‍ അദ്ദേഹം കളിയില്‍ നിര്‍ണ്ണായകമായ അഡ്‌‌വാന്റേജ് നേടി.പക്ഷെ ഇത് അതിന്റെ most natural and disastorous culmination ആണ് എന്ന് പറയാം.ഒരു കൂട്ടികക്ഷി അതും എല്‍.ഡി.എഫ് പോലെ നയവും സമീപനവുമുള്ള മുന്നണിയില്‍ ഒറ്റക്കാട്ടില്‍ പന്നിയായ് വാഴാം എന്നത് ദുരാഗ്രഹം മാത്രമാണ്.
സാറ റ്റീച്ചറെ കുറിച്ച് പറയാതെ ഈ ആധ്യായം തീര്‍ക്കാനാവില്ല.കാളക്ക് ചെനപിടിച്ചു എന്ന് കേള്‍ക്കുമ്പോഴേ കയറും കറക്കാന്‍ നെയ്യും വെള്ളവുമായി ചെന്ന അവരോട് സഹതപിക്കുകയേ നിവര്‍ത്തിയുള്ളൂ.പല രാഷ്ട്രീയ ബുദ്ധിജീവികള്‍ക്കും ഈ അബദ്ധം പറ്റാം.വസ്തുതകള്‍ തിരക്കാതെ അച്ചുതാനന്ദന്‍ പൊതുസമ്മേളനത്തില്‍ കൈയ്യടിക്ക് പറഞ്ഞതും മുദ്രാവാക്യവുമായി ജാഥ നടത്തിയാല്‍ ഇതിന്റെ അപ്പുറവും പറ്റും.ഇപ്പോഴും അവര്‍ കാര്യങ്ങള്‍ വസ്തുതാപരമായി പഠിക്കാന്‍ ശ്രമിക്കുന്നില്ല,മറിച്ച് തീവ്ര ഇടതുപക്ഷക്കാരുടെ സ്വതസിദ്ധമായ അര്‍ത്ഥരഹിതമായ വാഗ്ധോരണി തുടരുകയാണ്

Manu said...

ആരെങ്കിലും ഒക്കെ ഇപ്പോഴെങ്കിലും ഇക്കാര്യങ്ങള്‍ വിളിച്ചുപറയുന്നതില്‍ സന്തോഷം.

--മൂന്നാറിലെ ജെ സി ബി കയറി പരിക്ക് പറ്റിയ ഒരു ബ്ലോഗര്‍ :)

ഷാനവാസ്‌ ഇലിപ്പക്കുളം said...

കിരണേ, പൂച്ചയ്കാണോ പിഴച്ചത്? അതോ പൂച്ചകളേയും, ഇത്രനാളും അവ എലിയെപ്പിടിക്കുമ്പോള്‍ അത് ശ്വാസം പിടിച്ച് കണ്ടുകൊണ്ടിരുന്ന നമ്മെയെല്ലവരേയും വെറുംവിഡ്ഢികളാക്കിയ 'ആആആആആ'പൂച്ചകളിപ്പിക്കല്‍കാരനോ? എനിക്ക് തോന്നുന്നത് തൊട്ടുപിന്നില്‍ എപ്പോഴുമുണ്ടാകുമെന്ന് കരുതിയിരുന്ന ആള്‍  ജനങ്ങളോടുള്ള പ്രതിബദ്ധതയില്‍ പിന്തിരിപ്പന്‍ ബ്വൂറ്ഷ്വാകളെ ബഹുകാതം പിന്നിലാക്കിയ ചില വലതുപക്ഷ വിപ്ലവ സിംഹങ്ങളുടെ ഗര്‍ജ്ജനങ്ങളില്‍ നടുങ്ങി അക്ഷരാര്‍ഥത്തില്‍ കുട്ടിക്കരണം മറിഞ്ഞതുകണ്ട് എന്തുചെയ്യണമെന്നറിയാതെ പകച്ചുനില്ക്കുകയാവണംപൂച്ചയിപ്പോള്‍. ഏത്രയൊക്കെ യായാലും രാഷ്ട്റീയക്കാരനെ കുടിച്ച വെള്ളത്തില്‍ വിസ്വസിക്കരുതെന്ന് ഇപ്പോള്‍ ആത്മഗതം നടത്തുന്നുണ്ടാകണം. പാവം പൂച്ച! ഏതായാലും ഈ ചെമ്പു പട്ടയവും , പിത്തളപ്പട്ടയവുമൊക്കെ ഇന്ഡ്യക്ക് സ്വാതന്ത്ര്യം കിട്ടുന്നതിനും മുന്പേ കീശയിലുള്ള പുരോഗമനപ്രസ്ഥാനം എന്തിനാണ്‌ ഇന്ഡ്യക്ക് സ്വാതന്ത്ര്യം കിട്ടി ഒരു രവീന്ദ്രന്‍ സാര്‍ ഡപ്യൂട്ടി തഹസീല്‍ ദാര്‍ ആയിവരുവോളം കാത്തിരുന്ന് ( അതും 52വര്‍ഷത്തോളം!)പട്ടയ ഭൂമിക്കു തന്നെ വീണ്ടും ഒരു പട്ടയംകൂടി തരപ്പെടുത്തിയത്‌? ചെമ്പിനു ബലം പോരെന്നു തോന്നിയിട്ടാകുമോ? പാവം മുന്‍ മുഖ്യമന്ത്രി കൂടിയായ മുന്‍ പാറ്ട്ടി സെക്രട്ടറിയെ വെറുമൊരു കൃഷിക്കാരന്‍ പോലുമാക്കി എന്തിനീ സാഹസം കാട്ടി? അല്ല പാറ്ട്ടിയാപ്പീസിനുമുകളില്‍ റിസോര്‍ട്ട് കൃഷി നടത്താന്‍ അന്നേ പ്ലാനുണ്ടായിരുന്നോ?റിസോര്‍ട്ട് കൃഷിയോ വാനിലകൃഷിയോ എന്തുവേണമെങ്കിലും നടത്താനുള്ള ബലം ആ പഴയ ചെമ്പിനുണ്ടായിരുന്നെങ്കില്?? അല്ലാ അപ്പോള്‍മറ്റുവല്ലവരും ഇതുപോലെ പലതും പറഞ്ഞ് വൃന്ദാവന്‍ പട്ടയമോ രവീന്ദ്രന്‍ പട്ടയമോ ഒക്കെ വാങ്ങിയവരില്‍ നിന്നും, പൊന്നും വില കൊടുത്തു വാങ്ങി അവിടെചില ബൂര്ഷ്വാ മുതലാളിമാര്‍റിസോര്‍ട്ട് കൃഷി നടത്തിയിരുന്നു, പാവങ്ങള്‍! അവരുടെയൊന്നും പലകെട്ടിടങ്ങളും അതും കോടികള്‍ വിലവരുന്നത്‌ ഇന്നവിടെയില്ല. ചെയ്യുന്ന കൃഷി ഒന്നാണെന്നിരിക്കേ ഈ ബൂര്‍ഷ്വാസികളും, ചോരകൊടുത്തും ഉയിരുകൊടുത്തും വലുതാക്കിയ വിപ്ളവപ്രസ്ഥാനവും തമ്മിലെന്താണൊരു വ്യത്യാസം? ഏതായാലും ഇത്രയും കാലം വല്യേട്ടന്റെ നിഴലില്‍ ഒളിച്ചിരിക്കാനായിരുന്നു വിധിയെങ്കിലും , ജനങ്ങളുടെ മണ്ടക്കിട്ട് ഒന്നു കൊടുക്കേണ്ടിവന്നെകിലുമെന്താ തങ്ങള്‍ വിചാരിച്ചാലും ചിലരെ വട്ടത്തിലിരുത്തി മുള്ളിക്കാനും കഴിയുമെന്ന് ഇപ്പോള്‍ മനസ്സിലായില്ലേ? ആ പൂച്ചയെ കളിപ്പിക്കളുകാരന്‌ ഇനിയും നാണമില്ലേ ഇങ്ങനെ ജനക്കൂട്ടത്തിന്‍ നടുവില്‍ തുണിയില്ലാതെ നില്ക്കാന്‍?അതോ മുണ്ട് പണ്ട് കൂടെ യുണ്ടായിരുന്ന സഖാക്കളൂരിക്കൊണ്ടോടിയവിവരം സിന്ദിക്കേറ്റ്മാധ്യമങ്ങള്‍ പറഖ്ഞ്ഞാലേ അറിയൂ എന്നുണ്ടോ ? ഓടി രക്ഷപ്പെട്ടൂടേ? പാവം പൂച്ച അതിനോടാനും വയ്യല്ലോ!

കിരണ്‍ തോമസ് said...

പാവം സുരേഷ്‌ കുമാര്‍ പൂച്ച. മറ്റ്‌ രണ്ട്‌ പൂച്ചകളും രക്ഷപ്പെട്ടു. VS നെ പ്രതിപക്ഷ നേതാവയിരുന്ന കാലത്തു മുതല്‍ വിശ്വസിച്ചു പോന്ന IAS ഉദ്യോഗസ്ഥനായിരുന്നു സുരേഷ്‌ പൂച്ച. VS ഇങ്ങനെ പിടിച്ച്‌ ചൂടു വെള്ളത്തില്‍ ഇടും എന്ന് പുള്ളി സ്വപ്നത്തില്‍പ്പോലും പ്രതിക്ഷിച്ചിട്ടുണ്ടാവില്ല. ഏതായലും സിന്‍ഡിക്കേറ്റ്‌ പത്രങ്ങള്‍ വാര്‍ത്ത തമസ്കരിച്ച്‌ VS നെ സഹായിക്കുന്നുണ്ട്‌. ബദല്‍ സിന്റിക്കെറ്റ്‌ പത്രങ്ങള്‍ VS ന്റെ വീഴ്ച ആഘോഷിക്കുകയും ചെയ്യുന്നു.

ഷാനവാസ്‌ ഇലിപ്പക്കുളം said...

സി. പി. ഐ യെ ക്കുറിച്ച് ഇത്രനാളും വലിയ അഭിപ്രായ വ്യത്യാസമൊന്നുമില്ലത്ത്ത് ഒരാളായിരുന്നു ഞാനും. മാധ്യമ സിന്ദിക്കേറ്റുകള്‍ നടത്തുന്ന കുപ്രചരണങ്ങളൊന്നും മുഖവിലക്കെടുക്കുന്നില്ലെങ്കിലും ചില സംശയങ്ങള്‍ മാത്രം ബാക്കി നില്കുന്നു ‌ 1. 1937ല്‍ ചെമ്പ് പട്ടയം കിട്ടിയ ഭൂമിയാണ് സി.പി.ഐയുടേതെന്നും, അവിടെ കെട്ടിടം കെട്ടുകയോ കുഴികക്കൂസ് കുത്തുകയോ കൊട്ടാരം പണിയുകയോ ചെയ്യുന്നതില്‍ അപാകതയില്ലെന്നും അറിയാമായിരുന്ന പാര്‍ട്ടി പിന്നെ യെന്തിനാണ്‌ 1999-ല്‍ ഇതേസ്ഥലത്തിന്‌ രവീന്ദ്രന്‍ പട്ടയം വാങ്ങിയത്‌?
2. പട്ടയം വാങ്ങുമ്പോള്‍ അതിലെ നിര്‍മ്മാണത്തെ സംബന്ധിച്ച് എന്തെങ്കിലും നിബന്ധനയുണ്ടായിരുന്നോ?
3. രവീന്ദ്രന്‍ പട്ടയം അനുവദിക്കാനടിസ്ഥാനമായ മഹ്സറില്‍ പാര്‍ട്ടിസെക്രട്ടറിയും ഭാര്യയും മൂന്നാറിലെ സ്ഥിരം താമസക്കാരാണെന്നും , അവര്‍ കൃഷിക്കുവേന്ടിയാണ്‍ പ്രസ്തുത സ്ഥലം ഉപയോഗിക്കുന്നതെന്നും കാണിച്ചിരുന്നുവെന്ന മാധ്യമറിപ്പോറ്ട്ടുകള്‍ വാസ്തവ വിരുദ്ധമാണോ? 4. ആണെങ്കില്‍ അങ്ങനെ റിപ്പോര്‍ട്ട് ചെയ്ത മാധ്യമങ്ങള്ക്കെതിരേ പാറ്ട്ടി നടപടിക്ക് മുതിരുമോ? 5. നാഷണല്‍ ഹൈവേയുടെ ദൂരപരിധി ലംഘിച്ചു ഒന്നാം നിലയിലേക്കുള നടപ്പാത നിര്‍മ്മിച്ച നടപടി ശരിയാണെന്ന് പാറ്ട്ടി അംഗീകരിക്കുന്നുണ്ടോ? 6. നടപ്പാത പൊളിച്ച നടപടിയെയാണോ അതോ അതിനാവശ്യമായ സമയം നല്‍കാതെ ധൃതി വെച്ചു പൊളിച്ചുവെന്നതാണോ ദൌത്യസംഘത്തില്‍ പാറ്ട്ടി കാണുന്ന കുറ്റം? 7. "സി.പി.ഐ കയ്യേറ്റക്കാരാണെന്ന് മനപ്പൂര്‍വ്വം വരുത്തി തീര്‍ക്കാന്‍വേണ്ടി ചിലര്‍ ബോധപൂര്‍വ്വം സൃഷ്ടിച്ച നാടകമാണ്‍ ഈ പൊളിക്കല്‍" ആരാണീ ചിലര്‍?
8.പൊളിക്കല്‍ നടത്തി 18 ദിവസം വരെയുണ്ടാകാത്തത്ര( പന്ന്യനെ ഇത്രയും വികാരഭരിതനായി ഇതിന്‌ മുന്പ് കണ്ടിട്ടില്ല!) പ്രതിഷേധക്കൊടുങ്കാറ്റ് അതുകഴിഞ്ഞുണ്ടായത്‌ എന്തുകൊണ്ടാണ്‌? 9. മുന്പുണ്ടായിട്ടുള്ള കോടതി വിധികളുടെ അടിസ്ഥാനത്തില്‍ പൊളിപ്പിക്കലില്‍ നിന്നും പാറ്ട്ടി ഓഫീസിനെ സംരക്ഷിക്കാന്‍ 4 മന്ത്രിമാരുള്ള പാര്‍ട്ടിക്ക് കഴിയാതിരുന്നതാണോ അതോ ശ്രമിക്കാതിരുന്നതാണോ?10. സി.പി.ഐ കൂടി ചേര്‍ന്ന് എടുത്ത ഒഴിപ്പിക്കല്‍ തീരുമാനത്തിന്റെ ജനസമ്മിതി ഇപ്പോഴത്തെ സംഭവ വികാസങ്ങളുടെ പേരില്‍ നഷ്ടപ്പെട്ടിട്ടില്ല എന്ന് കരുതാന്‍ പാര്‍ട്ടിക്കാകുമോ?11. ഉപസമിതി തീരുമാനത്തിന്‌ ദൌത്യസംഘത്തെയും മുഖ്യമന്ത്രിയേയും കീഴ്പെടുത്തുക വഴി ജനങ്ങളുടെ ഇടയില്‍ പാര്‍ട്ടിക്ക് സ്വീകാര്യത വര്‍ധിച്ചതായി തോന്നുന്നുണ്ടോ?12. രവീന്ദ്രന്‍ പട്ടയങ്ങളുടെ സാധുതയെപ്പറ്റി പാര്‍ട്ടിക്ക് പൂര്‍ണ്ണവിസ്വാസമുണ്ടോ?13. 1970-77-ല്‍  അച്ചുതമേനോന്‍ സര്‍ക്കാര്‍ ടാറ്റയില്‍ നിന്നു പിടിച്ചെടുത്തെന്നവകാശപ്പെടുന്ന സ്ഥലം അന്നേ വേലി കെട്ടി തിരിച്ചിട്ടിരുന്നോ? അതിപ്പോഴും സറ്ക്കാരിന്റെ കയ്യില്‍ തന്നെ യാണോ? ഇല്ലെങ്കില്‍ പിന്നീടുവന്ന സി.പി.ഐ റവന്യൂ മന്ത്രിമാര്‍ക്ക് എന്തുകൊണ്ട് കഴിഞ്ഞില്ല?14. പാര്‍ട്ടി കുത്തക മുതലാളികളേപ്പോലെ സുഖവാസ കേന്ദ്രങ്ങള്‍ നടത്തി പണംകൊയ്യുന്ന ലിമിറ്റഡ് കമ്പനികളേപ്പോലെ ലാഭം കൊയ്യാനുള്ള സ്ഥാപനമാകുന്നത്‌ ശരിയാണോ?

എം എന്‍ നേപ്പോലെയും, അച്ചുതമേനോനേപ്പോലെയും, പി.കെ.വി യെപോലെയും, പന്ന്യനേപ്പോലെയുമുള്ള കറപുരളാത്ത മനുഷ്യസ്നേഹികളായ കമ്യൂണിസ്റ്റുകാരെ ഇഷ്ടപ്പെടുന്നതുപോലെ തന്നെ ഇസ്മായീലിനെയൊന്നും ആ ഗണത്തില്‍  പെടുത്തുന്നത്‌ കടന്ന കയ്യല്ലേ?പാര്‍ട്ടി ഇപ്പോള്‍ എത്തിപ്പെട്ടിരിക്കുന്ന അവസ്ഥയില്നിന്നും കരകയറുമെന്ന് പ്രതീക്ഷി ക്കുന്നു. പക്ഷേ മുകളില്‍ പറഞ്ഞ സംശയങ്ങള്‍ ഉത്തരമില്ലാതെ കിടക്കുകയും ചെയ്യുന്നു.

കിരണ്‍ തോമസ് said...

ഷാനവാസേ,

ചില എല്ലാത്തിനൊന്നും മറുപടി നല്‍കാന്‍ കഴിയില്ലെങ്കിലും CPI നേതാക്കള്‍ ചാനല്‍ ചര്‍ച്ചകളില്‍ വിശദീകരിച്ചിട്ടുള്ള കാര്യങ്ങളാണ്‌ ഞാന്‍ പറയുന്നത്‌. അത്‌ എത്രത്തോലും ശരിയാണെന്ന് എനിക്ക്‌ ഉറപ്പില്ല. എന്നാലും ശ്രമിക്കാം

1- CPI ക്ക്‌ 7 സെന്റ്‌ പട്ടയ സ്ഥലവും 4 സെന്റ്‌ കൈവശ സ്ഥലവുമാണ്‌ ഉണ്ടായിരുന്നത്‌. അതില്‍ 7 സെന്റിലാണ്‌ പാര്‍ട്ടി ഓഫീസ്‌(?) കം റിസോര്‍ട്ട്‌ നില നില്‍ക്കുന്നത്‌. ഇതിനെതിരെ ഹൈക്കോടതി വരേ കോണ്‍ഗ്രസ്‌ നേതാക്കള്‍ കേസ്‌ നടത്തിയിരുന്നു. പക്ഷെ വിധി CPI ക്ക്‌ അനുകൂലമായിരുന്നു എന്നാണ്‌ എനിക്ക്‌ മനസിലായത്‌.

2-നിര്‍മ്മാണത്തിന്‌ പ്രശ്നമുണ്ടായിരുന്നു എങ്കില്‍ ഹൈക്കോടതി വിധി എതിരായേനേ

3,4 - അറിയില്ല

5-6 നടപ്പാത പൊളിക്കാന്‍ CPI തയ്യാറായിരുന്നു.പക്ഷേ 25 വരേ നോട്ടീസ്‌ കൊടുത്തിട്ട്‌ നേരത്തേ പൊളിച്ചു എന്നതാണ്‌ പ്രശ്നം.

7- ഒരു സംശയവും എനിക്കില്ല VS അച്ചുതാനന്ദന്‍

8 - പാര്‍ട്ടി ഓഫീസ്‌ പൊളിക്കപ്പെട്ടതിന്‌ ശേഷം CPI നല്‍കിയ പരാതി അനുഭാവപൂര്‍വ്വം പരിഗണിക്കാമെന്ന് പറഞ്ഞെങ്കിലും വ്യക്തമായ നടപടിയുണ്ടായില്ല്. അത്‌ പാര്‍ട്ടിയുടെ പരാജയമായി ചിത്രീകരിക്കപ്പെട്ടു. ഭൂമി കൈയേറീ റിസോര്‍ട്ട്‌ പണിതു തുടങ്ങിയ പല ആരോപണങ്ങളും കേട്ടൂ. പാര്‍ട്ടിയുടെ മുഖം മോശമായി എന്ന തോന്നലാകാം ഇതില്‍ പിടിച്ച്‌ തൂങ്ങാന്‍ CPI യേ പ്രേരിപ്പിച്ചത്‌.

9- സത്യത്തില്‍ പൊളിക്കല്‍ 4 മന്ത്രിമാര്‍ അറിയാതെയയിരുന്നു.

10 - എപ്പോഴെ നഷ്ടപ്പെട്ടൂ. അത്‌ തിരിച്ചു പിടിക്കാവുന്നതെ ഉള്ളൂ. പണ്ട്‌ അത്‌ VS ന്റെ ഷോ ആയിരുന്നത്‌ ഇനി CPI ഷോ ആകും.

11 - ജനങ്ങളിലൊക്കെ CPI ക്ക്‌ സ്വീകാര്യതയുണ്ടകുന്നതിന്‌ മുന്‍പ്‌ പാര്‍ട്ടീ പ്രവര്‍ത്തകരുടെ ഇടയില്‍ സ്വീകര്യതയുണ്ടാകണ്ടേ. ഇപ്പോള്‍ ഒഴിപ്പിക്കലിന്റെ കടിഞ്ഞാണ്‍ VS ന്റെ കൈയില്‍ നിന്ന് CPI ക്ക്‌ കിട്ടിയ സ്ഥിതിക്ക്‌ ഇനി ഭാവിയില്‍ ഒഴിപ്പിക്കല്‍ നടത്തി ജന സമ്മതിയുണ്ടാക്കാം.

12 - ഉണ്ടെന്നാണ്‌ ഇസ്മായേലിന്റെ വാക്കുകള്‍ സൂചിപ്പിക്കുന്നത്‌

13- അറിയില്ല

14 - ഒരിക്കലുമല്ല. CPI ക്ക്‌ വേറേ വിശദീകരണം കാണും. ഇതെക്കുറിച്ച്‌ വ്യക്തമായ ചാനല്‍ ചര്‍ച്ചയുണ്ടായില്ല

15 - ഇസ്മായേലിനെ ജനം LDF തരംഗത്തിലും തോല്‍പ്പിച്ചത്‌ വെറുതെയാണെന്ന് വിചാരിച്ചോ. അപ്പോഴാണല്ലോ രാജ്യസഭയിലേക്ക്‌ കയറിയത്‌

ഷാനവാസ്‌ ഇലിപ്പക്കുളം said...

:) :) :)

Joyan said...

താങ്കളുടെ ബ്ലൊഗ്‌ ഒന്നിനൊന്നു നന്നായി വരുന്നു. അഭിനന്ദനങ്ങള്‍!

njjoju said...

കിരണ്‍,

ജോണ്‍ പെരുവന്താനം പറയുന്നതു ശരിയാണെങ്കില്‍ എം.എന്‍ എന്റെ പേരിലുള്ളതും സി.പി.ഐ യ്ക്ക് അവകാശമുള്ളതുമായ ഭൂമിയിലല്ല വിവാദമായ കെട്ടിടം സ്ഥിതിചെയ്യുന്നത്. കെട്ടിടത്തോടു ചേര്‍ന്ന് പ്രസ്തുത ഭൂമി ഇപ്പോഴും ഉണ്ടത്രെ.

കെ.ഇ ഇസ്മായീല്‍ പറയുന്നതു ശരിയാണെങ്കില്‍ വിരിവു ഭൂമിയായ നാലുസെന്റുനു മാത്രമേ പട്ടയത്തിന് അപേഷിച്ചിട്ടുള്ളൂ.(അതിന്റെ ആവശ്യമേ ഉള്ളൂ.)

കെ.ഇ ഇസ്മായീല്‍ അടുത്തതായി പറഞ്ഞത് പി.കെ. വാസുദേവന്‍ നായര്‍ പൊതുപ്രവര്‍ത്തന്‍ എന്ന നിലയിലാണ് വിരിവു ഭൂമിയ്ക്ക് പട്ടയത്തിന് അപേക്ഷിച്ചത്. അപേക്ഷയില്‍ മറ്റാരെങ്കിലും വ്യത്യാസം വരുത്തിയതിന് ഞങ്ങള്‍ ഉത്തരവാദിയല്ല.

(ഇസ്മയീലിന്റെ മേല്‍ പറഞ്ഞ രണ്ടു അഭിപ്രായങ്ങളും ഞാന്‍ ടീവിയിലൂടെ കണ്ടതും കേട്ടതുമാണ്.)

ജോണ്‍ പെരുവന്താനത്തിന്റെ അഭിപ്രായത്തില്‍ KDH വില്ലേജില്‍ പട്ടയവിതരണത്തിന് കളക്ടര്‍ക്കു പോലും അധികാരമില്ലത്രെ (കൈവശാവകാശ സര്‍ട്ടിഫിക്കറ്റ് മാത്രമാണ് കൊടുക്കുക.). കരുണാകരന്‍ പ്രസ്തുത സ്ഥലത്ത് ഒരു പട്ടയമേള തന്നെ സംഘടിപ്പിയ്ക്കുവാന്‍ ശ്രമിച്ചിരുന്നെങ്കിലും കേന്ദ്രമാന്ത്രിയായിരുന്ന കമല്‍നാഥ്(?) അത് വനഭൂമിയായതിനാല്‍ തടയുകയാണുണ്ടായത്.

ടീ.വി യിലൂടെ ഞാന്‍ കണ്ടത് സി.പി.ഐ യുടെ പാര്‍ട്ടി ഓഫീസ് എന്നു പറയുന്ന കെട്ടിടത്തിന്റെ ഒരു വശത്ത് മൂന്നാര്‍ ടൂറിസ്റ്റ് ഹോം എന്ന് എഴുതിയിരിക്കുന്നതായാണ്.

ജോണ്‍ പെരുവന്താനത്തിന്റെ അഭിപ്രായത്തില്‍ സുരേഷ് കുമാറിന്റെ പിതാവ് പൊതുതാത്പര്യ ഹര്‍ജ്ജി കൊടുക്കുക വഴി മറ്റൊരാള്‍ക്ക് പൊതുതാത്പര്യ ഹര്‍ജ്ജി കൊടുക്കാനുള്ള സാഹചര്യം ഇല്ലാതായിരിക്കുന്നു. അതില്‍ വസ്തുതകള്‍ക്ക് നിരക്കാത്തവിവരങ്ങള്‍ ഉള്‍ക്കൊള്ളിച്ചിട്ടുണ്ട്. അതുകൊണ്ട് അതു പരാജയപ്പെടാനാണ് സാധ്യത.

കിരണ്‍ തോമസ് said...

joju

ഈ വിഷയത്തില്‍ അനംഗാരി നല്‍കിയ ഒരു വിശദീകരണം ഇവിടെയുണ്ട്‌ വായിക്കുമല്ലോ.