കുഞ്ഞുങ്ങള് കൂടണം; തൃശൂര് അതിരൂപതയിലും ഇടയലേഖനം എന്ന തലക്കെട്ടില് ഇന്നലത്തെ മംഗളം ദിനപത്രത്തില് വന്ന വാര്ത്ത ചുവടെ നല്കുന്നു.
സംസ്ഥാനത്ത് ക്രൈസ്തവരുടെ ജനസംഖ്യ ആനുപതികമായി കുറയുകയാണെന്നും ഇത് അപകടകരമായ പ്രവണതയാണെന്നും വ്യക്തമാക്കുന്ന തൃശൂര് ആര്ച്ച്ബിഷപ്പ് ആന്ഡ്രൂസ് താഴത്തിന്റെ ഇടയലേഖനം പള്ളികളില് വായിച്ചു. ജീവന്റെ വിശുദ്ധിയെക്കുറിച്ചും ഭ്രൂണഹത്യയും കൃത്രിമ ജനന നിയന്ത്രണവും ഉയര്ത്തുന്ന ഭീഷണിയെക്കുറിച്ചും ജനങ്ങളെ ബോധവല്ക്കരിക്കുന്നതിനുള്ള പോസ്റ്റര് പ്രചരണം ആരംഭിക്കാന് ഇടവകകള്ക്ക് ആര്ച്ച്ബിഷപ്പ് നിര്ദേശം നല്കി.
1991ലെ സെന്സസില് കേരളത്തിലെ ജനസംഖ്യ 2.9 കോടിയായിരുന്നപ്പോള് അതില് 19.5 ശതമാനമായിരുന്ന ക്രൈസ്തവര്. 2001 ആയപ്പോള് ജനസംഖ്യ 3.18 കോടിയായി ഉയര്ന്നപ്പോള് ക്രൈസ്തവരുടെ അനുപാതം 19 ആയി കുറഞ്ഞു. കൂടുതല് കുഞ്ഞുങ്ങളെ ജനിപ്പിക്കുകയും ജീവന്റെ വിശുദ്ധിയെ ആദരിക്കുകയുമാണ് ഈ പ്രതിസന്ധി മറികടക്കാനുള്ള മാര്ഗമെന്ന് ആര്ച്ച്ബിഷപ്പ് പറഞ്ഞു.
ഈ വാര്ത്ത വായിച്ച്പ്പോള് തോന്നിയ ചില ചിന്തകള് പങ്കുവയ്ക്കുന്നു
ഏതെങ്കിലും ഹിന്ദു സംഘടനയോ മുസ്ലിം സംഘടനയോ ഇത്തരത്തില് ആഹ്വാനം ചെയ്തിരുന്നു എങ്കില് എന്താകുമായിരുന്നു പുകില്.ഭാഗ്യത്തിന് ഞങ്ങള് ന്യൂനപക്ഷമായിപ്പോയി അതുകൊണ്ട് തന്നെ .5% കുറഞ്ഞപ്പോഴേക്കും ഞങ്ങള്ക്ക് കൂടുതല് ഉത്പാദനത്തേക്കുറിച്ച് ചിന്തിക്കാനായി.
സത്യത്തില് ഇന്നത്തെ സാഹചര്യത്തില് ഒരു കുഞ്ഞിനെ വളര്ത്താനുള്ള ബുദ്ധിമുട്ടുകള് ഒരു കുട്ടിയുടെ ഉല്പാദകന് എന്ന നിലയില് ചിന്തിച്ചു പോയി. ഭാര്യ ഗര്ഭിണിയായ 2ആം ത്തെ മാസം മുതല് 4 ആം മാസം വരെ പൂര്ണ്ണ വിശ്രമം. പിന്നെ 8ആം മാസം ആയപ്പോഴേക്കും ഭാര്യക്ക് പ്രഷര് വര്ദ്ധിച്ച് ഒരു മാസത്തോളം ആശുപത്രിയില് . അവസാനം പ്രഷര് നിയന്ത്രാണാധീനമായപ്പോള് സിസേറിയന്. മൊത്തം ആശുപത്രി ചിലവ് 17000 രൂപ. ( മള്ട്ടി സ്പെഷ്യാലിറ്റിയൊന്നുമല്ല സഭാ സന്യാസി സമൂഹം നടത്തുന്ന ആശുപത്രി. പണം കൂടുതലാണ് എന്നും എനിക്ക് അഭിപ്രായമില്ല. ചികിത്സയും നല്ലതായിരുന്നു). എന്നാല് ഈ 17000 ഒക്കെ എനിക്കോ എന്റെ കുടുമ്പത്തിനോ താങ്ങാന് കഴിയും. കുട്ടിക്കും തള്ളക്കും വലിയ കോമ്പ്ലിക്കേഷന് ഒന്നും ഇല്ലാതിരുന്നതിനാല് തുക ഇത്രയില് നിന്നു. എന്നാല് ഒരു സാധാരണക്കാരനേ സംബന്ധിച്ച് ഇത് വലിയ തുകയാണ് മാത്രവുമല്ല ഇത് ഇനിയും കൂടാം. അപ്പോള് 2 കുട്ടിയില് കൂടുതല് ഒന്നും ഉത്പാദിപ്പികാനുള്ള പണമോ ആരോഗ്യമോ ഭൂരിപക്ഷത്തിനും ഇല്ല.
ഇനി പ്രസവം കഴിഞ്ഞ് കുട്ടികളെ വളര്ത്താന് തുടങ്ങുന്നു. നല്ല വിദ്യാഭ്യാസം നല്കുക എന്നതാണ് പിന്നെയുള്ളാ പ്രശ്നം. അത് തന്നേ ഏറ്റവും നല്ലത് നല്കണം എന്നതാണ് മതാപിതക്കളുടെ ലക്ഷ്യം. സ്വകാര്യ വിദ്യാലയത്തില് എല്.കെ.ജിയില് ഹരിശ്രീ കുറിച്ച് തുടങ്ങിയാല് വിദ്യാഭ്യാസം പൂര്ത്തിയാക്കാന് എത്ര പണം വേണമെന്ന് ഊഹിക്കാമല്ലോ. ഇത് ഉണ്ടാക്കണമെങ്കില് മാതാപിതാക്കള് നെട്ടോട്ടമോടണം. ഇത് കഴിഞ്ഞ് ഒരു ജോലി കിട്ടുന്നത് വരെ ( കിട്ടിയില്ലെങ്കില് പിന്നെ ജീവിത കാലം മുഴുവന്) ആണ്കുട്ടിയേയും കല്യാണം കഴിച്ച് കൊടുക്കുന്നവരെ പെണ്കുട്ടിയേയും നോക്കണം. പെണ്കുട്ടികളാണെങ്കില് നല്ല സ്ത്രീധനം നല്കിയില്ലെങ്കില് ഒരു ക്രിസ്ത്യാനിയും കെട്ടിക്കോണ്ട് പോകുകയുമില്ല. അപ്പോല് 2 കുട്ടികളുള്ള മാതാപിതാക്കള് ഇപ്പോള് അനുഭവിക്കുന്ന പെടാപ്പാട് തന്നെ ധാരാളം.
ഇനി രാജ്യത്തിനെ കാഴ്ചപ്പാടില് ചിന്തിക്കുക. 120 കോടി കവിഞ്ഞ് നില്ക്കുകയാണ് നമ്മുടെ ജനസംഖ്യ. നാം രണ്ട് നമുക്ക് രണ്ട് എന്ന് മുദ്രാവാക്യം നെഞ്ചില് ഏറ്റിയ സമൂഹമാണ് ഇത്. നമ്മുടെ ജനസംഖ്യാ നിയന്ത്രണത്തൂടെ കേരളം മറ്റ് സംസ്ഥാനങ്ങള്ക്ക് മാത്രികയായതാണ്. നമ്മുടെ നാടിന്റെ പുരോഗതിയില് ഈ ജനസംഖ്യാ നിയന്ത്രണം വലിയ പങ്കാണ് വഹിച്ചത്. അവിടെ കേവലം .5 ശതമാനത്തിന്റെ കുറവ് സമുദായത്തിന് എന്ത് കുറവാണ് ഉണ്ടാക്കിയത് എന്ന് എത്ര ആലോചിചിട്ടും മനസ്സിലായില്ല. ഇന്ന് ലോകത്ത് ഏറ്റവും നല്ല ജീവിത സാഹചര്യം നിലനില്ക്കുന്ന രാജ്യങ്ങളിലെല്ലാം ജനസംഖ്യ കുറവാണ് എന്ന് നാം തിരിച്ചറിയേണ്ടതില്ലേ? അവര് ഇന്ന് കൂടുതല് കുട്ടികളെ ഉല്പാദിപ്പിക്കാന് ആഹ്വാനം ചെയ്യുന്നത് മനസ്സിലാക്കാം. എന്നാല് 30% ആള്ക്കാര് ദാരുദ്ര്യ രേഖക്ക താഴേക്കിടക്കുമ്പോള് എങ്ങനെ നമുക്ക് ഇത്തരത്തില് ചിന്തിക്കാന് കഴിയും.
ജീവന്റെ മൂല്യത്തെക്കുറിച്ച് സഭ പഠിപ്പിക്കുന്നത് നല്ലതാണ് എന്നാണ് എന്റെ അഭിപ്രായം. പെണ്കുഞ്ഞുങ്ങളെ ഭ്രൂണത്തില് തന്നെ കൊന്നൊടുക്കുന്ന് അപരിഷ്ക്രിത രീതിയേ എതിര്ക്കപ്പെടേണ്ടതു തന്നെ എന്നാല് അത് ഉല്പാദനം വര്ദ്ധിപ്പിക്കാനുള്ള ആഹ്വാനമായി പരിണമിക്കുമ്പോല് എവിടെയോ ചില തെറ്റുകള് പറ്റിയില്ലേ?
Subscribe to:
Post Comments (Atom)
45 comments:
കുഞ്ഞുങ്ങള് കൂടണം; തൃശൂര് അതിരൂപതയിലും ഇടയലേഖനം .ഏതെങ്കിലും ഹിന്ദു സംഘടനയോ മുസ്ലിം സംഘടനയോ ഇത്തരത്തില് ആഹ്വാനം ചെയ്തിരുന്നു എങ്കില് എന്താകുമായിരുന്നു
ലോകാവസാനം വിദൂരമല്ല. സസ്യങ്ങളും, പക്ഷി മ്ഋഗാദികളും, ശുദ്ധജലവും, ശുദ്ധവായുവും മറ്റും കുറയുകയും മനുഷരുടെ എണ്ണം മാത്രം വര്ദ്ധിക്കുകയും ചെയ്താല് എന്താവും ഗതി? ആരോഗ്യമില്ലാത്ത മനുഷ്യര് പെരുകുന്ന വന്ധ്യത വളരുന്ന സൂപ്പര് സ്പെഷ്യാലിറ്റി ആശുപത്രികള് ഭക്ഷണ ദൗര്ലഭ്യം തൊഴിലില്ലായ്മ ....................................................
ജീവന്റെ മൂല്യത്തെക്കുറിച്ച് സഭ പഠിപ്പിക്കുന്നത് നല്ലതാണ് എന്നാണ് എന്റെ അഭിപ്രായം. പെണ്കുഞ്ഞുങ്ങളെ ഭ്രൂണത്തില് തന്നെ കൊന്നൊടുക്കുന്ന് അപരിഷ്ക്രിത രീതിയേ എതിര്ക്കപ്പെടേണ്ടതു തന്നെ എന്നാല് അത് ഉല്പാദനം വര്ദ്ധിപ്പിക്കാനുള്ള ആഹ്വാനമായി പരിണമിക്കുമ്പോല് എവിടെയോ ചില തെറ്റുകള് പറ്റിയില്ലേ?
കിരണ ഇപ്പറഞ്ഞതിന്റെ താഴെ ഒരുഒപ്പ്
ഒരാശ്വാസമുണ്ട് കിരണ്.
ഇടയലേഖനങ്ങളില് കണ്ണുമടച്ച് വിശ്വസിക്കുന്നവരല്ല ഈ തലമുറയിലെ കത്തോലിക്കര്. അവര്ക്ക് സ്വന്തമായ തീരുമാനങ്ങളുണ്ട്, ലേഖനത്തില് എന്തു പറഞ്ഞാലും.
കിരണ്, സഭ അങിനെ പലതും പറയും. പക്ഷെ ഇന്നാട്ടിലെ കത്തോലിക്കര് അതെല്ലാം വിഴുങുമെന്ന് ഈ ആഹ്വാനം പുറപ്പെടുവിച്ചവര് തന്നെ വിശ്വസിക്കുന്നുണ്ടെന്ന് എനിക്ക് തോനുന്നില്ല. കേരളത്തില് സര്ക്കാര് കുടുംബാസൂത്രണ കാമ്പൈന് തുടങിയ ആദ്യ കാലങളില് തിരുസഭ ഗര്ഭ നിരോധന മാര്ഗ്ഗങളോട് ഇന്നത്തേത് പോലെ മൃദുസമീപനമല്ലാ എടുത്തിരുന്നത്, പക്ഷെ എന്നിട്ടും, ആദ്യ ഘട്ട പ്രചാരണം കഴിഞ്ഞ് നടത്തിയ സര്വ്വേകളില് കോട്ടയം ജില്ലയിലെ കത്തോലിക്കാ ഭൂരിപക്ഷ പ്രദേശങളിലാണത്രേ, കുടുംബാസൂത്രണ-ഗര്ഭ നിരോധന മാര്ഗ്ഗങള് ഏറ്റവും കൂടുതല് വിജയകരമായി ഉപയോഗിച്ചവരെ കണ്ടെത്തിയത് എന്ന് എവിടയോ വായിച്ചത് ഓര്മ്മിക്കുന്നു.
തമിഴ് നാട്ടില് സംഘ പരിവാര് പണ്ട് ഇതു പോലെ ഒര് കാമ്പൈന് സംഘടിപ്പിച്ചതും ഓര്മ്മയില് വരുന്നു. അന്ന് കൂടുതല് മക്കളെ പ്രസവിക്കുന്ന അമ്മമാര്ക്ക് “വീര തായ്” എന്നോ മറ്റോ ഒര് പദവി നല്കി ആദരിക്കുന്ന പരിപാടിയും ഉണ്ടായിരുന്നുവത്രേ. പക്ഷെ അതും ഫ്ലോപ്പ് ആയി.
കിരണ്,
ഒരു ഇടയലേഖനമായതുകൊണ്ട് പുറപ്പെടുവിച്ചത് ഒരു ബിഷപ്പ് ആയതുകൊണ്ട് അതും തൃശ്ശൂര് ബിഷപ്പ് ആയതുകൊണ്ട് വിവാദങ്ങള് ഉണ്ടായിക്കൂടെന്നില്ല. പത്തോ ഇരുപതോ വര്ഷം കഴിയുമ്പോള് പുതിയൊരു വിമോചനസമരാഹ്വാനത്തിന് ആളിക്കിട്ടാണാണെന്ന് ഇവിടുത്തെ ‘രാഷ്ട്രീയവാദികളും’ അല്ല ഭൂരിപക്ഷത്തിനു വെല്ലുവിളി ഉയര്ത്തുക എന്ന ഹിഡന് അജണ്ടയുടെ ഭാഗമായാണെന്ന് വര്ഗ്ഗീയവാദികളും ഉന്നയിച്ചേക്കാം. ഭാഗ്യം ഇതുവരെ അങ്ങനെയാരും പറഞ്ഞില്ല. ഇതിന്റെ പോസിറ്റീവായ ചില വശങ്ങള്മാത്രം പറയാന് ആഗ്രഹിക്കുന്നു.(നെഗറ്റീവ് പറയാന് വേറെ ആള്ക്കാര് വന്നുകൊള്ളും)
ജനസംഖ്യാനുപാതം കുറയുന്നത് രണ്ടുകാരണം കൊണ്ടാണ്. ഒന്നുകില് ഒരു സമുദായത്തിന്റെ(ഇവിടെ കൃസ്ത്യന്) ജനസംഖ്യാനിരക്ക് മുന്പുണ്ടായിരുന്നതിനേക്കാള് മറ്റുസമുദായങ്ങളെ അപേക്ഷീച്ച് കുറയുന്നു. അല്ലെങ്കില് മറ്റുസമുദായങ്ങളുടെ വളര്ച്ചാനിരക്ക് കൃസ്ത്യന് സമുദായത്തിന്റേതിനേക്കാള് കൂടുന്നു.(ഇതു രണ്ടും ഒന്നല്ലേ എന്നു ചോദിച്ചാന് കുറച്ചു വ്യത്യാസമുണ്ട്.)
ഇതില് രണ്ടാമത്തേതാണ് കാരണമെങ്കില് അതില് ആശങ്കപ്പെടാനില്ല. ആദ്യത്തേതാണ് കാരണമെങ്കില് ആശങ്കപ്പെടാനുണ്ടുതാനും.
ശരാശരിവിദ്യാഭ്യാസവും പ്രാഥമിക വിദ്യാഭ്യാസവും മറ്റേതൊരു സമുദായത്തേക്കാളും കൃസ്ത്യന് സമുദായാംഗങ്ങള്ക്കുണ്ട് എന്നത് ആരു നിഷേധിക്കുമെന്ന് തോന്നുന്നില്ല. അതുകൊണ്ട് സര്ക്കാര് നിര്ദ്ദേശിച്ചരീതിയില് ജനസംഖ്യാനിയന്ത്രണം ഏറെക്കുറേ കൃസ്ത്യാനികളുടെ ഇടയില് പ്രാവര്ത്തികമായതും മറ്റുസമുദായങ്ങളില് അത് ഇത്രത്തോളം ഫലപ്രദമാകാത്തതുമാവാം രണ്ടാമത്തേ അവസ്ഥയ്ക്ക് കാരണം.
ഒന്നാമത്തെ കാരണത്തിലേയ്ക്ക് വരാം.
മറ്റുസമുദായങ്ങളെ അപേക്ഷിച്ച് (പ്രത്യേകിച്ച് മുസ്ലീം)സ്ത്രീ വിദ്യാഭ്യാസത്തിലും അതുകൊണ്ടൂ തന്നെ ജോലിയുള്ള സ്ത്രീകളുടെ അനുപാതത്തിലും കൃസ്ത്യാനികള് മുന്പിലാവാന് സാധ്യതയുണ്ട്. സിറ്റികളിലും മറ്റും “കുട്ടികള് വേണ്ട രണ്ടു ജോലി” എന്ന ഒരു പോളിസി ഉടലെടുത്തു കഴിഞ്ഞിട്ടുണ്ട്. ഇത് കുടുംബബന്ധങ്ങളുടെ അസ്ഥിരതയ്ക്കും സദാചാരപരമായ പ്രത്യാഘാതങ്ങള്ക്കും വഴിതെളിച്ചേക്കാവുന്നതാണ്. ഇത്തരത്തില് ജനസംഖ്യ ക്രമാതീതമായി താഴുന്നത് പല യൂറോപ്യന് രാജ്യങ്ങളും അഭിമുഖീകരിക്കുന്ന പ്രശ്നവുമാണ്. ജര്മ്മനിയിലും മറ്റും ഗര്ഭധാരണം പ്രോത്സാഹിപ്പിക്കുന്നതിനായി ഗവര്മെന്റുതന്നെ പദ്ധതികള് ആസൂത്രണം ചെയ്യുന്നതായി കേട്ടിട്ടുണ്ട്. മൂന്നോ നാലോ വയസില് താഴയുള്ള കുട്ടികള്ക്ക് പല വിദേശരാജ്യങ്ങളും നിരവധി സൌജന്യങ്ങളും ആനുകൂല്യങ്ങളും കൊടുക്കുന്നതായും അറിയാന് കഴിഞ്ഞിട്ടുണ്ട്. അതായത് വിദ്യാഭ്യാസപരമായും സാമ്പത്തികമായും ഉയര്ന്ന രാജ്യങ്ങളില് ജനസംഖ്യകുറയുന്നത് ഒരു പ്രശ്നമായിക്കൊണ്ടിരിക്കുകയാണ്. ഇത് കേരളത്തിലും പ്രത്യേകിച്ച് കൃസ്ത്യാനികളുടെ ഇടയിലും വന്നുകൂടായ്കയില്ല. ഇതിന്റെ വെളിച്ചത്തില് വേണം ഈ ഇടയലേഖനത്തെ വിലയിരുത്താന് എന്നാണ് എന്റെ അഭിപ്രായം.
ഇടയലേഖനങ്ങളെ രാഷ്ടീയക്കാരുടെ പത്രപ്രസ്ഥാവനകളുടെ നിലവാരത്തിലേയ്ക്ക് തരംതാഴ്ത്തി ചിന്തിക്കരുത്. കത്തോലിക്കാസഭ ഇത്തരം വിഷയങ്ങളില് പഠനങ്ങളും വിശകലനങ്ങളും നടത്തുന്നുണ്ട്. ഇത്തരം പഠനങ്ങളുടെ അടിസ്ഥാനത്തിലാണ് പല ലേഖനങ്ങളും. ബിക്ഷപ്പുമാര് പലവിഷയങ്ങളിലും പാണ്ഢിത്യമുള്ളവരുമാണ്.
ഈ ഇടയലേഖനം മുന്പോട്ടുവയ്ക്കുന്ന ആശയം പുതിയതൊന്നുമല്ല. എണ്പതുകളിലും തൊണ്ണൂറുകളിലും സഭ ഇത് പലവട്ടം ചര്ച്ച ചെയ്തിട്ടൂള്ളതാണ്. അത് ഒരിക്കല്കൂടി ആവര്ത്തിച്ചു എന്നു കരുതിയാല് മതി. 91-92 കാലഘട്ടത്തില് നൊണ്-ന്യൂക്ലിയസ് കുടുംബങ്ങളുടെ പ്രയോജനങ്ങളെക്കുറിച്ച് ഞങ്ങളുടെ ടീച്ചര് പറഞ്ഞത് ഓര്ക്കുന്നു. അന്ന് അവരു പറഞ്ഞ ന്യായങ്ങള്ക്ക് സഭയുടെ ഔദ്യോഗിക പ്രഖ്യാപനങ്ങളോടെ ബന്ധമൊന്നുമൂണ്ടായിരുന്നില്ലെങ്കിലും സഭയുടെ ഔദ്യോഗിക നിലപാട് അതുതന്നയായിരുന്നു. കര്മ്മലകുസുമം എന്ന് മാസികയില് അക്കാലത്ത് ജനസംഖ്യാനിയന്ത്രണത്തെ വിമര്ശിച്ചുകൊണ്ട് ലേഖനം വന്നിരുന്നതോര്ക്കുന്നു. അതില് ഇന്ത്യ മാനവവിഭവശേഷികൊണ്ട് നേട്ടം കൈവരിക്കുന്നതില് ഭയമുള്ള പാശ്ചാത്യരാജ്യങ്ങള്ലാണ് ജനസംഖ്യാവിസ്ഭോടനം എന്ന പ്രയോഗം കൊണ്ടുവന്നത് എന്നു വരെ ആരോപിച്ചിരുന്നു.(വാചകം ഇങ്ങനെയല്ല, ആശയം ഏതാണ്ട് ഇങ്ങനെ തന്നെയായിരുന്നു). അന്ന് അതൊന്നും മനസിലായിരുന്നില്ല. പൂര്ണ്ണമായി ഇപ്പോഴും ആ ആശയത്തോട് യോജിക്കുന്നുമില്ല. എങ്കിലും ആ പ്രസ്താവനയ്ക്ക് പ്രവചന സ്വഭാവമുണ്ടായിരുന്നോ എന്ന് ഇപ്പോള് തോന്നിപ്പോവുകയാണ്.
ഗര്ഭം ധരിയ്ക്കാനും പ്രസവിയ്ക്കാനും സ്ത്രീകള് മടികാണിയ്ക്കുകയും സാമ്പത്തികമായ പരാധീനതകള് കാരണം കുട്ടികളേ വേണ്ട (ഇത് പല വിദേശരാജ്യങ്ങളിലും ഇന്ത്യയിലെ പല സിറ്റികളിയും പ്രചാരത്തിലായിക്കൊണ്ടിരിക്കുന്നു)എന്ന ചിന്തയൊക്കെ പ്രാചാരത്തിലാവുന്നതിന്നും മുന്പെ അതിനെതിരെ ബോധവല്ക്കരണം നടത്തുന്നത് എന്തുകൊണ്ടും നല്ലതാണ്.
കൂടുതല് ‘ഉല്പാദിക്കുന്നവര്ക്ക്’ ഒരു അവാര്ഡ് പ്രഖ്യാപിച്ചുകൊണ്ടുള്ള ഒരു ലേഖനം ഉടനെ പ്രതീക്ഷിക്കാം.
കിരണേ കുഞ്ഞുങ്ങള് കൂടിയാലുള്ള സാമ്പത്തിക ബുദ്ധിമുട്ടുകളാണ് പ്രശ്നമെങ്കില് കാശുള്ളവന് പത്ത് കുട്ടികള്ക്കും കാശില്ലാത്തവന് രണ്ട് കുട്ടികള്ക്കും ജന്മം കൊടുക്കട്ടെന്നേ.
പിന്നെ ഒരു കാര്യം, ഇടയ ലേഖനം വായിച്ച് കേട്ടാല് ഉടനെ ഒരു കുഞ്ഞാടും ഇതിനുവേണ്ടി ‘മിനക്കെടുമെന്ന്’ എനിക്ക് തൊന്നുന്നില്ല. പണ്ടത്തെപൊലല്ലെന്നേ, ഇപ്പൊള് പെണ്ണുങ്ങള്ക്കും വയ്യ. മൂന്നെണ്ണത്തില് കൂടുതല് അവരും സമ്മതിക്കത്തില്ല
കിരാതന് പറയുന്നത് പണ്ട് ഹേമാമാലിനി പറഞ്ഞിട്ടുണ്ട്. അതില് കാര്യമില്ലാതില്ല.
കുട്ടികള്ക്ക് സന്ഡേ സ്കൂള്,
മുതിര്ന്നവര്ക്ക് ഫണ് ഡേ സ്കൂള്
-ഈ ആശയം മുന്നോട്ട് വയ്ക്കാം, നമുക്ക്!
ജനസംഖ്യാനുപാതം കുറയുന്നത് രണ്ടുകാരണം കൊണ്ടാണ്. ഒന്നുകില് ഒരു സമുദായത്തിന്റെ(ഇവിടെ കൃസ്ത്യന്) ജനസംഖ്യാനിരക്ക് മുന്പുണ്ടായിരുന്നതിനേക്കാള് മറ്റുസമുദായങ്ങളെ അപേക്ഷീച്ച് കുറയുന്നു.അല്ലെങ്കില് മറ്റുസമുദായങ്ങളുടെ വളര്ച്ചാനിരക്ക് കൃസ്ത്യന് സമുദായത്തിന്റേതിനേക്കാള് കൂടുന്നു.(ഇതു രണ്ടും ഒന്നല്ലേ എന്നു ചോദിച്ചാന് കുറച്ചു വ്യത്യാസമുണ്ട്.)
ഇതില് രണ്ടാമത്തേതാണ് കാരണമെങ്കില് അതില് ആശങ്കപ്പെടാനില്ല. ആദ്യത്തേതാണ് കാരണമെങ്കില് ആശങ്കപ്പെടാനുണ്ടുതാനും.
ആശങ്ക തീര്ക്കാന് നന്നായി ശ്രമിച്ചോളൂ. വിജയീ ഭവ.
കിരണേ, ഡൂക്കിലി രാഷ്ട്രീയക്കാരേക്കാള് പ്രാഗത്ഭ്യമുളളവരല്ലേ തിരുമേനിമാര്. അവരുടെ തിരുവചനങ്ങളെ ബ്ലോഗിലെ ചര്ച്ചയ്ക്കൊക്കെ വിധേയമാക്കുക എന്നു പറഞ്ഞാല്. തെമ്മാടിക്കുഴി ഒരുക്കിയിട്ടിട്ടുണ്ട്.
ഗര്ഭം ധരിക്കാന് മടികാടിക്കുന്ന സ്ത്രീകളെ നിര്ബന്ധിച്ച് അത് ധരിപ്പിക്കാന് തിരുമേനിമാര് തന്നെ രംഗത്തിറങ്ങിയത് നന്നായി. ഈ നിര്ബന്ധത്തിനിടയിലെങ്ങാണ്ടാണത്രേ സിസ്റ്റര് അഭയ അന്ത്യശ്വാസം വലിച്ചത്.
ഇടയലേഖനം കേള്ക്കാന് പോയിരുന്നവരില് എത്രപേര് ഉദ്ബോധനം കേട്ട് പ്രസവിച്ചു എന്നറിയാന് ഇനിയും വേണം പത്തുമാസം. ആ കണക്കും ഒന്നു ശേഖരിച്ച് പോസ്റ്റുചെയ്യണേ കിരണേ. ക്രിസ്ത്യാനിസ്ത്രീകള്ക്ക് സഭാ ആശുപത്രിയില് പ്രസവച്ചെലവ് സൗജന്യം എന്നൊരു പരസ്യവും പ്രതീക്ഷിക്കാമോ? (മുസ്ലിം കിഡ്നി തേടി ഏതോ പത്രത്തില് വന്ന പരസ്യം പണ്ട് വായിച്ചതോര്ക്കുന്നു)
ജോജൂ, വിദേശ രാജ്യങ്ങള് ജനസംഖ്യാ വര്ദ്ധനവിനെ പ്രോത്സാഹിപ്പിക്കുമ്പോള് ഏതെങ്കിലും മതവിഭാഗത്തിനെയാണോ പ്രോത്സാഹിപ്പിക്കുന്നത്? ജപ്പാനില് ജനസംഖ്യയുടെ കുറവ് ഒരു പ്രശ്നമാണ്. പക്ഷേ അവിടുത്തെ ക്രിസ്ത്യന് സഭയല്ല അതിനുള്ള ആഹ്വാനങ്ങള് നല്കുന്നത്-ഗവണ്മെന്റാണ്. അത് എല്ലാ ജനങ്ങളോടുമാണ് പറയുന്നത്. അതും ആ രാജ്യത്തെ മൊത്തം ജനസംഖ്യയെ ആസ്പദമാക്കിയാണ് (അല്ലെങ്കില് വംശനാശം സംഭവിച്ചുകൊണ്ടിരിക്കുന്ന വല്ല ട്രൈബല് വിഭാഗങ്ങളോ മറ്റോ ആയിരിക്കണം).
അതുകൊണ്ട് വിദേശ രാജ്യങ്ങളിലെ ഗവണ്മെന്റിന്റെ നേതൃത്വത്തിലുള്ള, മൊത്തം ജനസംഖ്യയെ അടിസ്ഥാനമാക്കിയുള്ള, ജനസംഖ്യാ വര്ദ്ധനവിനെ അനുകൂലിച്ചുകൊണ്ടുള്ള നടപടികളെയും കേരളത്തിലെ കൃസ്ത്യാനികള് മാത്രം ജനസംഖ്യ വര്ദ്ധിപ്പികണമെന്ന സഭയുടെ നേതൃത്വത്തിലുള്ള നടപടികളെയും ഒരേ രീതിയില് കാണാന് സാധിക്കില്ല എന്നാണ് എന്റെ അഭിപ്രായം. കാരണം ഹിന്ദുവായാലും കൃസ്ത്യാനിയായാലും മുസ്ലീമായാലും എല്ലാവരും വെവ്വേറേ സ്വയം പര്യാപ്ത വിഭാഗങ്ങളായല്ലല്ലോ നാട്ടില് ജീവിക്കുന്നത്. ഒരു കുട്ടിയെ വളര്ത്താനുള്ള സര്ക്കാരിന്റെ ചിലവ് എല്ലാ വിഭാഗക്കാരുടെയും ടാക്സ് ഉപയോഗിച്ചും മറ്റുമല്ലേ.
അല്ലെങ്കില് പിന്നെ മാരീചന് പറഞ്ഞതുപോലെ മുസ്ലിം കിഡ്നിയും ഹിന്ദു ചോരയും എല്ലാം ആവശ്യപ്പെട്ട് പരസ്യങ്ങള് വരും.
തിരുമേനിമാരുടെ പോക്ക് പണ്ടേ തന്നെ പിശകാ.
വടക്കേ ഇറ്റ്ഞ്യയില് ഏതെങ്കിലും ക്രിസ്ത്യാനി അബോര്ഷന് ആയാല് അത് വര്ഗീയ ഗൂഡാലോചനയുടെ ഫലമാക്കും...
ഞാനൊന്നും പറയണില്ല്യേ...
:)
ഉപാസന
ഓ. ടോ: അഭയയെ ആരും അറിയില്ല അല്ലേ..?
വക്കാരീ,
ഏതെങ്കിലും ഒരു ജനവിഭാഗത്തിന്റെ- അത് ജാതിയുടെയോ മതത്തിന്റെയോ ജോലിയുടെയോ ദേശത്തിന്റെയോ അടിസ്ഥാനത്തിലാവാം- ജനസംഖ്യാനിരക്ക് കുറയുന്നൂ എന്നുകണ്ടാല് അതിന്റെ കാരണം അന്വേഷിക്കേണ്ടതില്ലാ എന്നാണോ. അതോ സര്ക്കാരിനു മാത്രമാണോ ഇതില് ഉത്തരവാദിത്വം.
വിദ്യാഭ്യാസവും സാമ്പത്തികനിലവാരവും മെച്ചപ്പെട്ടജീവിതസാഹചര്യങ്ങളും കൂടിവരും തോറും ജനസംഖ്യനിരക്ക് ക്രമാതീതമായി കുറയുന്നു എന്നത് ആശങ്കയുണ്ടാക്കുന്നില്ലേ?(19.5ന് നിന്നും 19 ആയതല്ല ഞാന് ഉദ്ദ്യേശിക്കുന്നത്)
രണ്ടുകുട്ടികള് എന്ന സങ്കല്പത്തില് നിന്നും ഒരു കുട്ടിയിലേയ്ക്കും കുട്ടികളേ വേണ്ട എന്ന തീരുമാനത്തിലേക്കുമൊക്കെ എത്തുന്നത് നല്ലതാണ്നെന്നാണോ. ജീവന്റെ മഹത്വത്തെ എന്നും പ്രഘോഷിച്ചിട്ടൂള്ള കത്തോലിക്കാസഭയെ സംബന്ധിച്ചിടത്തോളം ഇത്തരം അനാരോഗ്യകരമായ പ്രവണതകളില് ആശങ്കയുണ്ട്. അതാണ് ഇടയലേഖനത്തില് പ്രതിഫലിച്ചതും.
ജോജൂ, ധാരാളം കെട്ടുപിണഞ്ഞ് കിടക്കുന്ന പ്രശ്നങ്ങളുണ്ടെന്നുള്ളതാണ്. വികാരപരം മുതല് വിവേകപരം വരെ.
പല മതവിഭാഗങ്ങള് വസിക്കുന്ന ഒരു രാജ്യത്ത് ചില കാര്യങ്ങള് സര്ക്കാര് തന്നെ ഉത്തരവാദിത്തമേല്ക്കുന്നതായിരിക്കും അഭികാമ്യം. ചില അതിര്വരമ്പുകള് വേണം. ജനസംഖ്യാ നിരക്ക് കുറയുമ്പോള് അന്വേഷിക്കണം. ആരന്വേഷിക്കണം എന്നതാണ് ചോദ്യം.
സ്വന്തം മതത്തിന്റെ കാര്യങ്ങള് ആ മതക്കാര് നോക്കണം. പക്ഷേ ജനസംഖ്യ കൂട്ടുന്ന വാദം ഇതിനു മുന്പ് ഇമാമും തൊഗാഡിയായും ഉന്നയിച്ചപ്പോള് വിവാദമായതാണെന്നും കൂടി ഓര്ക്കണം. ഇമാം പറഞ്ഞത് മുസ്ലിങ്ങളുടെ ജനസംഖ്യ കൂട്ടണമെന്ന് മാത്രമാണ്. തൊഗാഡിയ പറഞ്ഞത് ഹിന്ദുക്കളുടെ ജനസംഖ്യ കൂട്ടണമെന്ന് മാത്രമാണ്. എല്ലാവരും അവരവരുടെ മതത്തിന്റെ കാര്യം മാത്രമാണ് പറഞ്ഞത്. അങ്ങിനെ എല്ലാവരും അവരവരുടെ മതത്തിന്റെ കാര്യം മാത്രം നോക്കി നടക്കുന്ന ഒരു സ്ഥിതിവിശേഷം എത്രമാത്രം നല്ലതായിരിക്കും? എല്ലാവരും സര്ക്കാരിനോട് പറയുന്നു-ഞങ്ങള് ആഗ്രഹിക്കുന്ന രീതിയില് കഴിയാനുള്ള സാഹചര്യങ്ങള് സര്ക്കാര് ഒരുക്കി തരണം. ബാക്കി കാര്യം ഞങ്ങള് നോക്കിക്കൊള്ളാം. എങ്ങിനെയുണ്ടാവും സ്ഥിതിവിശേഷം?
ആഹ്വാനങ്ങളും അവകാശ പ്രഖ്യാപനങ്ങളുമൊക്കെ ശരിതന്നെ. അതിനൊക്കെ അവകാശവുമുണ്ട്. പക്ഷേ ഓരോന്നിനും മുന്പ് അത് സമൂഹത്തിലുണ്ടാക്കുന്ന ഇംപാക്ടുകളും കൂടി ആലോചിക്കണം. ഇത് ഞങ്ങളുടെ കാര്യമല്ലേ, അതിന് നിങ്ങള്ക്കെന്താ എന്ന് ചോദിച്ചാല് “ശരി തന്നെ” എന്നങ്ങ് എടുക്കുന്ന ആള്ക്കാരല്ല നാട്ടിലുള്ളത്. അമേരിക്കയും യൂറോപ്പും അതേപടി ഇന്ത്യയിലേക്ക് പകര്ത്താന് പറ്റില്ല. അടിസ്ഥാന വിദ്യാഭ്യാസം തൊട്ട് ധാരാളം കാര്യങ്ങള് വ്യത്യാസപ്പെട്ടിരിക്കുന്നു ഇവിടെ.
ഈ ജനസംഖ്യാ വര്ദ്ധനവ് ആഹ്വാനം മൂലം ഉണ്ടാവുന്ന അഡീഷണല് കുട്ടികളുടെ കാര്യം സര്ക്കാരും കൂടി നോക്കേണ്ടി വരുമ്പോഴാണ് പ്രശ്നം. കാരണം സര്ക്കാര് എല്ലാവരുടെയും കൂടിയാണല്ലോ.
ഓക്കെ. ജോജു പറഞ്ഞത് സമ്മതിക്കുന്നു. സഭ ആഹ്വാനം ചെയ്യുന്നു. വിശ്വാസികളെല്ലാം അനുസരിക്കുന്നു. കിരണ് പറഞ്ഞതുപോലെ ഹിന്ദു സംഘടനകളും മുസ്ലിം സംഘടനകളും ആഹ്വാനം ചെയ്യുന്നു. അവരുടെ അനുയായികളും അനുസരിക്കുന്നു. അങ്ങിനെ ഓരോ വീട്ടിലും അഞ്ചും ആറും കുട്ടികള്. എന്നിട്ട്?
സഭ ഈ ഇടയലേഖനം വായിക്കുന്നതിനു മുന്പ് അതുപോലൊരു സ്ഥിതിവിശേഷത്തെപ്പറ്റി ആലോചിച്ചിരുന്നോ?
കത്തോലിക്ക സഭ എന്നും കുടുമ്പാസൂത്രണത്തിന് എതിരാണ്. പ്രീമാരേജ് കോഴ്സുകളില് പറയുന്നത് ക്രിത്രിമ ഗര്ഭനിരോധന മാര്ഗ്ഗങ്ങള് ഉപയോഗിക്കുന്നത് തെറ്റാണ് എന്നാണ്. ഉറ മുതല് ഗ്പ്രസവം നിര്ത്തല് വരെ തെറ്റാണ്. നാച്ചുറല് മെതേഡാണ് സഭ കുടുമ്പാസൂത്രണത്തിന് ഉപയോഗിക്കാന് പറയുന്നത്( അതായത് ഗര്ഭധാരണ സാധ്യതയുള്ള ദിവസങ്ങളില് ബന്ധപ്പെടല് ഒഴിവക്കല്). അതില്പപ്പോലും കുട്ടികള് ഉണ്ടാകാരുത് എന്ന് ഇന്റന്ഷന് മനസ്സില് പാടില്ല എന്നുപോലും പറയുന്ന ആള്ക്കാരുണ്ട്.
ജോജു പറഞ്ഞ പോലെ ഒരു കുട്ടി കുട്ടികള് വേണ്ട എന്ന ചിന്താഗതി തടയുക മാത്രമല്ല സഭ പ്രീമാര്യേജ് കോഴ്സുകളില് പറയുന്നത്. ഞാന് പോയ ക്ലാസില് 4 കുട്ടികള് വരെ വേണമെന്നാണ് കിട്ടിയ സന്ദേശം. പല സ്ഥലങ്ങളിലും ഈ വിഷയാം അവതരിപ്പിക്കുമ്പോള് വന് വിവാദങ്ങള് ഉണ്ടായിട്ടുണ്ട്. അംഗസംഖ്യ കുറയുന്നതില് സഭ ഉല്കണ്ഠാകുലാരാണ് എന്ന് പല ക്ലാസുകളിലും വ്യക്തമാക്കിയിട്ടുമുണ്ട്.
എന്നാല് ഇതില് നിന്ന് വ്യത്യ്സ്ഥമായ ആശയങ്ങള് പഠിപ്പുക്കുന്ന അച്ചന്മാരും ഉണ്ട്. കുറേ നാളുകള്ക്ക് മുന്പ് നാട്ടില് ധ്യാനിപ്പിക്കാന് വന്ന് ഒരു കപ്പൂച്ചന് അച്ചന് പറഞ്ഞതിങനെയാണ്. മക്കളേ നല്ലവണ്ണം നോക്കാന് കഴിയാത്തവര് ഷണ്ഡരായിപ്പോട്ടേ എന്ന്. അദ്ദേഹം ഉദ്ദേശിച്ചത് നല്ലരീതിയില് വളര്ത്താന് കഴിയുന്നത്ര കുട്ടികളെ മാത്രമേ ഉല്പ്പാദിപ്പിക്കാവൂ എന്നാണ്.
ജീവിതത്തിന്റെ ദു:ഖങ്ങളും ദുരിതങ്ങളും ഏറ്റുവാങ്ങാന് കൂടുതല് കുഞ്ഞുങ്ങള് ജനിക്കാതിരിക്കട്ടെ എന്ന് ഞാന് കരുതുന്നു. ഭൂമിയില് മനുഷ്യന് മനുഷ്യക്കുഞ്ഞുങ്ങള് മാത്രമാണ് പിറക്കുന്നത് . ഒരു മതക്കുഞ്ഞോ സമുദായക്കുഞ്ഞോ ജാതിക്കുഞ്ഞോ പിറക്കാറുണ്ടെന്ന് ഞാന് മനസ്സിലാക്കിയിട്ടില്ല . ഇക്കണ്ട മതങ്ങളും ജാതികളും സമുദായങ്ങളും പ്രവാചകന്മാരും ഒക്കെ ഉണ്ടാവുന്നതിന് മുന്പേ മനുഷ്യക്കുഞ്ഞുങ്ങളാണ് ഭൂമിയില് ജനിച്ചുകൊണ്ടിരുന്നത് . അതിന് എന്നെങ്കിലും മാറ്റം വന്നതായി ചരിത്രരേഖകളില്ല.
ഇന്ന് ജീവിതത്തിന്റെ പ്രയാസങ്ങളും മത്സരങ്ങളും സംഘര്ഷങ്ങളും ഒക്കെ കാണുമ്പോള് മരണപ്പെട്ടവരും ജനിക്കാതെ പോയവരും എത്ര ഭാഗ്യവാന്മാര് എന്നെനിക്ക് തോന്നുന്നു . ഇവിടെ കൂടുതല് കുഞ്ഞുങ്ങള് ജനിക്കാന് ആഹ്വാനം ചെയ്യുന്നവര് , അങ്ങിനെ ജനിക്കുന്ന കുഞ്ഞുങ്ങള്ക്ക് സന്തോഷത്തോടും സമാധാനത്തോടും ഇവിടെ ജീവിയ്ക്കാന് എന്ത് ഭൌതീക സാഹചര്യങ്ങള് ഒരുക്കിയിട്ടാണ് അങ്ങിനെ ആഹ്വാനം ചെയ്യുന്നത് ?
എന്ത് അഹ്വാനവും ആര്ക്കും ചെയ്യാം . അടുത്ത നൂറ്റാണ്ടിലെ ജനങ്ങള്ക്കായി ഞാന് ഒരു ആഹ്വാനം ചെയ്യുന്നു. പ്രിയപ്പെട്ടവരേ , നിങ്ങള് വിവാഹം കഴിക്കുക ! എന്നാല് ദയവായി കുഞ്ഞുങ്ങളെ ജനിപ്പിക്കാതിരിക്കുക . നിങ്ങളോ ജനിച്ചു പോയി , അത് കൊണ്ട് ഒരു പങ്കാളിയെ കണ്ടെത്തി ഉള്ള സന്തോഷത്തോടെ ജീവിതം ജീവിച്ചു തീര്ക്കുക ! ശപിക്കപ്പെട്ട ഈ ഭൂമിയില് ഇനി കുഞ്ഞുങ്ങള് ജനിയ്ക്കാതിരിക്കട്ടെ !
NB: ഇത് 22ആം നൂറ്റാണ്ടിലെ ജനങ്ങളോടുള്ള ആഹ്വാനം മാത്രമാണ് . അവര് മനസ്സുണ്ടെങ്കില് അനുസരിക്കട്ടെ !
കിരണ് ഒരു വിയൊജിപ്പ്.
തലശേരി സന്ദേശഭവനില് മൂന്ന് വര്ഷം മുന്പ് ക്ലാസ്സ് കൂടിയവനാണ് ഞാന്. അവിടെ ഇത്ര കുട്ടികള് വരെ വേണം എന്ന് ആരും പറഞ്ഞതായി ഓര്ക്കുന്നില്ല. തളിപ്പറമ്പിലും അതേ വ്യക്തികള് തന്നെയാണല്ലൊ ക്ലാസ്സ് എടുക്കുന്നത്.
കിരാതാ ഞാന് മൂവാറ്റുപുഴയിലാണ്കോഴ്സ് കൂടിയത്. അതാകും വ്യത്യാസം.
ഈ ഇടയലേഖനത്തിന്റെ ചുവടുപിടിച്ച് മറ്റു മതക്കാരും ഈ മാതിരി പ്രഖ്യാപങ്ങള് നടത്തിയാലെന്താവും നമ്മുടെ നാടിന്റെ അവസ്ഥ.തങ്ങളുടെ മതത്തിന്റെ അംഗബലം കൂട്ടണമെന്ന് അവര്ക്കും ആഗ്രഹമുണ്ടാവില്ലേ. ജനപ്പെരുപ്പത്തെപറ്റി ആശങ്കപ്പെട്ട് സര്ക്കാര് ഇതിനെ ചോദ്യം ചെയ്താലോ..അതു പിന്നെ മതവിശ്വാസത്തിലുള്ള കൈകടത്തലായി...മതേതരത്വത്തിന്റെ കടയ്ക്കല് കത്തി വയ്ക്കലായി..വിശ്വാസികളെ അപമാനിക്കലായി..അങ്ങനെയങ്ങനെ പോകും..
ജീവന്റെ മൂല്യത്തെക്കുറിച്ച് വിശ്വാസികളെ ബോധവാന്മാരാക്കുന്നത് നല്ലതു തന്നെ. പക്ഷെ അത് നാമിപ്പോള് ജീവിക്കുന്ന സാഹചചര്യങ്ങള്ക്കുമനുസരിച്ചുള്ള ആഹ്വാനങ്ങളിലൂടെയാവണം.കാലത്തിനനുസരിച്ചുള്ള മാറ്റങ്ങള് വരുത്താന് മതങ്ങള് തയ്യാറാകേണ്ടതുണ്ട്.ജനങ്ങളുടെ നന്മയെക്കാളേറെ സഭയുടെ വളര്ച്ചയ്ക്ക് പ്രാധാന്യം കൊടുക്കുന്ന ഇത്തരം പ്രഖ്യാപനങ്ങള് അതര്ഹിക്കുന്ന പ്രാധാന്യത്തോടെ തന്നെ തള്ളിക്കളയണം എന്നാണ് എനിക്കു തോന്നുന്നത്.മനുഷ്യര് മതങ്ങള്ക്കു വേണ്ടിയല്ല; മതങ്ങള് മനുഷ്യര്ക്കു വേണ്ടിയാണ് നില കൊള്ളേണ്ടതെന്ന് പണ്ടു വിവരമുള്ളവര് പറഞ്ഞിട്ടുണ്ടല്ലോ.
അവനവന്റെ കുടുംബ പശ്ചാത്തലവും സാമ്പത്തിക ശേഷിയും നോക്കി ഉല്പാദിപ്പിക്കുക. അല്ലാതെ അംഗബലം കൂട്ടാന് സഭ പറയുന്ന കേട്ടു ഉല്പാദിപ്പിച്ചാല് കൊച്ചിനെ സഭ നോക്കൂല്ല. മത ഭ്രാന്ത് കൂടി വരുകയാണ് കാലം ചെല്ലുന്തോറും..കഷ്ടം !
ഈ പോസ്റ്റിനെ തുടര്ന്ന് ശ്രീ കെ.പി. സുകുമാരന് എഴുതിയ മറ്റൊരു പോസ്റ്റ് വായിക്കുക
ഒരു ഇടയലേഖനവും ചില ദാര്ശനിക ചിന്തകളും !
എന്തിനു വേണ്ടി അംഗബലം കൂട്ടുന്നു ?
കാ കാ എന്നു ഒച്ചയെടുക്കുമ്പോള് ഓടിക്കൂടി പിച്ചിചീന്താന്,ആ രക്തം പാനം ചെയ്യാന്!
ഏതു മതസ്ഥരും ആഹ്വാനം ചെയ്യുന്നതിന്റെ അര്ത്ഥം, പെണ്ണുങ്ങളെ നിങ്ങള് യന്ത്രങ്ങളാകൂ...ജനിക്കുന്ന കുട്ടികളെ നിങ്ങള് അപ്പത്തിനു വേണ്ടി കടിപിടി കൂടു...ജനിപ്പിച്ചവരെ പ്രാകൂ..വീടും കിടപ്പാടവുമില്ലാതെ ദുരിതമനുഭവിക്കൂ..
ഉണ്ണുന്നവര് അറിഞ്ഞില്ലെങ്കിലും വിളമ്പുന്നവന് അറിയണം...
കിരണ്,
ഞാന് സഭയെ കണ്ണൂമടച്ച് ന്യായീകരിക്കുകയാണെന്ന് ധരിക്കരുത്. വ്യക്തമായ കാരണങ്ങളുടെയും പഠനങ്ങളുടെയും അടിസ്ഥാനത്തിണ് എന്റെ അറിവില് സഭയുടെ ഔദ്യോഗിക പ്രബോധനങ്ങള് എല്ലാം തന്നെ. ഏതെങ്കിലും തരത്തിലുള്ള വര്ഗ്ഗീയ വിഘടനവാദങ്ങള് സഭയുടെ ഭാഗത്തുനിന്ന് ഉണ്ടായതായും അറിവില്ല. അതുകൊണ്ടുതന്നെ ഈ വിഷയത്തെ വികാരപരമായി സമീപിക്കേണ്ടതുണ്ടെന്നും തോന്നുന്നില്ല.
ജനസംഖ്യാവര്ദ്ധനവും അതുണ്ടാക്കുന്ന സാമൂഹികപ്രശ്നങ്ങളും പലതുണ്ട്. രണ്ടു കുട്ടികള് എന്ന രീതി അവലംബിച്ചാല് തന്നെ ജനസംഖ്യ വര്ദ്ധിക്കതിരിക്കില്ല. കാരണം ജനന മരണ നിരക്കിലെ വ്യത്യാസം തന്നെ. ഇതു ഞാന് നിഷേധിയ്ക്കുകയല്ല.
കിരണ് പറഞ്ഞതുപോലെ കുട്ടികളുടെ എണ്ണത്തെക്കുറിച്ച് സഭ ഒരു നിര്ദ്ദേശവും മുന്പോട്ടു വച്ചതായി അറിവില്ല. എന്നു തന്നെയല്ല അത് വ്യക്തികളുടെ സ്വാതന്ത്ര്യത്തില് പെടുന്ന കാര്യവുമാണ്.
നാലുകുട്ടികള് എന്ന ആശയം മുന്പോട്ടു വച്ചിട്ടൂണ്ടെങ്കില് അതിന് തീര്ച്ചയായി എന്തെങ്കിലും കാരണവും ഉണ്ടാവും. എന്തെങ്കിലും കാരണം പറഞ്ഞതായി കിരണ് ഓര്ക്കുന്നുണ്ടൊ?
എന്റെ അഭിപ്രായത്തില് ന്യൂക്ലിയസ് ഫാമിലികള് ഉയര്ത്തുന്ന സാമൂഹികവും മാനസികവുമായ പ്രശ്നങ്ങളാവാം അതിനു പിന്നില്. ന്യൂക്ലിയസ് ഫാമിലിയിലെ കുട്ടികള് സ്വാര്ത്ഥമതികള് ആവാന് സാധ്യതകൂടുതലാണ്. മാതാവും പിതാവും ജോലിക്കാരാണെങ്കില് കുട്ടികള്ക്ക് വേണ്ട പരിഗണന പലപ്പോഴും കിട്ടുന്നില്ല. വിഷാദരോഗങ്ങള് തുടങ്ങിയ മാനസികപ്രശ്നങ്ങള് ന്യൂക്ലിയസ് ഫാമിലിയില് കൂടിവരുന്നു. അതുപോലെതന്നെ വിവാഹമോചനങ്ങള് കൂടുതലായി സംഭവിയ്ക്കുന്നു. ആത്മഹത്യകള് വര്ദ്ധിയ്ക്കുന്നു. മാതാപിതാക്കള് അവരുടെ വാര്ദ്ധക്യത്തില് അനാഥരാവുന്നു. ഇത്തരം പ്രശ്നങ്ങളെ മുന്പില് കണ്ടുകൊണ്ടാവാം നാലുകുട്ടികള് എന്ന ആശയം മുന്പോട്ടു വയ്ക്കുന്നത്.
ജ്ജോജു വളരെ അധികം പോസിറ്റീവായി ചിന്തിച്ചാല് മാത്രമേ ജോജു പറയുന്ന ന്യായങ്ങളില് എത്താന് കഴിയൂ. ജോജു പറഞ്ഞ കാര്യങ്ങള്ത്തന്നേയാണ് മിനിമം 4 എന്നതിന് അന്ന് ആധാരമായി പറഞ്ഞത്. എന്നാല് 10 മക്കളുള്ള മാതാപിതാക്കള് പോലും വൃദ്ധമന്ദിരത്തിലോ ഏകാന്തവാസത്തിലോ ഉള്ളതായി നമുക്കറിയാം. അതേ പോലെ മാതാപിതാക്കളേക്കുറിച്ച് കൂടുതല് ബോധമുള്ള ന്യൂക്ലിയര് ഫാമിലിയിലെ കുട്ടികളെയും കാണാം. എന്റെ മിക്ക സുഹൃത്തുക്കളും അണുകുടുംബങ്ങളില് നിന്നാണ് അവരാരും മാതാപിതാക്കളെ കാണുന്നത് ഇപ്പോള് പറയപ്പെട്ടത് പോലെയല്ല.
എന്റെ ഒരു നിരീക്ഷണത്തില് ഫാമിലി വലുതായതുകൊണ്ട് ഉള്ളതിനെക്കാല് മെച്ചമുണ്ട് ചെറുതായാല് എന്നാണ് തോന്നിയിരിക്കുന്നത്. യഥാര്ത്ഥ പ്രശ്നങ്ങളെ പഠിക്കാതെ ഉള്ള ഇത്തരത്തിലുള്ള പഠിപ്പിക്കല് ഗുണത്തേക്കാള് ദോഷമേ ചെയ്യൂ. അണുകുടുമ്പങ്ങളില് ഉണ്ട് എന്ന് പ്രചരിപ്പിക്കപ്പെടുന്ന പ്രശ്നങ്ങള്ക്ക് 4 കുട്ടികളെ ഉണ്ടാക്കലാണോ പ്രതിവിധി.
N.J ജോജൂ said...
"ഞാന് സഭയെ കണ്ണൂമടച്ച് ന്യായീകരിക്കുകയാണെന്ന് ധരിക്കരുത്. വ്യക്തമായ കാരണങ്ങളുടെയും പഠനങ്ങളുടെയും അടിസ്ഥാനത്തിണ് എന്റെ അറിവില് സഭയുടെ ഔദ്യോഗിക പ്രബോധനങ്ങള് എല്ലാം തന്നെ".
ജോജൂ,
അങ്ങനെയെങ്കില് പരമപിതാവിന്(ദിവംഗതനായ ജോണ് പോള് രണ്ടാമന്) തന്നെ മൈനി കുള്പ്പ മൈനി കുള്പ്പ മൈനി മഗ്ന കുള്പ്പ(എന്റെ പിഴ,എന്റെ പിഴ,എന്റെ വലിയ പിഴ)എന്ന് സഭയുടെ പൂര്വ്വകാല ചെയ്തികളില് ചിലതിനെ കുറിച്ച് പറയേണ്ടി വന്നു?
ലോകത്ത് ഭ്രൂണഹത്യ നടക്കുന്നതിനെ എതിര്ത്ത് പറയാം,പെണ്ശിശുഹത്യയെപെറ്റി പറയാം,ബാലവേലകളെ കുറിച്ച് പറയാം,ഇതിലൊക്കെ മനുഷ്യത്വത്തിന്റെയും ദൈവികതയുടെയും സ്പര്ശമുണ്ട്.പക്ഷെ സ്വന്തം സമുദായത്തില് ആളു കുറയുന്നതിനെ കുറിച്ച് വേവലാതിപ്പെടുന്ന ബിഷപ്പിന്റെ ഇടയലേഖനവും പാര്ട്ടി പരിപാടിയില് പങ്കാളിത്തം കുറയുന്നതിനെ കുറിച്ചുള്ള സെക്രട്ടറിയുടെ സര്ക്കുലറും തമ്മില് എന്ത് വ്യത്യാസമാണുള്ളത്?
മാത്രമല്ല ഇത് institutionalised മതങ്ങളുടെ വേവലാതി മാത്രമല്ലേ?സ്ഥാപനവല്ക്കരണത്തിന്റെ സങ്കുചിത താല്പ്പര്യങ്ങളല്ലെ ഇത്തരം ചിന്താഗതിക്കാരെ ഭരിക്കുന്നത്?തപോവനങ്ങളും ആശ്രമങ്ങളും അരമനകളും കൊട്ടാരങ്ങളുമാകുമ്പോള് അവിടെ താമസിക്കുന്നവര്ക്കും അതിന്റേതായ പരിണാമങ്ങള് സംഭവിക്കാം.
ഓ.ടോ. അമേരിക്കന് മാവിനും വെണ്ണക്കും റൊട്ടിക്കുമുള്ള മതം മാറ്റാനുള്ള ശക്തി ചോര്ന്നു തുടങ്ങിയോ?കുമ്പസാരിച്ചും കുര്ബാന കൈകൊണ്ടും മാര്ഗ്ഗം കൂടിയ പറയന് ഇത്താപ്പിരിയെ കുറിച്ചുള്ള ഒരു കവിതയുണ്ട് വയലാറിന്റെ.ഒടുവില് ഇത്താപ്പിരിക്കും കൂട്ടര്ക്കും പ്രത്യേകം പള്ളി പണിതു കൊടുത്തു.ജാതിയൊട്ടു പോയുമില്ല,ഉള്ള സംവരണം പോകുകയും ചെയ്തു ഇത്താപ്പിരിമാരുടെ.
ഇത്താപ്പിരിക്കായാലും ബിഷപ്പിനായാലും പള്ളിയല്ല വലുത്,സ്വന്തം പള്ളയാണ്.ആമാശയത്തെക്കാള് വലുതായി എന്ത് ആശയമുണ്ട് ലോകത്ത്.
"ഇടയലേഖനങ്ങളെ രാഷ്ടീയക്കാരുടെ പത്രപ്രസ്ഥാവനകളുടെ നിലവാരത്തിലേയ്ക്ക് തരംതാഴ്ത്തി ചിന്തിക്കരുത്. കത്തോലിക്കാസഭ ഇത്തരം വിഷയങ്ങളില് പഠനങ്ങളും വിശകലനങ്ങളും നടത്തുന്നുണ്ട്. ഇത്തരം പഠനങ്ങളുടെ അടിസ്ഥാനത്തിലാണ് പല ലേഖനങ്ങളും. ബിക്ഷപ്പുമാര് പലവിഷയങ്ങളിലും പാണ്ഢിത്യമുള്ളവരുമാണ്".. ജോജു പറയുന്നു.
ജോജുവിന്റെ വിവരദോഷം അപാരം.അതുപോട്ടെ.
വക്കാരി പറഞ്ഞതാണ് ശരി. ജനസംഖ്യ കുറയുമ്പോള് സര്ക്കാരിന് നിര്ദ്ദേശങ്ങള് വെക്കാം. പരിഹാര മാര്ഗ്ഗങ്ങള് തേടാം.
ക്ര്സ്തീയ ഇടയന്മാര് (അത് തന്നെ എന്തൊരു അസംബന്ധമായ പ്രയോഗം..സാദാ ഭക്തന്മാര് ആടുമാടുകളാണെന്നോ?)മാത്രമല്ല, എല്ലാ മതങ്ങളിലെയും പൌരോഹിത്യവിഭാഗം ഉത്പ്പാദനം കൂട്ടാന് പ്രേരിപ്പിച്ചുകൊണ്ടിരിക്കുകയാണ്. ഇത്തരം പ്രചരണപരിപാടികളുടെ ഘോഷമാണ് ചുറ്റും കാണുന്നത്. അവനവന്റെ മത/സമുദായത്തിലെ പ്രത്യുത്പാദനം കൂട്ടണമെന്നുള്ള ഈ അശ്ലീലത്തില് നിന്ന് ഏറെയൊന്നും ദൂരമില്ല ethnic cleansing ന്റെ അയല്പക്കത്തേക്ക്.
മാരീചന്റെ മറുപടിതന്നെയാണ് ഇത്തരത്തിലുള്ള കാഴ്ച്ചപ്പാടുകള്ക്കുള്ള ശരിയായ് മറുപടി.
കിരണ് ഒടുവില് സൂചിപ്പിച്ച ചില ആശയങ്ങളോട് അനുകൂലിക്കുമ്പോള്ത്തന്നെ, വ്യക്തമായ ഒരു നിലപാടിന്റെ അഭാവവും ഈ ലേഖനത്തില് ദ്ര്ശ്യമാണ്.
നേരത്തേയാരോ പറഞ്ഞിട്ടുള്ളതാണ് എങ്കിലും ഒന്നുകൂടി പറയട്ടെ, കത്തോലിക്കാ അച്ചന്മാര് വിവാഹം കഴിക്കട്ടെ. അപ്പോള് പിന്നെ 10ഉം 20ഉം കുട്ടികള് ആവാമല്ലോ. കിരണ് അഞ്ചുവര്ഷം മുന്പ് സിസേറിയന് കഴിഞ്ഞ് ആശുപത്രി വിട്ടപ്പോഴേക്കും 25000 രൂപയാണ് മിഷന് ആശുപത്രിയില് അടച്ചത്. കിരണ് പറഞ്ഞതുപോലെ നല്ല ചികിത്സയായിരുന്നതുകൊണ്ട് സാരമില്ലെന്നുവച്ചു. ഒരു പ്രഷറും ഷുഗറും ഒന്നുമില്ലായിരുന്നു.
ജനസംഖ്യകൂടിയിട്ട് സര്ക്കാര് പറയുന്നു, നാം രണ്ട് നമുക്ക് ഒന്ന് എന്ന്. നാണമാവുന്നില്ലേ ഈ കത്തോലിക്ക ബിഷപ്പുമാര്ക്ക്, ബിന്ലാദനെപോലെ മതത്തിന്റെ പേരില് ജനസംഖ്യകൂട്ടാന് പറയാന്. എന്തും പറയാമല്ലോ, അവര്ക്കറിയില്ലല്ലോ കുഞ്ഞുങ്ങളെ വളര്ത്തുന്നതിനുള്ള ബുദ്ധിമുട്ടും ചിലവും.
അപ്പോള് ഒരു ചാവേര് പടയ്ക്കുള്ള ആളെയൊരുക്കുകയാണ് ബിഷപ്പുമാര്.
മതത്തിന്റെ മണമില്ലാത്ത ഒരു കേരളമിനിയുമുണ്ടാവുമോ?
രാധേയന്,
താങ്കള്ക്ക് സഭയോടുള്ള മനോഭാവം എനിക്കു നന്നായറിയാം. അതുകൊണ്ട് താങ്കളോട് എന്തെങ്കിലും ഈ വിഷയത്തില് പറഞ്ഞതുകൊണ്ട് കാര്യമുണ്ടെന്നു തോന്നുന്നില്ല. എങ്കിലും ചോദിച്ചതുകൊണ്ട് മാത്രം പറയുന്നു.
ബൈബിളിനെ അതിന്റെ വാച്യാര്ത്ഥത്തില് മാത്രമെടുത്ത് പഠിപ്പിക്കുന്ന രീതി കത്തോലിക്കാ സഭയില് ഉണ്ടായിരുന്നു. അന്ന് ഭൂമിയെ സൂര്യന് ചുറ്റുകയാണെന്നൊക്കെയുള്ള വാദങ്ങള് ഉണ്ടായിരുന്നത്. ദൈവം സൃഷ്ടിച്ചു എന്നതല്ലാതെ ഒരു ശാസ്ത്രീയ സിദ്ധാന്തങ്ങളെയും സഭ അംഗീകരിച്ചിരുന്നുമില്ല. ഇത്തരം വ്യാഖ്യാനരീതി തെറ്റാണ് എന്ന് സഭ അംഗീകരിച്ചിട്ടൂള്ളതാണ്. അക്കാലത്ത് സംഭവിച്ച തെറ്റുകളാണ് ജോണ് പോള് രണ്ടാമന് മാര്പ്പാപ്പ ഏറ്റുപറഞ്ഞത്.
ബൈബിളില് അബ്രാഹത്തിന്റെ കഥയ്ക്ക് മുന്പുള്ള ഭാഗങ്ങള്ക്ക് ഒരു കെട്ടൂകഥയുടെ സാംഗത്യമേ സഭ കൊടുക്കുന്നുള്ളൂ. ഉല്പത്തി പുസ്തകം രചിയ്ക്കുന്നത് മോശയാണെന്നാണ് സങ്കല്പം. മോശ അന്നു പ്രചാരത്തിലിരുന്ന ചില കഥകള് പുസ്തകത്തില് ഉള്പ്പെടുത്തിയതാകാം. അതായത് ആദമോ ആബേലോ നോഹയോ ഒന്നും ചരിത്രപുരുഷന്മാര് അല്ല എന്ന് സഭ പഠിപ്പിക്കുന്നു.
രാധേയന്,
സ്വന്തം സമുദായത്തില് ആളുകുറയുന്നതിന്റെ വേവലാതിയാണോ ബിഷപ്പിനെന്ന് ലേഖനം പൂര്ണ്ണമായി വായിച്ചാലല്ലേ പറയാനാവൂ. ഇപ്പറയുന്ന കിരണ് പോലും അതിനെക്കുറിച്ച് മംഗളത്തില് വന്ന വാര്ത്തയേ വായിച്ചിട്ടുള്ളൂ. കത്തോലിക്കാ സഭയുടെ അംഗസംഖ്യ കുറഞ്ഞിട്ടില്ല(കേരളത്തില്). നേരത്തെ 19.5 ആയിരുന്നത് 19 ശതമാനമായി എന്നതാണ് കണക്ക്.Institutionalised മതങ്ങള്ക്ക് അംഗസംഖ്യ ആനുപാതികമായി കുറയുന്നത് വേവലാതിയാണ്. ഈ വേവലാതിയാണോ ഇടയലേഖനത്തിനു പിന്നില് എന്നാണ് ചോദ്യം.
നിര്ബന്ധിതമതപരിവര്ത്തനമോ എന്തെങ്കിലും ആനുകൂല്യങ്ങള് വാഗ്ദാനം ചെയ്തുകൊണ്ടുള്ള മതപരിവര്ത്തനമോ സഭയുടെ അജണ്ടയിലില്ല. (ബ്രീട്ടിഷ് ഭരണത്തിന്റെ മറവില് ചിലര് അങ്ങനെ
നടത്തിയിട്ടൂണ്ടാവാം.)ദളിത് കത്തോലിക്കരെ പള്ളിക്കമ്മിറ്റികളിലും മറ്റും റിസര്വേഷന് നല്കി മുന്നിരയിലേയ്ക്ക് കൊണ്ടുവരുവാനുള്ള ശ്രമങ്ങള് നടക്കുന്നുണ്ട്. എങ്കിലും പലയിടത്തും അവര് രണ്ടാം തരക്കാരാവുന്നുണ്ട്. അത് പലപ്പോഴും വ്യക്തിപരവുമാണ്. അത് ഇല്ലാതാക്കാനുള്ള ശ്രമങ്ങള് സഭയുടെ ഭാഗത്തുനിന്നുണ്ടുതാനും. ബിഷപ്പ് ജോസഫ് പൌവത്തില് ഏതാനും വര്ഷങ്ങള്ക്കു മുന്പ് ഇതേക്കുറിച്ച് ഒരു ഇടയലേഖനം ഇറക്കിയിരുന്നു.(അതൊന്നും കാണാന് നമുക്കു താത്പര്യമില്ലല്ലോ.)
കിരണ്,
വിഷയത്തില് നിന്ന് വ്യതിചലിക്കേണ്ടിവന്നതില് ക്ഷമിക്കുക.
ശാലിനീ, ഒരു സംശയം.
കിരണ് കത്തൊലിക്കാ സഭയേക്കുറിച്ചൊ അല്ലെങ്കില് അച്ചന്മാരെക്കുറിച്ചൊ ഒരു പൊസ്റ്റിട്ടാല് അതിലെല്ലാം അമര്ഷത്തൊടെയുള്ള ശാലിനിയുടെ കമന്റുകള് കാണാം.
കത്തൊലിക്കരൊട് എന്തെങ്കിലും പൂര്വ്വ വൈരാഗ്യം??
ഇനി ഇടയലേഖനം പൂര്ണമായി വായിക്കാത്തതു കൊണ്ട് ചര്ച്ച വഴി തെറ്റേണ്ട. ദേ കിടക്കുന്നു പൂര്ണരൂപം. എല്ലാ മതസ്ഥരും ഇതുവായിക്കുക. ഉള്ക്കൊളളുക.
ഇടയലേഖനം
ദൈവപരിപാലനയാല് തൃശ്ശൂര് അതിരൂപതയുടെ മെത്രാപ്പോലീത്തയായ ഞാന് അതിരൂപതയിലെ വൈദികര്ക്കും സന്യസ്തര്ക്കുംദൈവജനം മുഴുവനും നമ്മുടെ കര്ത്താവീശോമിശിഹായുടെ കൃപയും സമാധാനവും നേരുന്നു.
യേശുവില് പ്രിയസഹോദരരേ, വത്സലമക്കളേ,
തൃശ്ശൂരിന്റെ മെത്രാപ്പോലീത്തയായശേഷം നിങ്ങളുടെ ആത്മീയപിതാവെന്ന നിലയില് ഞാന് നിങ്ങള്ക്കെഴുതുന്ന രണ്ടാമത്തെ ഇടയ ലേഖനമാണിത്. കുടുംബവര്ഷാചരണത്തിന്റെ തുടര്ച്ചയായി 2007മാര്ച്ച് 25 മുതല് 2008 മാര്ച്ച് 25 വരെ .ജീവന്റെ സമഗ്രപോഷണവ
ര്ഷ..മായി ആചരിക്കുവാന് കേരള കത്തോലിക്ക മെത്രാന്സമിതിയുടെ കീഴിലുള്ള ഫാമിലി കമ്മീഷന് ആഹ്വാനം ചെയ്തിരുന്നു.
ഇതോടനുബന്ധിച്ച് നമ്മുടെ അതിരൂപതയിലെ ഫാമിലി അപ്പസ്തോലേറ്റിന്റെ ആഭിമുഖ്യത്തില് പരിശുദ്ധ അമ്മയുടെ ജനനത്തിരുനാളായ സെപ്തംബര് 8-ാം തീയതി .ജീവന് രക്ഷാദിനമായി ആചരിക്കുന്നു. ഇത്തരുണത്തില് ജീവന്റെ മൂല്യത്തെക്കുറിച്ചും അതിനെ പരിപോഷിപ്പിക്കേണ്ടതിനെക്കുറിച്ചും നിങ്ങളെ ഉദ്ബോധിപ്പിക്കുവാന് ഞാന് ആഗ്രഹിക്കുകയാണ്.
കുടുംബം, മനുഷ്യജീവന് എന്നീ വിഷയങ്ങള്ക്ക് കൂടുതല് ഊന്നല് കൊടുക്കേണ്ടത് ആവശ്യമാണെന്ന് എന്റെ അജപാലനശുശ്രൂഷയുടെ ആരംഭത്തില്ത്തന്നെ എനിക്ക് ബോധ്യമായി
ട്ടുണ്ട്. മാനവവംശത്തിന്റെ നന്മ മുന്നില് കണ്ടുകൊണ്ട് ആധുനിക മാര്പ്പാപ്പമാര് ഏറ്റവും ശക്തമായി പഠിപ്പിച്ചിട്ടുള്ളതും ഈ വിഷയങ്ങളാണ്. പോള് ആറാമന് പാപ്പയുടെ `മനുഷ്യജീവന്', ജോണ് പോള് രണ്ടാമന് പാപ്പയുടെ `ജീവന്റെ സുവിശേഷം' എന്നീ ചാക്രികലേഖനങ്ങള് വിശ്വപ്രസിദ്ധങ്ങളാണല്ലോ.
ജീവന്റെ പ്രാധാന്യത്തെക്കുറിച്ചുള്ള ചിന്തകള്ക്കുമുമ്പേ മനുഷ്യജീവനെ കുറിച്ചുള്ള ഉത്കണ്ഠകളാണ് എന്നില് ആദ്യം ഉയര്ന്നുവരുന്നത്. ദൈവം മനുഷ്യനെ ഭരമേല്പിച്ച ഏറ്റവും വലിയ
സ്നേഹദാനമായ ജീവനോട് നിരുത്തരവാദപരമായ സമീപനങ്ങള് നമ്മുടെ സമൂഹത്തില് പ്രബലമായിക്കൊണ്ടിരിക്കുന്നു. പ്രയോജനവാദാനുകൂല നിലപാടുകളും അവ വരുത്തിവെക്കുന്ന മരണസംസ്കാരവും ഉയര്ത്തുന്ന വെല്ലുവിളികള് .ഭീതിപ്പെടുത്തുന്നവയാണ്.
സ്വന്തം സുഖസൗകര്യങ്ങള്ക്ക് ഉപയോഗപ്പെടാത്തവയെ തിരസ്കരിക്കുന്ന പ്രവണത കൂടി വരുന്നു. ഓരോ വ്യക്തിയും ഓരോ കുടുംബവും വ്യത്യസ്ത ദ്വീപുകളായി കഴിയുന്ന അവസ്ഥ ആഴപ്പെടുന്നു.
നിരാശരുടെ എണ്ണം ഏറി വരുന്നു. ധാര്മികത നഷ്ടപ്പെട്ട് പാപബോധമില്ലായ്മ മനുഷ്യമനസ്സുകളില് വേരുറയ്ക്കുന്നു. ലൈംഗികതയെക്കുറിച്ചുള്ള .ഭൗതികമായ കാഴ്ചപ്പാടുകളില് ദാമ്പത്യബന്ധത്തിന്റെ പവിത്രത ചോദ്യം ചെയ്യപ്പെടുന്നു. ജീവന്റെ സംസ്കാരം നല്കുന്ന ക്രിസ്തുവിന്റെ പ്രബോധനം തിരസ്കരിക്കുന്നവരില് മരണസംസ്കാരം വളരുന്നുവെന്നത് വേദനാജനകമാണ്. ഈ പശ്ചാത്തലത്തില് മനുഷ്യജീവന്റെ മൂല്യത്തെക്കുറിച്ചും അതിനെതിരെയുള്ള വെല്ലുവിളികളെക്കുറിച്ചും നാം ആഴത്തില് ചിന്തിക്കേണ്ടതുണ്ട്.
വ്യാപകമാകുന്ന മദ്യപാനം, മയക്കുമരുന്ന്, ലൈംഗികാക്രമണങ്ങള്, സ്ത്രീപീഡനം, വേശ്യാവൃത്തി, ഗുണ്ടായിസം, ധൂര്ത്ത്, ദൃശ്യശ്രാവ്യമാധ്യമങ്ങളിലെ അശ്ലീലത, ബാലപീഡ, പരിസ്ഥിതി മലിനീകര
ണം തുടങ്ങിയവ മരണസംസ്കാരത്തിലേക്കുള്ള പല കൈവഴികളാണ്. ഇവ മനുഷ്യനെക്കൊണ്ടെത്തിക്കുന്നത് ഗര്ഭഛിദ്രം, ദയാവധം, ആത്മഹത്യ, കൊലപാതകം തുടങ്ങിയ ഘോരതിന്മകളിലും എയ്ഡ്സ് തുടങ്ങിയ മാറാരോഗങ്ങളിലുമാണ്.
ഗര്ഭഛിദ്രം തെറ്റാണെന്ന് സഭയും ഇതരമതങ്ങളും പഠിപ്പിക്കുന്നു. രണ്ട് ലോകമഹായുദ്ധങ്ങളില് കൊല്ലപ്പെട്ടതിലധികം മനുഷ്യജീവന് അമ്മമാരുടെ ഉദരങ്ങളില് വെച്ച് വര്ഷംതോറും നശിപ്പിക്കപ്പെടുന്നു. ജനപ്പെരുപ്പം കാരണവും സാമ്പത്തിക സാമൂഹിക സുസ്ഥിതിയെപ്രതിയും ദമ്പതിമാരുടെ സ്വാതന്ത്ര്യത്തെപ്രതിയും ആണ്
പലരും ഗര്ഭഛിദ്രത്തെ അനുകൂലിക്കുന്നത്. ജീവനെതിരെയുള്ള ഈതിന്മയെ ഒരു കാരണംകൊണ്ടും ന്യായീകരിക്കാനാവില്ല. കേരളത്തില് മാത്രം പ്രതിദിനം നൂറുകണക്കിനു കുഞ്ഞുങ്ങളാണ് ഗര്ഭഛിദ്രത്തിലൂടെ കൊല്ലപ്പെടുന്നത് എന്നത് ഈ തിന്മയുടെ .ഭീകരത വെളിെപ്പടുത്തുന്നു. കഴിഞ്ഞ 50 വര്ഷത്തിനുള്ളില് കേരളത്തിലെ ക്രൈസ്തവരുടെ ജനസംഖ്യ 24 ശതമാനത്തില് നിന്ന് 19 ശതമാനമായി കുറഞ്ഞത് ഏവരുടേയും കണ്ണുതുറപ്പിക്കേണ്ടതാണ്. അതിനാല് അമ്മയുടെ ഉദരം ജീവന്റെ സംരക്ഷണത്തിനുവേണ്ടി ദൈവം നല്കിയ രക്ഷാപേടകമാണ് എന്ന തിരിച്ചറിവോടെ ഓരോ മനുഷ്യജീവനെയും വളര്ത്താന് മാതാപിതാക്കന്മാര് തയ്യാറാകണം.
വാര്ദ്ധക്യമോ രോഗമോ മനുഷ്യജീവന്റെ മാഹാത്മ്യം കുറയ്ക്കുന്നില്ല. അതിനാല് ദയാവധമല്ല, ദയാപൂര്വകമായ പരിപാലനമാണ് ജീവന്റെ നേര്ക്കുള്ള ശരിയായ സമീപനം. ഏതൊരു
മനുഷ്യജീവനും അതിന്റെ ഉത്ഭവനിമിഷം മുതല് സ്വാഭാവികാന്ത്യംവരെ ജീവിക്കാനുള്ള അവകാശം അഭംഗുരം പാലിക്കപ്പെടണം (ജീവന്റെ സുവിശേഷം ന.60). അതിനാല് സാധ്യമായ എല്ലാ മാര്ഗങ്ങളുമുപയോഗിച്ച് ജീവനെ പരിപാലിക്കണം. വൃദ്ധരും ശാരീരിക, മാനസികരോഗികളും കുടുംബം, സമൂഹം എന്നിവരുടെ ഉത്തരവാദിത്തത്തില് പരിചരിക്കപ്പെടുകയാണ് വേണ്ടത്. ജീവിതത്തിന്റെ ഭാഗമായ സഹനത്തെ സ്വീകരിക്കാനുള്ള താല്പര്യക്കുറവാണ് ആത്മഹത്യയിലേക്ക് നയിക്കുന്നത്. ഒറ്റപ്പെടല്, പരാജയങ്ങള്, കുടുംബപ്രശ്നങ്ങള്, സാമ്പത്തിക ബാധ്യതകള്, മാനഹാനി, മാനസികപ്രശ്നങ്ങള് തുടങ്ങിയവയാണ് ആത്മഹത്യയ്ക്കു പ്രേരി
പ്പിക്കുന്ന മുഖ്യഘടകങ്ങള്. ഇവയില് പലതും മനുഷ്യന് സ്വയംവരുത്തിവെക്കുന്നവയാണ്. ആത്മഹത്യ ദൈവികനിയമത്തിന് എതിരാണ്. ജീവന്റെ അധികാരി ദൈവമാണ്. ജീവന് നല്കുന്ന ദൈവത്തിനു മാത്രമെ ജീവനെ തിരിച്ചെടുക്കാനുള്ള അധികാരമുള്ളൂ. ആത്മഹത്യ പ്രകൃതിനിയമത്തിനും എതിരാണ്. പ്രകൃതിയിലേക്ക് ഒന്നുനോക്കൂ. സ്വന്തം ജീവനെ പക്ഷിമൃഗാദികള് നശിപ്പിക്കുന്നില്ലല്ലോ.മനുഷ്യനെ സംബന്ധിച്ചും ഇതു തന്നെയാണ് പ്രകൃതി നല്കുന്ന പാഠം. വിശ്വാസത്തിന്റെയും പ്രത്യാശയുടെയും വെളിച്ചത്തില് ജീവിതപ്രശ്നങ്ങളെ പരിഹരിക്കാന് സാധിക്കാത്തതാണ് മനുഷ്യനെ പലപ്പോഴും ആത്മഹത്യയിലേക്ക് നയിക്കുന്നത്. പ്രതിസന്ധികളില് ഉഴലുന്നവരെ സൗഹൃദത്തിലൂടെയും പ്രോത്സാഹനത്തിലൂടെയും സഹായങ്ങളിലൂടെയും പ്രാര്ത്ഥനയിലൂടെയും ആത്മഹത്യയില് നിന്ന് പിന്തിരിപ്പിക്കാന് സാധിക്കണം.
കൊലപാതകങ്ങളും ക്രൂരകൃത്യങ്ങളും ഇന്ന് ഏറെ വര്ദ്ധിച്ചിരിക്കുന്നു. ഇവ തൊഴിലാക്കിയവരുമുണ്ട് എന്നത് മനസാക്ഷിയെ ഞെട്ടിപ്പിക്കുന്നതാണ്. സമൂഹത്തില് വ്യാപകമായിക്കൊണ്ടിരിക്കുന്ന `ഗുണ്ടായിസം'ഈ തിന്മയുടെ വ്യാപ്തി വിളിച്ചറിയിക്കുന്നു. അസൂയ, സ്വാര്ത്ഥത, അത്യാഗ്രഹം, അധ്വാനിക്കാതെ പണമുണ്ടാക്കാനുള്ള വ്യഗ്രത, നീതിയുടെ അവഗണന എന്നിവയാണ് അക്രമങ്ങളിലേക്കും കൊലപാതകങ്ങളിലേക്കും പലപ്പോഴും നയിക്കുന്നത്. .കൊല്ലരുത്.
എന്ന ദൈവകല്പനയുടെ നഗ്നമായ ലംഘനമാണ് ഇതെല്ലാം. മരണസംസ്കാരത്തിന്റെ വളര്ച്ചയാണ് ഇത്തരം പ്രവണതകള് കാണിച്ചുതരുന്നത്.
മരണസംസ്കാരത്തിലേക്ക് നയിക്കുന്ന സാമൂഹിക സാഹചര്യങ്ങളും ഇന്ന് വളര്ന്നു- ക്കൊണ്ടിരിക്കുകയാണ്. ചെയ്യുന്നതെല്ലാം ലാഭത്തിനു വേണ്ടിയും പറയുന്നതെല്ലാം പരസ്യത്തിനു വേണ്ടിയും എന്ന നിലയിലേക്ക് സമൂഹം മാറുന്നു. സമ്പത്തിന്റെ ദുരുപയോഗം
പ്രത്യക്ഷമായും പരോക്ഷമായും സമൂഹത്തെ തിന്മയിലേക്കു നയിക്കുന്നു. സമ്പത്തു കൂടുതലുള്ളവര് ആഘോഷങ്ങളും ആഢംബരങ്ങളും വര്ദ്ധിപ്പിക്കുമ്പോള് മറ്റുപലരിലും അത് അന്ധമായ അനുകരണങ്ങള്ക്കും അസൂയയ്ക്കും കാരണമാകുന്നു. കവര്ച്ചകള്ക്കും കൊലപാതകങ്ങള്ക്കുംവരെ ഈ പ്രവണതകള് ഇടയാക്കുന്നുണ്ട്.
സ്വസഹോദരനായ ആബേലിനെതിരെ തന്റെ ഉള്ളില് കായേന് വളര്ത്തിയ അസൂയ അദ്ദേഹത്തെ കൊണ്ടെത്തിച്ചത് ജീവനുനേരെയുള്ള കയ്യേറ്റത്തിലാണ് എന്ന് വിശുദ്ധ ഗ്രന്ഥംതന്നെ സാക്ഷിക്കുന്നു.സമ്പത്തും സുഖസൗകര്യങ്ങളും പങ്കുവെയ്ക്കാനുള്ള വിമുഖതയാണ് മക്കളുടെ എണ്ണം കുറയ്ക്കാന് പലരേയും പ്രേരിപ്പിക്കുന്നത്. ജീവന്റെ സമൃദ്ധിയിലാണ് യഥാര്ത്ഥ അഭിവൃദ്ധി എന്ന് മനസ്സിലാക്കണം. ആഢംബരങ്ങളേക്കാള് ജീവന് മുന്ഗണന നല്കാന് തയ്യാറാകണം. സുഖസൗ
കര്യങ്ങള്, ഭവനങ്ങള്, ആഘോഷങ്ങള് എന്നിവ ഒരുക്കുന്നതില് മിതത്വം പാലിക്കാനും ആഢംബരങ്ങള്ക്കും ധൂര്ത്തിനും ഉപയോഗിക്കുന്ന ധനം ജീവന്റെ പോഷണത്തിനായി കുട്ടികള്, നിരാലംബര്, രോഗികള്, അനാഥര് എന്നിവര്ക്കു വേണ്ടി നീക്കിവെക്കാനും ഞാനാഹ്വാനം ചെയ്യുന്നു.
മേല്പ്രസ്താവിച്ച വസ്തുതകള് നമ്മുടെ സമൂഹത്തില് ജീവന്റെ സംസ്കാരം വളര്ത്തേണ്ടതിന്റെ ആവശ്യകത കൂടുതല് സ്പഷ്ടമാക്കുന്നു. അതിനുള്ള കൂട്ടായ ചിന്തകള്ക്കും പരിശ്രമങ്ങള്ക്കും നിങ്ങളേവരേയും ഞാന് ക്ഷണിക്കുകയാണ്.
ജീവിതത്തില് ലക്ഷ്യബോധം നഷ്ടപ്പെടുന്നതാണ് ജീവന്റെ സംസ്കാരത്തിന് പ്രധാന .ഭീഷണിയായിരിക്കുന്നത്. അതുകൊണ്ട് ജീവിതലക്ഷ്യത്തെക്കുറിച്ച് ക്രൈസ്തവവിശ്വാസത്തിലധിഷ്ഠിതമായ ഉത്തമബോധ്യം പകര്ന്നു കൊടുക്കാന് ഏവരെയും ഞാന് ഉദ്ബോധിപ്പിക്കുന്നു.
ജീവിക്കുന്നതെന്തിനാണ് എന്നചോദ്യത്തിനു ഇന്ന് മനുഷ്യന് നല്കുന്ന ഉത്തരം പലവിധത്തിലാകും. .സുഖിക്കാനായി ജനിച്ചവര്, സഹിക്കാനായി ജനിച്ചവര് . എന്നൊക്കെ ചിന്തിക്കുന്നവര്ക്ക് ആറടി
മണ്ണിനപ്പുറം ജീവിതമില്ല. ഈ ഭൂമിയില് കഴിയാവുന്നിടത്തോളം സുഖം തേടണമെന്നുള്ളവര്ക്ക് ധാര്മികതയും സനാതനമൂല്യങ്ങളും പ്രശ്നമല്ലപോലും. നിരീശ്വരവാദത്തിനു പിടിച്ചു നില്ക്കണമെങ്കില് മനുഷ്യനെ ജഡികതയിലും ഭൗതികതയിലും ഒതുക്കി നിറുത്തണം. അങ്ങനെ
യുള്ളവരുടെ ലക്ഷ്യം ഭൂമിയിലെ സ്വര്ഗം മാത്രമാണ്. എന്നാല്..പിതാവിന്റെ ഭവനത്തില്..- സ്വര്ഗ്ഗത്തില് എത്തിച്ചേരലാണ് യഥാര്ത്ഥ ലക്ഷ്യമെന്ന് യേശു വ്യക്തമാക്കി. ..വഴിയും സത്യവും
ജീവനുമായി.. (യോഹ. 14:6) വന്ന അവിടുന്ന് പുനരുത്ഥാനത്തിലേക്കാണ് മനുഷ്യനെ നയിക്കുന്നത്. യേശു പറഞ്ഞു: ..ഞാന് പോയി സ്ഥലമൊരുക്കിക്കഴിയുമ്പോള് നിങ്ങളേയും കൂട്ടിക്കൊണ്ടുപോകാന് വരും. ഞാന് ആയിരിക്കുന്നിടത്ത് നിങ്ങളും ആയിരിക്കും. (യോഹ.
14:3).
ഉല്പ്പത്തിവിവരണത്തിലൂടെ മനുഷ്യജീവനെക്കുറിച്ച് വിശുദ്ധഗ്രന്ഥം നല്കുന്ന പാഠം ജീവന്റെ ഉറവിടവും ലക്ഷ്യവും ദൈവമാണ് എന്നാണ്. മനുഷ്യനെ ദൈവം സൃഷ്ടിച്ച് സൃഷ്ടികളുടെ മകുടമായി നിയോഗിച്ചത് പ്രത്യേകവിധമാണ്. തന്റെ ജീവശ്വാസം പകര്ന്നുകൊടുത്താണ് അവന് ദൈവം ഉയിരേകിയത് (ഉല്പ. 2:7). ദൈവത്തിന്റെ ഛായയിലും സാദൃശ്യത്തിലുമാണ് മനുഷ്യന് സൃഷ്ടിക്കപ്പെട്ടത് (ഉല്പ. 1:26). പെരുകി വര്ദ്ധിക്കാനും ഭൂമിയെ കീഴടക്കാനുംവേണ്ടി സര്വ്വജീവജാലങ്ങളുടേയുംമേല് ദൈവം അവന് അധികാരവും നല്കി (ഉല്പ. 1:28). എന്നാല് മനുഷ്യനു ദൈവം നല്കിയഏറ്റവും വലിയ ദാനമായ ജീവനും സ്വാതന്ത്ര്യവും സ്വാര്ത്ഥതയാല്
മനുഷ്യന് നശിപ്പിച്ച ചരിത്രമാണ് പിന്നീട് കാണുക. ആദിമാതാപിതാക്കന്മാര് ദൈവഹിതത്തിന് എതിരുനിന്നപ്പോള് പാപവും മരണവും ലോകത്തിലേക്കു പ്രവേശിച്ചു.
നഷ്ടപ്പെട്ട പറുദീസയും നിത്യജീവനും തിരികെ നല്കി രക്ഷിക്കാന് ദൈവം മനുഷ്യനായതുതന്നെ മനുഷ്യജീവന് ദൈവം നല്കുന്ന പ്രാധാന്യത്തെ കൂടുതല് ബോധ്യപ്പെടുത്തുന്നു. രക്ഷകനായി യേശു
വന്നത് നമുക്ക് .ജീവനുണ്ടാകാനും അത് സമൃദ്ധമായി ഉണ്ടാകാനുമാണ്.(യോഹ. 10:10). മരണത്തെ മറികടക്കുന്ന ജീവന്റെ സംസ്കാരത്തിലേക്കാണ് യേശു മനുഷ്യനെ നയിക്കുന്നത്. അവിടുന്ന് പറഞ്ഞു:
..ഞാന് പുനരുത്ഥാനവും ജീവനുമാകുന്നു. എന്നില് വിശ്വസിക്കുന്നവന് ഒരിക്കലും മരിക്കുകയില്ല.. (യോഹ. 11:25). മനുഷ്യജീവനെഅമര്ത്യമാക്കുന്നതിന് .ജീവന്റെ അപ്പമായി (യോഹ. 6:35),. ജീവന്റെ വചനമായി (യോഹ. 6:63,68), .ജീവന്റെ പ്രകാശമായി (യോഹ. 8:12) ജീവജലമായി (യോഹ. 4:14) .ജീവാത്മാവായി (യോഹ.7:39; 16:7) യേശു തന്നെത്തന്നെ സഭയിലൂടെ ഇന്നും നല്കികൊണ്ടിരിക്കയാണ്. അതിനാല്, മരിക്കുന്നതിനുവേണ്ടിയല്ല, ജീവിക്കുന്നതിനു വേണ്ടിയാണ്
ദൈവം മനുഷ്യനെ സൃഷ്ടിച്ചത് (ജ്ഞാനം 1: 13-14; 2:23) എന്ന സത്യം ജീവനോടുള്ള നമ്മുടെ സമീപനങ്ങളെ ഭരിക്കുകയും നയിക്കുകയും വേണം.
വി.ഗ്രന്ഥം നമ്മെ പഠിപ്പിക്കുന്നു: .ഇതാ ഇന്നു ഞാന് നിന്റെ മുമ്പില് ജീവനും മരണവും നന്മയും തിന്മയും വച്ചിരിക്കുന്നു..... നീയും നിന്റെ സന്തതികളും ജീവിക്കേണ്ടതിനു ജീവന് തെരഞ്ഞെടുക്കുക. (നിയമ.30:15-19). ജറെമിയ പ്രവാചകനിലൂടെ ദൈവം പറയുന്നു: മാതാവിന്റെ ഉദരത്തില് നിനക്കു രൂപം നല്കുന്നതിനുമുന്പേ ഞാന് നിന്നെ അറിഞ്ഞു. ജനിക്കുന്നതിനുമുന്പേ ഞാന് നിന്നെ വിശുദ്ധീകരിച്ചു..
(ജെറ.1:4-5). അതിനാല് ദൈവത്തിനല്ലാതെ മറ്റാര്ക്കും ജീവനില് അധികാരമില്ല. മാതാപിതാക്കന്മാരും കുടുംബവും സമൂഹവും ജീവന്റെ ഉടമസ്ഥരല്ല, സൂക്ഷിപ്പുകാരും സംരക്ഷകരും പരിപോഷകരും മാത്രമാണ്. ഭ്രൂണാവസ്ഥയിലായാലും, മാറാരോഗമോ അംഗവൈകല്യമോ
ഉള്ളതായാലും ദൈവത്തിന്റെ ഛായയും സാദൃശ്യവും ഉള്ക്കൊള്ളുന്നതുകൊണ്ട് മനുഷ്യജീവന് അമൂല്യമാണ്. .കൊല്ലരുത്. എന്ന കല്പന നല്കി ജീവന്റെ സംരക്ഷണം ദൈവം ഉറപ്പുവരുത്തുന്നു (പുറ.20:14; നിയമാ. 5:17). ജീവന്റെ സുവിശേഷം പ്രസംഗിക്കുകയും ജീവിക്കുകയും ചെയ്യേണ്ട ശ്രീകോവിലാണ് കുടുംബം എന്ന് ദിവംഗതനായ പോള് ആറാമന് പാപ്പ `മനുഷ്യജീവന്' എന്ന ചാക്രികലേഖനത്തിലൂടെ നമ്മെ ഓര്മപ്പെടുത്തുന്നു.
പ്രിയ മാതാപിതാക്കന്മാരേ, നിങ്ങളെ പ്രത്യേകം ഞാനോര്മിപ്പിക്കുന്നു: ദമ്പതികള് പരസ്പരം നല്കുന്ന ദാനത്തിന് ദൈവം നല്കുന്ന അനുഗ്രഹമാണ് മക്കള്. ഓരോ ശിശുവും ദാനവും വാഗ്ദാനവും സാധ്യതയുമാണ്. ദൈവികപ്രവര്ത്തനങ്ങള്ക്ക് നിങ്ങള് അതിരുകല്പിക്ക
രുത്; എതിരു നില്ക്കുകയുമരുത്.
നമ്മുടെ സമൂഹത്തിന്റെ എല്ലാതലങ്ങളിലും വിശിഷ്യ കുടുംബം, കുടുംബകൂട്ടായ്മ, മതബോധനം, യുവജനം, ആതുരസേവനരംഗങ്ങള് എന്നീ തലങ്ങളില്, ജീവന്റെ സംസ്കാരം വളര്ത്തുന്നതിനുള്ള
പരിശ്രമങ്ങള് വിജയിപ്പിക്കണം. ദൈവഹിതത്തോടുള്ള വിധേയത്വമാണ് ജീവന്റെ സംസ്കാരം വളര്ത്തുന്നതിന്റെ അടിസ്ഥാനം. ദൈവഹിതം മനസ്സിലാക്കാനും പകര്ന്നുകൊടുക്കാനും ആഴമേറിയ പ്രാര്ത്ഥനാജീവിതത്തിന്റെ മൂലധനം ആവശ്യമാണ്. ദൈവാലയങ്ങളിലും സന്യാസ.ഭവനങ്ങളിലും കുടുംബങ്ങളിലും വ്യക്തിപരമായും പൊതുവായും ജീവസംരക്ഷണത്തിനുള്ള നിയോഗം വച്ച് പ്രാര്ത്ഥനകള് നടത്തണം. ഉപവാസം, മധ്യസ്ഥപ്രാര്ത്ഥനകള് എന്നിവ കൊണ്ട്
ജീവന്സംരക്ഷണ ശുശ്രൂഷകളെ സമ്പന്നമാക്കണം. 2007 സെപ്തംബര് 8-ാം തീയതി എല്ലാ ഇടവകകളിലും .ജീവന് രക്ഷാദിന.(Pro-Life Dayമായി ആചരിക്കുവാന് ഞാന് ആഹ്വാനം ചെയ്യുന്നു. ഇടവകകള് തോറും പ്രോ-ലൈഫ് യൂണിറ്റുകള് സ്ഥാപിച്ച് അംഗങ്ങളെ ചേര്ത്ത് ജീവന് രക്ഷാ പദ്ധതികള് ശക്തിപ്പെടുത്തണം. ഇടവകകള്, സ്ക്കൂളുകള്, ആശുപത്രികള്, പൊതുസ്ഥലങ്ങള് എന്നിവയെ ബന്ധിപ്പിച്ചുകൊണ്ടുള്ള ജീവന്രക്ഷാ ബോധവല്ക്കരണയാത്രകള് നടത്തണം. പഠനശിബിരങ്ങള്, പ്രദര്ശനങ്ങള്, സെമിനാറുകള് എന്നിവ സംഘടിപ്പിച്ച് ജനങ്ങള്ക്ക് കാര്യക്ഷമമായ ബോധവല്ക്കരണം നല്കണം. കൂടുതല് മക്കളുള്ള മാതാപിതാക്കന്മാരെ സഹായിക്കുകയും ആദരിക്കുകയും വേണം.
ജീവന്റെ സംസ്കാരം വളര്ത്താനുള്ള കടമയെ കുറിച്ച് ഒരിക്കല് കൂടി ഞാന് ഓര്മപ്പെടുത്തുന്നു. മാതാപിതാക്കന്മാര്, ആരോഗ്യപാലകര്, വിദ്യാഭ്യാസപ്രവര്ത്തകര്, വൈദികര്, സമര്പ്പിതര് എന്നിവര് ജീവനെ സവിശേഷമായ വിധം കൈകാര്യം ചെയ്യുന്നവരാണല്ലോ.
ആഴമേറിയ പ്രാര്ത്ഥനാജീവിതം, ഉത്തരവാദിത്വബോധം, ത്യാഗാരൂപി, ആത്മദാനം, സംലഭ്യത, ഐക്യദാര്ഢ്യം, മിതത്വം എന്നീ മൂല്യങ്ങളിലധിഷ്ഠിതമായ ജീവിതശൈലി നിങ്ങളുടെ പ്രവര്ത്തനങ്ങളെ അനുഗ്രഹദായകവും ഫലപ്രദവും ആക്കും. ആരോഗ്യപരിപാലനരംഗത്ത് വര്ത്തിക്കുന്ന ഡോക്ടര്മാരും നേഴ്സുമാരും ആശുപത്രി അധികൃതരും ജീവനെ ഒരിക്കലും നശിപ്പിക്കാതിരിക്കാന് അതീവ ശ്രദ്ധാലുക്കളായിരിക്കണം.
നമ്മുടെ അതിരൂപതയുടെ ഫാമിലി അപ്പോസ്തലേറ്റ് സെന്ററിന്റെ കീഴിലുള്ള കുടുംബകൂട്ടായ്മ, മാതൃസംഘം, പ്രോലൈഫ് മൂവ്മെന്റ് തുടങ്ങിയ പ്രസ്ഥാനങ്ങള് ജീവന്റെ മൂല്യം പ്രചരിപ്പിക്കാനും
ജീവനെതിരെയുള്ള വെല്ലുവിളികള് നേരിടുവാനും അനേകം പരിപാടികള് ആസൂത്രണം ചെയ്ത് നടപ്പിലാക്കിക്കൊണ്ടിരിക്കുകയാണ്.
അവരെയും ജീവന്റെ പോഷണത്തിനായി യത്നിക്കുന്ന സര്വ്വരേയും ഞാന് പ്രത്യേകം അഭിനന്ദിക്കുകയും ആശീര്വദിക്കുകയും ചെയ്യുന്നു. ഫാമിലി അപ്പോസ്തലേറ്റ് സെന്ററുമായി സഹകരിച്ച് ഇനിയും കൂടുതല്പേര് ജീവന്റെ ശുശ്രൂഷയ്ക്കായി കടന്നുവരട്ടെയെന്ന് ഞാന്
പ്രാര്ത്ഥിക്കുന്നു.
ജീവന് സമൃദ്ധമായി നല്കാന് വന്ന യേശുനാഥന്റെ വചനങ്ങള് നമ്മുടെ പ്രവര്ത്തനങ്ങള്ക്ക് മാര്ഗദീപമായിരിക്കട്ടെ. ജീവന്രക്ഷിക്കാനുള്ള എല്ലാ ഉദ്യമങ്ങളെയും ശുശ്രൂഷകളെയും നമുക്ക്
പ്രോത്സാഹിപ്പിക്കാം.
പിതാവിന്റെയും + പുത്രന്റെയും + പരിശുദ്ധാത്മാവിന്റെയും
+ നാമത്തില് നിങ്ങളേവരേയും ഞാന് ആശീര്വദിക്കുന്നു.
എന്ന്
സ്നേഹപൂര്വം,
മാര് ആന്ഡ്രൂസ് താഴത്ത്
തൃശ്ശൂര് അതിരൂപതാ മെത്രാപ്പോലീത്ത
രസകരമെന്നു തോന്നിയ ഒരു വിവരം കൂടി. കനപ്പിച്ചിരിക്കുന്ന ഭാഗം ഇരുത്തി വായിക്കുമല്ലോ
DECLARATION OF IPSO FACTO DISMISSAL
I, along with my Council, meeting on July 31, 2007, considered the proofs in the case of the ipso facto dismissal of Father Joy Kaidharath, O.SS.T., a member of Order of the Most HolyTrinity. Since the fact has been established that Father Kaidharath has defected notoriously from the Catholic faith by denouncing the faith and in particular the Body and Blood of the Lord publicaly and also the authority of the Church in the person of the Pope and his religious superiors, the fact of the dismissal is established juridically.
Therefore, I along with the Provincial Council, declare that FATHER JOY KAIDHARATH, O.SS.T. is in fact (ipso facto) dismissed from the Order of the Most HolyTrinity.
V. Rev.Victor Scocco, O.SS.T.
Minister Provincial
Given at Bristol, Pennsylvania,USA
on July 31, 2007
മാരീചന്, ഇടയലേഖനത്തിന്റെ പൂര്ണ്ണരൂപം ഇവിടെ ഇട്ടതിനു നന്ദി. കിരണ്, താങ്കള് പറഞ്ഞതുപോലെ ഒരു “ആഹ്വാനം” ഇതില് കാണുന്നില്ലല്ലോ.... ??
മാരീചാ,
ഇത്രയും ടൈപ്പ് ചെയ്തു കേറ്റിയതാണോ? അതോ കോപ്പീ പേസ്റ്റോ?
ഏതായാലും ഉദ്യമത്തിന് അഭിനന്ദനങ്ങള്
അഭിനന്ദനങ്ങള്ക്ക് പെരുത്ത നന്ദി. പക്ഷേ, കൊന്നാലും സീക്രട്ട് പറയില്ല ജോജുച്ചേട്ടാ......ഹി ഹി
ഇടയലേഖനത്തിന്റെ പൂര്ണ്ണ രൂപം വായിച്ചപ്പോള് താങ്കളുടെ ഈ പോസ്റ്റ് തെറ്റിദ്ധാരണ ഉണ്ടാക്കുന്നതാണ് എന്നു തോന്നുന്നു. മേലിലെങ്കിലും ശ്രദ്ധിക്കുക ഇത്തരം വിഷയങ്ങള് കൈകാര്യം ചെയ്യുമ്പോള്
ഇടയലേഖനത്തിന്റെ പൂര്ണ്ണരൂപത്തിന് മരീച നന്ദി. മംഗളം പത്രത്തില് വന്ന റിപ്പോര്ട്ടാണ് ഇതിന് കാരണം. തെറ്റിദ്ധാരണകള് ഉണ്ടാക്കിയതില് മാപ്പ് പറഞ്ഞ് താഴത്തിന്റെ ഇടയലേഖനം മരീചന്റെ സമ്മതത്തോടെ ഒരു പോസ്റ്റായി ഉടന് ഇടുന്നതാണ്.
ബിഷപ്പ് പറഞ്ഞത് എന്താണെന്ന് എല്ലാവര്ക്കും മനസിലായി കാണുമല്ലോ.
സുകുമാരേട്ടന്റെ ബ്ലോഗിലെ സാജന്റെ കമന്റിന്റെ പ്രസക്തഭാഗങ്ങള് ഇവിടെ ഞാന് ഇടുന്നു. കുടുംബവും കുട്ടികളും ഡിസ്റ്റേര്ബന്സായിക്കൊണ്ടിരിക്കുന്ന് ഒരു സമൂഹത്തെക്കുറിച്ച്.
SAJAN | സാജന് said...
“അതവിടെ നില്ക്കട്ടെ ,താങ്കളുടെ പോസ്റ്റിലേക്ക് വരാം ഇന്ന് യൂറോപ്പുള്പ്പെടെയുള്ള ആധുനിക സമൂഹത്തില് ഏറ്റവും കൂടുതല് അവഗണിക്കപ്പെടുന്നത് കുടുംബവും കുട്ടികളും ആണ്,
കൂടെ ജോലി ചെയ്യുന്ന / ചെയ്തിരുന്ന മിക്കപേരും വിവാഹം കഴിക്കാത്തവരാണ്, പക്ഷേ എല്ലാവര്ക്കും പാര്ട്ട്ണേഴ്സ് ഉണ്ട് പക്ഷേ ഭൂരിഭാഗത്തിനും കുട്ടികള് ഇല്ല, കുട്ടികള് വേണ്ടേ എന്നു ചോദിച്ചാല് ഏയ് അതൊക്കെ വലിയ ഡിസ്റ്റര്ബന്സ് ആണ്.
എന്നൊക്കെയാന് മിക്ക ആളുകളുടേയും മറുപടി, ഇത്തരം ആളുകളുടെ കൂടെ ഏറെ സഹകരിക്കേണ്ടി വന്നതില് നിന്നും എനിക്കു മനസ്സിലായത്, മിക്കവരുടേയും ഇപ്പോഴുള്ള പാര്ട്ട്ണേഴ്സ്, മൂന്നാമത്തേയോ നാലാമത്തേയോ ആയിരിക്കും!
പേഴ്സണല് കാര്യങ്ങളില് ഒക്കെ പരസ്പരം തലയിടാറില്ലത്ത ഒരു അഡ്ജസ്റ്റ്മെന്റാണ്, ഇവരുടെ ഒക്കെ ജീവിതം .
എല്ലായ്പ്പോഴും രണ്ടാള്ക്കും വ്യത്യസ്ത ബാങ്ക് അക്കൌണ്ട് ആയിരിക്കും ഏതെങ്കിലും കാരണ വശാല് റെസ്റ്റോറന്റിലോ മറ്റെവിടെയെങ്കിലും ബില് കൊടുക്കേണ്ടി വന്നാല് രണ്ടാളും ഷെയര് ചെയ്യും !ബെഡ് റൂം മാത്രം ഷെയര് ചെയ്യുന്ന ഒരു ജീവിതമാണ് ഇക്കൂട്ടരില് മിക്കവാറും കണ്ടു വരുന്നത്
ഏതെങ്കിലും ഒരു വിഷയത്തില് അഭിപ്രായ വ്യത്യാസം ഉണ്ടായാല് അതുകൊണ്ട് മിക്കപ്പോഴും ഓണ്ദ സ്പോട്ടില് പാക്ക് ചെയ്ത് ഒരാള് സ്ഥലം വിടും ഹാ !എത്ര മനോഹരമായ ജീവിതം , ബാധ്യതകളില്ലാത്ത പിന്നോട്ട് വലിക്കാന് ഉത്തരവാദിത്വങ്ങളില്ലാത്ത , പരാശ്രയമില്ലാത്ത സുഖം മാത്രം തേടിയലയുന്ന വലിയോരു സമൂഹം ഇന്ന് ലോകത്തില് വളര്ന്നു വരുന്നു, ഇവര്ക്കും ഇല്ല ദൈവവും , മതവും, കുടുംബവും സമൂഹവും ഒന്നും ഒന്നും!അബദ്ധത്തില് ഇത്തരം ചിലര്ക്ക് കുഞ്ഞുങ്ങള് ഉണ്ടായിട്ടുണ്ട് അങ്ങനെ ഉണ്ടാവുന്ന തലമുറയുടെ കാര്യം പറയാതിരിക്കുകയാണ് ഭേദം, പിഞ്ചുപ്രായ്ത്തില് തന്നെ മാതാവോ പിതാവോ ഒരാള് ഉപേക്ഷിക്കേണ്ടി വന്ന പുതിയ തലമുറ , (ഒന്നുണ്ട് ഈ രാജ്യങ്ങളില് എല്ലാം സിങ്കിള് പേരന്റിനു വലിയ ആനുകൂല്യങ്ങളാണ് ഗവണ്മെന്റ് നല്കുന്നത്,)
കുടുംബവും കുട്ടികളും വേണ്ടെന്നു വച്ചതുകൊണ്ടുണ്ടായ ഭീകരത പറയാതിരിക്കുകയാണ് ഭേദം കുടുംബം എന്ന ഇന്സ്റ്റിറ്റ്യൂഷന് നശിച്ചത് കൊണ്ടുണ്ടായ ധാര്മ്മിക ച്യുതി എന്നാണു ഇത്തരം ജീവിതങ്ങള് കണ്ടത് കൊണ്ട് എനിക്ക് തോന്നിയത്, ഒരു വിശാല അര്ത്ഥത്തില് ഇക്കാര്യം മനസ്സില് വച്ചായിരിക്കാം ഒരുപക്ഷേ ബിഷപ്പ് ഇക്കാര്യം പ്രസ്താവിച്ചത്????”
സമ്മതത്തിന്റെ കാര്യമൊന്നുമില്ല കിരണ്. സത്യത്തില് ഈ ഇടയലേഖനത്തെക്കുറിച്ച് അത്ര പൊല്ലാപ്പൊന്നുമുണ്ടാക്കേണ്ടതില്ല എന്നു തന്നെയാണ് തോന്നുന്നത്. പ്രസക്തമായ ഒട്ടേറെ കാര്യങ്ങള് സമൂഹത്തിന്റെ പരിഗണനയ്ക്ക് വയ്ക്കുന്നുണ്ട് ഈ ലേഖനം.
പിന്നെ ജനസംഖ്യാനുപാതത്തിന്റെ കാര്യം ഒന്നു സൂചിപ്പിക്കുന്നുവെന്നേ തോന്നുന്നുളളൂ. എന്നാല് എല്ലാ മതവിഭാഗങ്ങളും ഇത് അക്ഷരംപ്രതി അനുസരിച്ചാല് സംഗതി കുഴയുമെന്നത് മറ്റൊരു വശം.
പിന്നെ സംഘടിതമതങ്ങളും രാഷ്ട്രീയപ്രസ്ഥാനങ്ങളും അംഗബലത്തിലും അതിന്റെ പേരിലുളള വിലപേശല് കഴിവിലുമാണല്ലോ നിലനില്ക്കുന്നത്. ആ അര്ത്ഥത്തില് നോക്കുമ്പോള് താഴത്തു തിരുമേനിയല്ല മാര്പ്പാപ്പയാണെങ്കിലും ഇപ്രകാരമൊരു ഇടയലേഖനം ഇറക്കുന്നതില് തെറ്റില്ല. ആളുവില കല്ലുവില എന്നല്ലേ.
താഴത്തു തിരുമേനി ഉന്നയിക്കുന്ന മറ്റു പ്രശ്നങ്ങളെക്കുറിച്ച് ആഴത്തിലുള്ളൊരു ചര്ച്ച നടന്നുകാണാന് ആഗ്രഹമുണ്ട്. മതവും രാഷ്ട്രീയവും മാറ്റിവച്ചുളള ഒരു ചര്ച്ച.
അല്ല, സഭാധികാരത്തെ വെല്ലുവിളിച്ചെന്നോ മറ്റോ പറഞ്ഞ് ഒരു പിതാവിനെ സഭ പുറത്താക്കിയത് കണ്ടില്ലേ. എന്താണ് കാരണമെന്നറിയില്ല. അറിവുളളവരാരെങ്കിലുമുണ്ടെങ്കില് അതേക്കുറിച്ചൊന്നു വിശദീകരിച്ചാല് നന്നായിരുന്നു.
മരീച മാധ്യങ്ങളേയും ഇസ്റ്റിറ്റ്യുഷനുകളെയും വിമര്ശിക്കുന്ന പോസ്റ്റുകളാണ് ഞാന് ഇടാറുള്ളാത്. അതില് ശരിയുടെ അംശം കൂടുതല് വേണം എന്ന് എനിക്ക് നിര്ബന്ധമുണ്ട്. എന്റെ ഭാഗത്ത് നിന്ന് വന് പാളിച്ച്യുണ്ടായതായി ഇടയലേഖനം വായിക്കുമ്പോള് തോന്നി. ഒരു തര്ത്തിലുള്ള കുറ്റം ബോധം എന്നേ വേട്ടയാടി. അതിന് ഇതൊരു പ്രതിവിധിയാകില്ലാ എന്നറിയാം എങ്കിലും ഞാന് ഒരു പോസ്റ്റിട്ടിട്റ്റുണ്ട്. എല്ലാവരും വായിക്കണം
നന്ദി മാരീചന് , തെറ്റിദ്ധാരണ നീക്കാന് സാധിച്ചത് വലിയ കാര്യമാണ്, എന്റെ കമന്റെഴുതുമ്പോള് എനിക്ക് അത്ര പോലും ഉറപ്പില്ലായിരുന്നു, ബിഷപ്പ് ആ അര്ത്ഥത്തിലാണോ അങ്ങനെ ആഹ്വാനം ചെയ്തത് എന്ന്, പാശ്ചാത്യ രാജ്യത്തിലെ ജീവിതം കാണുകയും കേള്ക്കുകയും ചെയ്തിട്ടുണ്ടാവുന്ന ബിഷപ്പ് അങ്ങനെ ആയിരിക്കും എഴുതിയതെന്ന് ഞാന് ഊഹിച്ചെന്ന് മാത്രം!
കിരണിനെ കുറ്റം പറയാന് കഴിയുന്നില്ലാ, മംഗളത്തില് കണ്ടതാണെന്നല്ലേ എഴുതിയിരുന്നത്, എങ്കിലും ഹൈലി ഇന്ഫ്ലെയിമബള് ആയ വിഷയങ്ങള് കൈകാര്യം ചെയ്യുമ്പോള് കഴിയുന്നതും അന്വേഷിക്കുന്നത് നമുക്കെല്ലാവര്ക്കും നന്നായിരിക്കും എന്ന് തോന്നുന്നു!
കിരണ്, വെറുമൊരു പത്രവാര്ത്തയുടെ അടിസ്ഥാനത്തില് ഇത്തരം വിഷയങ്ങള് പോസ്റ്റായി അവതരിപ്പിക്കുമ്പോള് അല്പ്പം കൂടി ശ്രദ്ധിക്കുക എന്നൊരു അഭിപ്രായമുണ്ട്. ഇവിടെ ഏറ്റവും ആദ്യം ഞാനിട്ട കമന്റ് കിരണിന്റെ പോസ്റ്റിനെ മാത്രം ആധാരമാക്കിയായിരുന്നു. തെറ്റായി ആ ലേഖനം വ്യാഖ്യാനിക്കാനിടയായതില് ഖേദമുണ്ട്.
മാരീചന്, ഒരു പുരോഹിതനെ സഭയില്നിന്നു പുറത്താക്കണമെങ്കില് എന്തെങ്കിലും തക്കതായ കാരണം കാണും, ഒന്നുകില് ഈ സഭയുടെ വിശ്വാസ പ്രമാണങ്ങളെ പരസ്യമായി എതിര്ക്കുകയോ, മറ്റ് സഭകളിലെ വിശ്വാസങ്ങള്ക്കു പിന്പേ പോവുകയോ, സഭയ്ക്ക് മുഴുവന് മോശമായ രീതിയില് എന്തെങ്കിലും പ്രവര്ത്തിക്കുകയോ മറ്റൊ ചെയ്തുകാണണം.അതിന്റെ പിന്നിലുള്ള സംഭവങ്ങളെപ്പറ്റി അന്വേഷിച്ചതിനു ശേഷം പോരേ ഒരു ചര്ച്ച?
(വിഷയത്തോട് ബന്ധമില്ലെങ്കിലും)
സാജന്,
ഹൈലി ഇന്ഫ്ലെയിമബള് എന്ന പരാമര്ശത്തോട് വിയോജിപ്പുണ്ട്. ഒരു വിഷയത്തിലും സഭ വികാരപരമായ നിലപാടെടുത്തതായി ഞാന് കണ്ടിട്ടില്ല. ചില തെറ്റിദ്ധാരണകള് പരത്തി എന്നതില് കവിഞ്ഞ് പോസ്റ്റ് ഹൈലി ഇന്ഫ്ലെയിമബളോ വികാരം വൃണപ്പെടുത്തുന്നതോ ആയിരുന്നില്ല, ചില കമന്റ്റുകളില് ഉപയോഗിച്ച ഭാഷ കുറച്ചു മാന്യമാക്കാമായിരുന്നു എന്നതില് കവിഞ്ഞ്.
ദാവിചി കോഡ് സിനിമയെക്കുറിച്ച് ഞായറാഴ്ച അച്ചന് പ്രസംഗിച്ചത് ഓര്ക്കുന്നു. ഡാവിഞ്ചി കോഡ് ഒരു ഫാന്റസിയാണ്, ഫാന്റസിയ്ക്ക് ഫാന്റസിയുടെ പ്രാധാന്യമേ കൊടുക്കാവൂ. അല്ലാതെ അതിനെതിരെ പ്രതിഷേധം നടത്തേണ്ട ആവശ്യമൊന്നുമില്ലെന്ന്, വികാരം കൊള്ളേണ്ട ആവശ്യമില്ലെന്ന്.
ജോജു, ബ്ലോഗിലെ കാര്യം തന്നെയാണ് ഞാന് ഉദ്ദേശിച്ചത് , കേളന് കുലുങ്ങിയാലും പാലം കുലുങ്ങില്ല എന്നാണ് സഭയെ പറ്റി എന്റേയുമഭിപ്രായം ! അത് നമ്മള് ദിവസവും കാണുന്നതല്ലേ?(അത് നൂറു വട്ടം നല്ലത് തന്നെ)
ഇവിടെ സിഡ്നിയില് ഒരു ആര്ട്ട് എക്സിബിഷനില് ഒരു ഹോളോഗ്രാഫിക് ചിത്രം ക്രിസ്തുവും ലാദനും ആയി മാറി മറഞ്ഞിട്ട് ആരെങ്കിലും അറിഞ്ഞോ?
Post a Comment