Thursday, January 31, 2008

വീണ്ടും HMT ഭൂമി ഇടപാടിലേക്ക്‌

HMT ഭൂമി ഇടപാടില്‍ അപാകത ഉണ്ടോ എന്ന്‌ പരിശോധിക്കാന്‍ സര്‍ക്കാര്‍ ചീഫ്‌ സെക്രട്ടറി അധ്യക്ഷനായുള്ള അന്വേഷണ കമ്മീഷനെ നിയോഗിച്ചിരിക്കുന്നു എന്നതാണ്‌ ഈ വിഷയത്തിലേ ഏറ്റവും പുതിയ വാര്‍ത്ത. ഈ കമ്മിറ്റിയുടെ റിപ്പോര്‍ട്ടിനെ അടിസ്ഥാനപ്പെടുത്തിയാകും ഈ ഭൂമി HMT ക്ക്‌ വില്‍ക്കാന്‍ കഴിയുമോ എന്ന്‌ സര്‍ക്കാര്‍ കോടതിയില്‍ പറയുക.

കഴിഞ്ഞ ദിവസങ്ങളില്‍ എന്റ ഈ വിഷയത്തിലുള്ള പോസ്റ്റില്‍ പ്രധാനമായും ഉത്തരം കിട്ടാതിരുന്നത്‌ 2 ചോദ്യങ്ങള്‍ക്കായിരുന്നു.

1) ഈ ഭൂമി HMT ക്ക്‌ വില്‍ക്കാന്‍ അധികാരമുണ്ടോ. അതുപോലെ ഭൂമി വില്‍പ്പനയില്‍ എന്തെങ്കിലും അഴിമതിയുണ്ടോ

2) നിയമ വകുപ്പിന്റെ നിര്‍ദ്ദേശം മറികടന്ന്‌ എങ്ങനെ പോക്കുവരവ്‌ നടത്തി. അതില്‍ അഴിമതി ഉണ്ടോ.

ഈ രണ്ട്‌ വിഷയത്തിലും എന്തെങ്കിലും കിട്ടുമോ എന്നറിയാന്‍ നടത്തിയ ശ്രമത്തില്‍ കണ്ട ചില കാര്യങ്ങള്‍ എഴുതുന്നു.

നിയമ വകുപ്പിന്റെ നിര്‍ദ്ദേശം മറികടന്ന്‌ പോക്കുവരവ്‌ നടത്തിക്കൊടുത്തത്‌ റവന്യൂ വകുപ്പാണ്‌. ഇതില്‍ വ്യവസായ വകുപ്പിനും സമ്മതമായിരുന്നു. ജില്ലയിലെ റവന്യൂ വകുപ്പിന്റെ തലവന്‍ ജില്ല കലകടര്‍ മുഹമ്മദ്‌ ഹനീഷ്‌ സൈബര്‍ സിറ്റിയുടെ ഉല്‍ഘാടനത്തിന്റെ അന്ന്‌ പറഞ്ഞ കാര്യങ്ങള്‍ ദീപിക പത്രത്തിന്റെ English Edition നില്‍ ഇങ്ങനെ കണ്ടു

Ernakulam District Collector A P M Mohammad Hanish, however, said there was nothing illegal about the land deal as the HMT was given the land unconditionally in 2000. The company subsequently floated a global tender and sold 70 acres to HDIL in a public auction, he said.

എര്‍ണ്ണാകുളം ജില്ലാ കലക്ടരുടെ കീഴിലുള്ള ഉദ്യോഗസ്ഥരാണ്‌ പോക്കുവരവ്‌ നടത്തിക്കൊടുത്തത്‌. ഉല്‍ഘാടനത്തിന്റെ തലേ ദിവസമാണ്‌ ഈ ഭൂമി വില്‍ക്കാമോ എന്നതില്‍ തര്‍ക്കമുണ്ടായത്‌. അതുകൊണ്ടാണ്‌ VS ഇതില്‍ നിന്ന് വിട്ടു നിന്നത്‌. ഇത്രയും വിവാദമുണ്ടായിട്ടും എന്തുകൊണ്ട്‌ ജില്ല കലക്ടര്‍ ഇങ്ങനെ പറഞ്ഞു എന്നത്‌ സംശയം വര്‍ദ്ധിപ്പിക്കുന്നു. ഇത്‌ ശരിയാണോ എന്ന് നോക്കാന്‍ ദീപിക അടക്കമുള്ള മറ്റ്‌ മലയാള പത്രങ്ങളുടെ ആര്‍ക്കൈവ്‌സ്‌ നോക്കി. ഈ പ്രസ്താവന മാത്രം ഇല്ല. ചാനലുകളിലും ഇതിനെപ്പറ്റി ഒന്നും കണ്ടില്ല. ആരും ജില്ലാ കലക്ടരോട്‌ എന്ത്‌ അടിസ്ഥാനന്ത്തിലാണ്‌ ഈ പ്രസ്താവന വന്നതെന്നും ചോദിച്ച്‌ കണ്ടില്ല. മാതൃഭൂമിയുടെ ജനുവരി 26 ഇലെ റിപ്പോര്‍ട്ടുമായി നാം ഇത്‌ കൂട്ടിവായിക്കുമ്പോള്‍ ജില്ല കലകടര്‍ക്കും റവന്യൂ വകുപ്പിനും ഈ ഭൂമി വില്‍ക്കാന്‍ കഴിയുന്നതാണ്‌ എന്ന അഭിപ്രായമാണ്‌ എന്ന് കരുതണം.എര്‍ണ്ണാകുളം ജില കലക്‌ട്രേറ്റിലെ രേഖകള്‍ പരിശോധിച്ച്‌ റവന്യൂ വകുപ്പ്‌ നല്‍കിയ റിപ്പോര്‍ട്ട്‌ എന്ന പേരില്‍ വന്ന് വാര്‍ത്ത മാതൃഭൂമി പത്രം റിപ്പോട്ട്‌ ചെയ്യുന്നു.

സൈബര്‍ സിറ്റി സ്ഥാപിക്കുന്നതിനായി ബ്ലൂസ്റ്റാര്‍ റിയല്‍റ്റേഴ്സിന് വിറ്റ ഭൂമിയില്‍ എച്ച്.എം.ടി.ക്ക് പൂര്‍ണാധികാരമുണ്ടെന്ന് റവന്യൂ വകുപ്പ്. അനന്തരാവകാശികള്‍ക്ക് കൈമാറാവുന്നതും കൈമാറ്റം ചെയ്യപ്പെടാവുന്നതുമായ അധികാരം നല്‍കിയാണ് വില്പനയെ തുടര്‍ന്ന് വിവാദമായ 70 ഏക്കര്‍ ഉള്‍പ്പടെ 100 ഏക്കര്‍ സംസ്ഥാന സര്‍ക്കാര്‍ എച്ച്.എം.ടി.ക്ക് നല്‍കിയതെന്ന് റവന്യൂ വകുപ്പ് തയ്യാറാക്കിയ കുറിപ്പില്‍ പറയുന്നു.എച്ച്.എം.ടി.ക്ക് നല്‍കിയ 1972ല്‍ 868.28 ഏക്കര്‍ ഭൂമി രജിസ്റ്റര്‍ ചെയ്ത് നല്‍കിയതുതന്നെ ഹെറിറ്റബിള്‍ ആന്‍ഡ് അലീനിയബിള്‍ റൈറ്റ് വകവെച്ചാണ്. 1990ല്‍ ആവശ്യം കഴിഞ്ഞുകിടക്കുന്ന ഭൂമി തിരിച്ചെടുക്കാന്‍ സര്‍ക്കാര്‍ ശ്രമിക്കുന്നതുവരെ എച്ച്.എം.ടി. ഈ അവകാശം വിനിയോഗിച്ചു. ഇതിനുപുറമെ 1991ല്‍ സംസ്ഥാന സര്‍ക്കാരുണ്ടാക്കിയ ധാരണ പ്രകാരം 300 ഏക്കര്‍ സര്‍ക്കാര്‍ ഏറ്റെടുക്കുകയും 100 ഏക്കര്‍ എച്ച്.എം.ടി.ക്ക് നിബന്ധനകള്‍ക്ക് വിധേയമായിട്ടല്ലാതെ നല്‍കുകയും ചെയ്തു. കേരള ഭൂപരിഷ്കരണ നിയമം 81_ാം വകുപ്പ് പ്രകാരം കേന്ദ്ര സര്‍ക്കാര്‍ കമ്പനി എന്ന നിലയ്ക്ക് ഭൂമി വിനിയോഗത്തിനുള്ള ഒഴിവുകളോടെയാണ് ഈ 100 ഏക്കര്‍ സ്ഥലം നല്‍കിയത്. ഈ സാഹചര്യത്തില്‍ കമ്പനിയുടെ മെമ്മോറാണ്ടം ആന്‍ഡ് ആര്‍ട്ടിക്കിള്‍സ് ഓഫ് അസോസിയേഷന്‍ അനുസരിച്ചും കേന്ദ്ര സര്‍ക്കാരിന്റെ നിര്‍ദ്ദേശങ്ങള്‍ക്കനുസൃതമായും കമ്പനിക്ക് 100 ഏക്കര്‍ ഭൂമി കൈകാര്യം ചെയ്യാം. കൂടാതെ ഈ വസ്തു മിച്ചഭൂമി കേസില്‍ ഉള്‍പ്പെട്ടിട്ടുമില്ല. കേന്ദ്ര സര്‍ക്കാരിന്റെ നിര്‍ദ്ദേശങ്ങള്‍ പാലിച്ചാണോ കമ്പനി ഭൂമി വിറ്റത് എന്ന് പരിശോധിക്കേണ്ടത് കേന്ദ്രാധികൃതരാണ്.

ഈ വിഷയത്തില്‍ ഇത്രയും ദിവസം മൗനം പാലിച്ച ദേശാഭുമാനി ഇന്ന് വിശദീകരണങ്ങളുമായി രംഗത്ത്‌ വന്നിട്ടുണ്ട്‌. അതിലെ ഒരു ഭാഗം വായിക്കുക
എച്ച്എംടിയില്‍ നിന്ന് ഭൂമി തിരിച്ചുപിടിക്കാന്‍ നിയമവകുപ്പ് ശുപാര്‍ശ നല്‍കിയിട്ടും വ്യവസായ വകുപ്പ് നിരസിച്ചെന്ന പ്രചാരണവും മാധ്യമങ്ങള്‍ അഴിച്ചുവിട്ടിട്ടുണ്ട്. വ്യവസായവകുപ്പ് ഇതു നിരസിച്ചിട്ടില്ല. എന്നാല്‍ എച്ച്എംടിയുടെ ഭൂമി വില്‍ക്കാനോ കൈമാറാനോ ഉള്ള സര്‍വ അവകാശങ്ങളും നല്‍കി 1972ല്‍ സര്‍ക്കാര്‍ പുറപ്പെടുവിച്ച ഉത്തരവ് നിയമവകുപ്പ് പരിഗണിച്ചിട്ടില്ലെന്നാണ് സൂചന.

ഇന്നലെ ചാനല്‍ ചര്‍ച്ചകളില്‍ പങ്കെടുത്ത മുന്‍ ചീഫ്‌ സെക്രട്ടറി റ്റി.എന്‍. ജയചന്ദ്രന്‍ പറയുന്നത്‌ പ്രഥമ ദൃഷ്ടിയാല്‍ ഈ ഭൂമി വില്‍ക്കുന്നതില്‍ HMT ക്ക്‌ ഒരു തടസവും ഇല്ല എന്നാണ്‌.ഇനി അങ്ങനെ എന്തെങ്കിലും ഉണ്ടെങ്കില്‍ ചീഫ്‌ സെക്രട്ടറിയുടെ അന്വേഷണം അത്‌ പുറത്തുകൊണ്ടുവരും എന്ന് മുന്‍ അഡീ: ചീഫ്‌ സെക്രട്ടറി ബാബൂ പോളും പറഞ്ഞു. നിയമ വകുപ്പിന്റെ നിര്‍ദ്ദേശം മറികടന്നതിനേപ്പറ്റി ബാബൂ പോളിന്റെ വിശദീകരണം അദ്ദേഹം തന്നെ പലപ്പോഴും അങ്ങനെ ചെയ്തിട്ടുട്‌ എന്നതായിരുന്നു. ഏന്തായലും ഒരാഴചക്കുള്ളില്‍ ഇതിനൊരു തീരുമാനം ആകും എന്ന് ഉറപ്പായിട്ടുണ്ട്‌.

എന്നാല്‍ ഇന്നലെ ചര്‍ച്ചയില്‍ പങ്കെടുത്ത P.K. പ്രകാശ്‌ മാധ്യമം ലേഖകന്‍ ഒരു പ്രധാനപ്പെട്ട കാര്യം ചൂണ്ടിക്കാട്ടി. ഈ 100 ഏക്കര്‍ ഭൂമി വില്‍ക്കാന്‍ അനുവാദമുള്ളതാണെങ്കില്‍ അതിന്റെ ഉത്തരവാദിത്തം നയനാര്‍ ഗവണ്മെന്റിനാണ എന്നാണ്‌ പ്രകാശ്‌ പറയുന്നത്‌. 400 ഏക്കര്‍ ഏറ്റെടുക്കലിനെതിരെ കേസുകൊടുത്ത HMT യുമായി 100 ഏക്കര്‍ പൂര്‍ണ്ണ അവകാശത്തോടെ കോടതിക്ക്‌ പുറത്ത്‌ തീര്‍പ്പുണ്ടാക്കിയത്‌ നയനാര്‍ സര്‍ക്കാരാണ്‌ .

ഇനി HMT യുടെ ഭൂമി ഇടപാടിലേക്ക്‌ വരാം. HMT ഈ ഭൂമി വിറ്റത്‌ പരസ്യം ചെയ്താണ്‌ എന്നും അതിലൂടെയാണ്‌ ബ്ലൂസ്റ്റാറുകാര്‍ സ്വന്തമാക്കിയതെന്നുമാണ്‌ നമ്മള്‍ മനസ്സിലാക്കിയത്‌. എന്നാല്‍ HMT യുടെ കളമശ്ശേരി ഭൂമി വില്‍പ്പന പരമാവധി രഹസ്യമാക്കി വയ്ക്കാന്‍ HMT ശ്രമിച്ചിരുന്നു അത്രെ. ഈ വിഷയത്തിലെക്ക്‌ വെളിച്ചം വീശുന്ന ഒരു ലേഖനം ദാറ്റ്‌സ്‌മലയാളം പോര്‍ട്ടലില്‍ കാണാം.ഇത്‌ വായിക്കുപോള്‍ HMT ഭൂമി ഇടപാടിലെ ദുരൂഹതകള്‍ ഏറും.

ഇതിനേപ്പറ്റിയുള്ള ലേഖനം ഇവിടെ വായിക്കുക

19 comments:

കിരണ്‍ തോമസ് തോമ്പില്‍ said...

HMT ഭൂമി ഇടപാടില്‍ അപാകത ഉണ്ടോ എന്ന്‌ പരിശോധിക്കാന്‍ സര്‍ക്കാര്‍ ചീഫ്‌ സെക്രട്ടറി അധ്യക്ഷനായുള്ള അന്വേഷണ കമ്മീഷനെ നിയോഗിച്ചിരിക്കുന്നു എന്നതാണ്‌ ഈ വിഷയത്തിലേ ഏറ്റവും പുതിയ വാര്‍ത്ത. ഈ കമ്മിറ്റിയുടെ റിപ്പോര്‍ട്ടിനെ അടിസ്ഥാനപ്പെടുത്തിയാകും ഈ ഭൂമി HMT ക്ക്‌ വില്‍ക്കാന്‍ കഴിയുമോ എന്ന്‌ സര്‍ക്കാര്‍ കോടതിയില്‍ പറയുക.

N.J ജോജൂ said...

കിരണ്‍,

"ഇതേ തുടര്‍ന്ന് ആന്റണി സര്‍ക്കാര്‍ '95 ല്‍ 400 ഏക്കര്‍ ഭൂമി ഏറ്റെടുത്തു. 350 ഏക്കര്‍ കിന്‍ഫ്രക്ക് കൈമാറാനും 50 ഏക്കര്‍ ഹൌസിംഗ് ബോര്‍ഡിന് നല്‍കാനും തീരുമാനിച്ചു. ഇതിനെതിരെ എച്ച്.എം.ടി ഹൈക്കോടതിയെ സമീപിച്ചു. സര്‍ക്കാറും എച്ച്.എം.ടിയും വീണ്ടും ചര്‍ച്ച നടത്തി. 100 ഏക്കര്‍ എച്ച്.എം.ടിക്ക് വ്യവസായ വികസനത്തിന് വിട്ടുനല്‍കി. 300 ഏക്കര്‍ സര്‍ക്കാര്‍ ഏറ്റെടുത്തു. ഇതില്‍ 240 ഏക്കര്‍ കിന്‍ഫ്രക്ക് കൈമാറി. 2002ല്‍ 251 ഏക്കര്‍കൂടി മിച്ചഭൂമിയായി ആന്റണി സര്‍ക്കാര്‍ എച്ച്.എം.ടിയില്‍ നിന്ന് ഏറ്റെടുത്തു. ഇതുസംബന്ധിച്ച് കേസ് ഹൈക്കോടതിയില്‍ നടന്നുവരുന്നു. ആന്റണി സര്‍ക്കാര്‍ മിച്ചഭൂമിയായി ആകെ ഏറ്റെടുത്ത 651 ഏക്കറില്‍ 100 ഏക്കര്‍ എച്ച്.എം.ടിക്കുതന്നെ നല്‍കിയതില്‍ 70 ഏക്കറാണ് ബ്ലൂസ്റ്റാര്‍ റിയല്‍റ്റേഴ്സിന് വില്‍പന നടത്തിയിരിക്കുന്നത്. "

ഈ 100 ഏക്കര്‍ ഭൂമി വിലയ്ക്കാണോ നല്‍കിയത് അതോ സൌജന്യമായി നല്‍കുകയായിരുന്നോ?

എന്റെ അഭിപ്രായത്തില്‍ സര്‍ക്കാര്‍ സൌജന്യമായി നല്‍കിയഭൂമി എന്തുന്യായം പറഞ്ഞാണെങ്കിലും വില്‍ക്കുന്നത് ശരിയല്ല, വില്‍ക്കുന്നെങ്കില്‍ ആ പണം സര്‍ക്കാരിനു വേണം ലഭിയ്ക്കാന്‍.

അല്ല, വിലയ്ക്കാണ് HMT യ്ക്ക് നല്‍കിയതെങ്കില്‍ അവിടെ എന്തു ചെയ്യണമെന്നു തീരുമാനിയ്ക്കുന്നതിന്റെ അവകാശം HMT യ്ക്ക് ആണ്.

കിരണ്‍ തോമസ് തോമ്പില്‍ said...

ജോജൂ പറഞ്ഞതാണ്‌ ന്യായമാണ്‌. സര്‍ക്കാര്‍ പൊന്നും വിലക്ക്‌ ഏറ്റെടുത്ത ഭൂമിക്ക്‌ HMT എന്തെങ്കിലും വില നില്‍കിയിട്ടുണ്ടോ എന്ന കാര്യത്തില്‍ ഉറപ്പില്ല. അങ്ങനെ ഉണ്ടാകാന്‍ വഴിയില്ല എന്നാണ്‌ എന്റ വിലയിരുത്തല. HMT വില നല്‍കിയിരുന്നു എങ്കില്‍ 400 ഏക്കര്‍ സര്‍ക്കാരിന്‌ ഏറ്റെടുക്കാന്‍ ശ്രമിക്കാന്‍ കഴിയില്ലായിരുന്നു. അപ്പോള്‍ അങ്ങനെ അല്ല എന്നു വേണം കരുതാന്‍.

ഇനി HMT ക്ക്‌ 72 ഇല്‍ മൊത്തം ഭൂമിയില്‍ പൂര്‍ണ്ണ അധികാരം നല്‍കിയത്രെ. അതായത്‌ വില്‍ക്കാനും കൈമാറ്റം ചെയ്യാനുമുള്‍പ്പെടെ. ഇത്‌ പറയുന്നത്‌ ദേശാഭിമാനി മാത്രമാണ്‌ എങ്കിലും ഇതേ വാദം ഇന്നലെ T.N. ജയചന്ദ്രനും പറയുന്നത്‌ കേട്ടൂ. അപ്പോള്‍ കോടതിക്ക്‌ പുറത്ത്‌ നയനാര്‍ സര്‍ക്കാര്‍ ഉണ്ടാക്കിയ തീര്‍പ്പ്‌ എന്ത്‌ എന്നതില്‍ മാത്രമേ ഇനി കൃത്യത വരാനുള്ളൂ. അതില്‍ 72 ഇലെ ഈ അവകാശം നിലനിര്‍ത്തിയാണ്‌ നല്‍കിയതെങ്കില്‍ സര്‍ക്കാര്‍ ഭൂമി HMT ക്ക്‌ സ്വന്തം നിയമപരമായി അവരുടെ വിറ്റ പണം അവരുടെ സ്വന്തം. പോതുമേഖല സ്ഥാപനങ്ങള്‍ സര്‍ക്കാരിന്റെയാണ്‌ എന്നാണല്ലോ വെപ്പ്‌ അപ്പോള്‍ അവരുടെ പണം സര്‍ക്കാരിന്റെ പണം എന്നൊക്കെപ്പറഞ്ഞ്‌ നമുക്കാശ്വസിക്കാം.

ശാലിനി said...

കിരണ്‍ പോസ്റ്റുകളെല്ലാം വായിക്കുന്നുണ്ട് എത്ര തിരക്കാണെങ്കിലും.

അഭിപ്രായം പറയുള്ള വിവരം ഇല്ലാത്തതിനാല്‍ കമന്റിടാറില്ല.

Radheyan said...

ശരിക്കും കള്ളക്കളി എന്തെങ്കിലും നടന്നിട്ടുണ്ടെങ്കില്‍ അത് നടന്നിരിക്കുന്നത് HMT എന്ന കേന്ദ്രസ്ഥാപനത്തിലല്ലേ?.

ഹെറിറ്റബിള്‍ ആന്‍ഡ് അലീനിയബിള്‍ റൈറ്റ് എന്ന് വെച്ചാല്‍ കൈവശം വെയ്ക്കാനും കൈമാറ്റം ചെയ്യാനും അധികാരമുള്ള ഭൂമി എന്നല്ലേ അര്‍ത്ഥം.1972ല്‍ അങ്ങനെ കൊടുത്തതില്‍ തെറ്റ് പറയാനാകില്ല.അന്ന് ഹെറിറ്റബിള്‍ ആന്‍ഡ് അലീനിയബിള്‍ റൈറ്റ് HMT എന്ന വലിയ സ്ഥാപനം വരട്ടെ എന്നേ കരുതി കാണൂ.ഇന്നത്തെ പോലെ സ്ഥലം പൊന്നിനെക്കാള്‍ വിലപിടിച്ച ഒരു കാലവുമല്ല.

എന്റെ അറിവില്‍ പരമാവധി ഭൂമി അന്യാധീനപ്പെടാതിരിക്കാണ്‍ സംസ്ഥാന സര്‍ക്കാരുകള്‍ പിന്നീട് വേണ്ടത് ചെയ്തു,ആകെ ഫ്രീഹോള്‍ഡായി HMTക്ക് കിട്ടിയത് 100 ഏക്കറാണ്.അതിലെ പോക്കുവരവ് താല്‍ക്കാലികമായി തടഞ്ഞത് തൊഴിലാളികള്‍ളുടെ ആവശ്യപ്രകാരമായിരുന്നു.അവര്‍ക്ക് 30ഏക്കര്‍ വിട്ടു നല്‍കിയപ്പോള്‍ ബാക്കി സ്ഥലത്ത് പോക്കുവരവ് അനുവദിച്ചു.

പോക്കുവരവ് എക്കാലത്തേക്കും തടയാന്‍ റവന്യൂ വകുപ്പിനു കഴിയുമോ? അതും ഒരു കേന്ദ്രസ്ഥാപനത്തിന്റെ? എനിക്ക് സംശയമാണ്.

ഇനി HMT ഭൂമി വില്‍പ്പന നടത്തിയപ്പോള്‍ എല്ലാ ചട്ടങ്ങളും പാലിച്ചോ എന്നു നോക്കേണ്ടത് അതിന്റെ കേന്ദ്ര മന്ത്രാലയമാണ്.അതിനും മുകളില്‍ സി.ഏ.ജിക്ക് അത് പരിശോധിക്കാം.അതില്‍ ക്രമക്കേട് ഉണ്ടെന്ന് പ്രഥമദൃഷ്ട്യാ ബോധ്യമാകുന്നു.ഒന്നു റ്റെന്‍ഡര്‍ വിളിച്ചത് ബോംബെ പത്രങ്ങളില്‍ മാത്രമാണെന്ന് പറയപ്പെടുന്നു. 2. വില കുറവാണ്.

(പക്ഷെ ഇതൊക്കെ മോഡേണ്‍ ഫുഡ്സിലും ബാല്‍ക്കോയിലുമൊക്കെ സംഭവിച്ചതാണ്.ചരിത്രം ഒന്നു മറിച്ച് നോക്കിയാല്‍ മനസ്സിലാകും.ബുക്ക് വിലയെ അടിസ്ഥാനപ്പെടുത്തി ആസ്തികള്‍ വിറ്റുതുലയ്ക്കുന്ന രീതി കഴിഞ്ഞ ബി.ജെ.പി സര്‍ക്കാരും ഇപ്പോഴത്തെ കേന്ദ്ര സര്‍കാരും ഒരു നയമായി തന്നെ മുന്നോട്ട് കൊണ്ടുപോകുന്നു.)

Radheyan said...

എന്തു കൊണ്ട് ചര്‍ച്ചയുടെ ഫോക്കസ് കരീമും രാജേന്ദ്രനും ആകുന്നു? സന്തോഷ് മോഹന്‍ ദേബ് എന്ന കേന്ദ്രമന്ത്രിയോ എച്.എം.റ്റി ഊന്നതരോ ഫോക്കസില്‍ വരുന്നില്ല?
400 ഏക്കറില്‍ തീര്‍പ്പ് ആക്കുന്നതിനായി 300 ഏക്കര്‍ സംസ്ഥാനം തിരിച്ച് പിടിക്കുകയും 100 ഏക്കര്‍ വിട്ടു കൊടുക്കുകയും ചെയ്ത കോടതിക്ക് പുറത്തുള്ള ഒരു ജന്റില്‍മാന്‍ എഗ്രിമന്റില്‍ നിന്നും അതും ഒരു സംസ്ഥാന സര്‍ക്കാരും കേന്ദ്രസ്ഥാപനവും തമ്മിലുള്ള എഗ്രിമെന്റില്‍ നിന്നും സര്‍ക്കാറ് ഏകപക്ഷീയമായി പിന്മാറിയാല്‍ മാത്രമേ എച്.എം.റ്റിക്ക് ഈ ഭൂമിയില്‍ അവകാശമില്ല എന്നു പറയാന്‍ കഴിയൂ.

എച്.എം.റ്റിയില്‍ ക്രമക്കേട് ഉണ്ടെങ്കില്‍ കേന്ദ്രത്തിന് അന്വേഷിക്കാം.ഉമ്മന്‍ ചാണ്ടി മാഡത്തെ ഒന്നു വിളിച്ച് പറഞ്ഞാല്‍ പോലെ.അതോടെ ഈ വിവാദ വ്യവസായത്തിന്റെ കാറ്റു പോകും.മറ്റുള്ളവരുടെ ചിലവില്‍ മുഖം മിനുക്കുന്ന ചിലര്‍ക്ക് അതിനുള്ള അവസരവും നഷ്ടപ്പെടും.ചാനലുകാര്‍ക്ക് ആഘോഷിക്കാന്‍ മറ്റെന്തെങ്കിലും അവര്‍ കണ്ടെത്തും.ഇതു പോലെ തുമ്പും തലയുമില്ലാത്ത മറ്റെന്തെങ്കിലും

ഷാനവാസ്‌ ഇലിപ്പക്കുളം said...

കിരണേ, എച്ച്‌.എം.ടിയുടെ ഭൂമി പോക്കുവരവു ചെയ്ത നടപടി റദ്ദാക്കന്‍ ഗവണ്മെന്റിനോട്‌ ആവശ്യപ്പെടുമെന്ന്, പോക്കുവരവു നടത്തിക്കൊടുത്ത റവന്യൂ മന്ത്രി രാജേന്ദ്രന്റെ പാര്‍ട്ടിയായ സി.പി.അയ്‌ ഇന്ന് പറഞ്ഞതായി അറിയാന്‍‍ കഴിഞ്ഞു! എന്താണീ തമാശയുടെ അര്‍ത്ഥം? നേരിട്ട്‌ രാജേന്ദ്രനോടങ്ങ്‌ പറഞ്ഞാല്‍ പോരേ?

ഷാനവാസ്‌ ഇലിപ്പക്കുളം said...

പിന്നെ ജോജു പറഞ്ഞതുപോലെ സര്‍ക്കാര്‍ പൊന്നും വിലയ്ക്ക്‌ ഏറ്റെടുത്ത സ്ഥലം എച്ച്‌.എം.ടി വിറ്റു കാശാക്കുന്നതുപോലെ ഇപ്പോള്‍ ഇതാ കണ്ണൂര്‍ വിമാനത്താവളത്തിനും 2500 ഏക്കര്‍ അനാവശ്യമായി(1400 ഏക്കറിനടുത്താണ്‌ നെടുമ്പാശേരി)ഏറ്റെടുത്ത്‌ 76%തന്ത്രപരമായ ഷെയറുകളുള്ള സ്വാകര്യ വക്തികള്‍ക്ക്‌ കൈമാറാന്‍ പോകുന്നു. നാളെ ഈ ഏക്കറുകളുടെ സ്തിതിയും മറിച്ചാകില്ല. അവരും ഇതുപോലെ വല്ല കണ്‍സ്ട്രക്ഷന്‍ മാഫിയായ്ക്ക്‌ വിമാനത്താവള പരിസരത്ത്‌ സ്റ്റാര്‍ഹോട്ടലുണ്ടാക്കന്‍ വിട്ടുകൊടുക്കില്ലെന്നാരറിഞ്ഞു?

എച്ച്‌.എം.ടിയ്ക്ക്‌ സമ്പൂര്‍ണാധികാരമുള്ള ഭൂമിയാണെങ്കില്‍ അവര്‍ അത്‌ വില്‍ക്കുകയോ വിലവാങ്ങികുകയോ പുഴുങ്ങിത്തിന്നുകയോ ചെയ്യട്ടെ! ചോദിക്കാന്‍ ആര്‍ക്കും ഒരധികാരവുമില്ല. മാത്രമല്ല തിന്റെ പേരില്‍ പോക്കുവരവു തടയാനും ആര്‍ക്കും കഴിയില്ല. ഇത്‌ കിരന്‍ ചൂണ്ടിക്കാണിച്ചതു പോലെ പി.കെ പ്രകാശ്‌ പറഞ്ഞതാണ്‌ സത്യമെങ്കില്‍ നായനാര്‍ സര്‍ക്കാരിന്‌ സംഭവിച്ച ഈ പാളിച്ച കണ്ണൂര്‍ വിമാനത്താവളത്തിന്റെ കാര്യത്തിലും സഭവിക്കാതിരിക്കാന്‍ ശ്രദ്ധിച്ചാല്‍ നല്ലത്‌.

സൂരജ് said...

വായിക്കുന്നു... ജോജുവിന്റെ സംശയങ്ങള്‍ തന്നെ എനിക്കും. കണ്‍ഫ്യൂഷന്റെ പുക നീങ്ങാന്‍ കാത്തിരിക്കുന്നു.

:)

കിരണ്‍ തോമസ് തോമ്പില്‍ said...

ഷാനവാസേ

CPI യുടെ നിലപാട്‌ കണ്ട്‌ ഞാന്‍ ഞെട്ടിപ്പോയി. എങ്ങനെ ഇങ്ങനെ ഒളിച്ച്‌ കളിക്കുന്നത്‌ എനിക്ക്‌ മനസ്സിലാകുന്നേ ഇല്ല. ഈ 100 ഏക്കര്‍ ഭൂമി HMT ക്ക്‌ പൂര്‍ണ്ണ അവകാശമുണ്ട്‌ എന്ന് ആദ്യം പറഞ്ഞത്‌ CPI നേതാവ്‌ കാനം രാജേന്ദ്രനാണ്‌ എന്നത്‌ ഓര്‍ക്കുക. ചാനല്‍ ചര്‍ച്ചകളില്‍ ഈ വാദം ഏറ്റവും കൂടുതല്‍ തവണ പറഞ്ഞത്‌ കാനമാണ്‌. എന്നാല്‍ അതെ കാനത്തിന്റെ പാര്‍ട്ടി പോക്കുവരവ്‌ റദ്ദാക്കണം എന്നൊക്കെപ്പറയുമ്പോള്‍ എങ്ങനെ ഞെട്ടാതിരിക്കും. ഈ പോക്കുവരവ്‌ ചെയ്ത്‌ കൊടുക്കാന്‍ തീരുമാനിക്കുന്ന യോഗത്തില്‍ റവന്യൂ മന്ത്രി പങ്കെടുത്തിരുന്നു എന്ന് ഓര്‍ക്കുക. ജില്ലാ കലകടര്‍ പറഞ്ഞ വാദങ്ങള്‍ ശ്രദ്ധിച്ചിരിക്കുമല്ലോ. അപ്പോള്‍ ഈ വിവാദം ഉണ്ടാകുന്നത്‌ വരെ റവന്യൂ വകുപ്പിന്‌ ഇല്ലാത്ത ആശങ്കയാണ്‌ ഇന്ന് CPI ക്ക്‌ ഉണ്ടായിരിക്കുന്നത്‌. സൈബര്‍ സിറ്റിയുടെ ഉല്‍ഘാടനത്തില്‍ നിന്ന് വിട്ടുനിന്നും എന്ന കച്ചിത്തുരിമ്പില്‍ പിടിച്ച്‌ CPI ഈ വിഷയത്തില്‍ നിന്ന് രക്ഷപ്പെടാന്‍ ശ്രമിക്കുന്നതിന്റെ ഭാഗമാണ്‌ ഇതെന്ന് പ്രഥമ ദൃഷ്ടിയാല്‍ ബോധ്യമാകും. ക്യാബിനറ്റ്‌ എടുത്ത അന്വേഷണത്ത തീരുമാനത്തിലും വലുത്‌ ഞങ്ങള്‍ ചെയ്തു എന്ന് വരുത്തി മുഖം രക്ഷിക്കുക എന്ന അടവാണ്‌ ഇപ്പോള്‍ CPI പുറത്തെടുത്തത്‌.

ഇനി ഈ വിഷയത്തിലെ എന്റ ചില നിരീക്ഷണങ്ങള്‍ക്കൂടി പറയാം

ഈ ഭൂമി കൈമാറുന്നത്‌ UDF ന്റ കാലത്താണ്‌ കേന്ദ്ര ഗവണ്മെന്റിന്റെ കാലത്താണ്‌ എന്നൊക്കെയാണ്‌ ഇന്ന് ഇടത്‌ നേതാക്കള്‍ പറയുന്നത്‌. എന്നാല്‍ ഈ ഭൂമി വില്‍ക്കാന്‍ ശ്രമിക്കുന്നത്‌ HMT യിലെ ഇടത്‌ തൊഴിലാളി നേതാക്കള്‍ അറിഞ്ഞിട്ടുണ്ടാകണമല്ലോ. എന്തേ അവരൊന്നും ഇക്കാര്യം പാര്‍ട്ടിയേ അറിയിച്ചില്ല. എന്തേ അന്ന് പ്രതിപക്ഷത്തിരുന്ന LDF ഇതിനെ എതിര്‍ത്തില്ല. മലയാള പത്രത്തില്‍ പരസ്യം വന്നില്ല എന്ന ന്യായമൊന്നും ആരും പറയില്ല. കാരണം HMT യിലെ തൊഴിലാളി നേതാക്കള്‍ അറിയാതെ ഈ ഭൂമി കച്ചവടം നടക്കില്ല. പൊതുമേഖല സ്ഥാപനങ്ങളുടെ ഭൂമി വില്‍പ്പനയേ എതിര്‍ക്കുന്നു എന്നൊക്കെപ്പറയുന്ന ഇടത്‌ തൊഴിലാളി സംഘടനകളുടെ അറിവോടും സമ്മതത്തോടും കൂടിയും അതുപോലെ ഇടത്‌ നേതാക്കള്‍ അറിഞ്ഞുമാണ്‌ ഈ ഭൂമി വില്‍പ്പന HMT നടത്തിയത്‌.

ഈ ഭൂമി പോക്കുവരവ്‌ തടയണം എന്ന് തൊഴിലാളി സംഘടന നേതാക്കള്‍ പറഞ്ഞതിന്‌ കാരണം അവര്‍ക്ക്‌ ഗുണം കിട്ടിയില്ല എന്നതാണ്‌ അല്ലാതെ സര്‍ക്കാര്‍ ഭൂമി വിറ്റതല്ല. നോക്കൂ 2005 ഇല്‍ ബ്ലൂസ്റ്റാര്‍ പറഞ്ഞ സെന്റിന്‌ 1.30 ലക്ഷം എന്ന നിരക്കില്‍ത്തന്നെ 30 ഏക്കര്‍ ഭൂമി തൊഴിലാളികള്‍ക്ക്‌ നല്‍കണം എന്നതായൈരുന്നു വ്യവസായ മന്ത്രിയുടെ യോഗത്തില്‍ ഉയര്‍ന്ന ആവശ്യം. 30 ഈക്കര്‍ സംസ്ഥാന സര്‍ക്കാറിന്റേതെന്ന് ഇപ്പോള്‍ CPI പറയുന്ന ഭൂമി 2005 ഇലെ വിലക്ക്‌ തൊഴിലാളികള്‍ക്ക്‌ നല്‍കാന്‍ ചര്‍ച്ചക്ക്‌ പോയി സമ്മതിച്ച റവന്യൂ മന്ത്രിയും AITUC നേതാക്കളും ഇന്ന് സര്‍ക്കാര്‍ ഭൂമിയേക്കുറിച്ച്‌ കരയുന്നത്‌ കാണുമ്പോള്‍ കണ്ണു നിറയുന്നു. ഈ കച്ചവടത്തിന്‌ കൂട്ടു നിന്നത്‌ CITU INTUC BMS നേതാകളും അവിടെ ഉണ്ടായിരുന്നു എന്നതും ഓര്‍ക്കുക. പിന്നെ സമരാഭാസമൊക്കെ ആരേക്കാണിക്കാന്‍ എന്ന് ചോദിക്കാന്‍ ഒരു മാധ്യമങ്ങള്‍ക്കും ധൈര്യമില്ല. ബ്ലൂസ്റ്റാറിന്‌ 70 ഏക്കര്‍ പോയി ബാക്കി 30 ഏക്കറെങ്കിലും വില്‍ക്കരുത്‌ എന്ന് പറയാന്‍ ഒരു തൊഴിലാളി നേതാവും ഇല്ലാതെ പോയീ എന്നോര്‍ക്കുമ്പോള്‍ ഇടത്‌ നേതാക്കളെ ഓര്‍ത്ത്‌ പുഛം തോന്നുന്നു.

കിരണ്‍ തോമസ് തോമ്പില്‍ said...

അന്വേഷണ സമിതിയേ ഒക്കെ നിയമിച്ചിട്ടുണ്ടെങ്കിലും സി.പി.എം ന്റെ നയം എന്താണ് എന്ന് ഇന്നത്തെ ദേശാഭിമാനി വാര്‍ത്തയില്‍ നിന്ന് വ്യക്തം.

അര്തിങനെ

എച്ച്എംടി ഭൂമി സര്‍ക്കാര്‍ പരിഗണിച്ചത് തൊഴിലാളി
താല്‍പ്പര്യവും തൊഴിലും

തിരു: കളമശേരി എച്ച്എംടിയിലെ തൊഴിലാളിസംഘടനകള്‍ ഒന്നടങ്കം ഉന്നയിച്ച ആവശ്യങ്ങളാണ് ഭൂമിവില്‍പ്പന സംബന്ധിച്ച പ്രശ്നത്തില്‍ സര്‍ക്കാര്‍ പരിഗണിച്ചത്. ബ്ളൂസ്റാര്‍ റിയല്‍റ്റേഴ്സ് വാഗ്ദാനംചെയ്ത തൊഴില്‍സാധ്യതകള്‍ക്കും ഗവണ്‍മെന്റ് മുന്‍ഗണന നല്‍കി.
നൂറ് ഏക്കര്‍ വില്‍ക്കാനാണ് എച്ച്എംടി മാനേജ്മെന്റ് തീരുമാനിച്ചത്. 2005 ഒക്ടോബറില്‍ ഇതിനായി പത്രപരസ്യവും നല്‍കി. 70 ഏക്കര്‍ ബ്ളൂസ്റാര്‍ റിയല്‍റ്റേഴ്സിന് 91 കോടി രൂപയ്ക്ക് വിറ്റു. ഈ ഘട്ടത്തിലാണ് യൂണിയനുകള്‍ ദീര്‍ഘകാലകരാര്‍ പുതുക്കുന്നതുള്‍പ്പെടെയുള്ള ആവശ്യങ്ങള്‍ അംഗീകരിക്കുന്നതുവരെ കൈമാറ്റം തടയണമെന്ന് സര്‍ക്കാരിന് നിവേദനം നല്‍കുന്നത്. വില്‍ക്കാന്‍ തീരുമാനിച്ച ഭൂമിയില്‍ ബാക്കിയുള്ള 30 ഏക്കര്‍ തൊഴിലാളികള്‍ക്ക് വീട് വയ്ക്കുന്നതിനായി എച്ച്എംടിയിലെ ഹൌസിങ് സൊസൈറ്റിക്ക് നല്‍കണമെന്നും യൂണിയനുകള്‍ ആവശ്യപ്പെട്ടു. ബ്ളൂസ്റാറിനു നല്‍കിയ അതേവില ഭൂമിക്ക് കൊടുക്കാമെന്നും യൂണിയനുകള്‍ അറിയിച്ചിരുന്നു. ഐഎന്‍ടിയുസിയടക്കം എച്ച്എംടിയിലെ എല്ലാ യൂണിയനും ചേര്‍ന്നാണ് സര്‍ക്കാരിനെ സമീപിച്ചത്.

ഇതേത്തുടര്‍ന്ന് 2006 ഡിസംബര്‍ ആറിനും 2007 ജൂണ്‍ ആറിനും സര്‍ക്കാര്‍ യൂണിയന്‍ നേതാക്കളുമായി ചര്‍ച്ച നടത്തി. എച്ച്എംടി മാനേജ്മെന്റും ബ്ളൂസ്റാര്‍ റിയല്‍റ്റേഴ്സ് പ്രതിനിധികളും ചര്‍ച്ചയില്‍ പങ്കെടുത്തു. 2007 ജൂണ്‍ ആറിന് നടന്ന ചര്‍ച്ചയിലാണ് യൂണിയനുകളുടെ ആവശ്യങ്ങള്‍ അംഗീകരിക്കാമെന്ന് മാനേജ്മെന്റ് ഉറപ്പുനല്‍കിയത്. 1996 മുതല്‍ ലഭ്യമാകേണ്ടിയിരുന്ന ശമ്പളപരിഷ്കരണം ഉടന്‍ നടപ്പാക്കാമെന്ന് മാനേജ്മെന്റ് സമ്മതിച്ചു. തൊഴിലാളികളുടെ ആവശ്യങ്ങള്‍ അംഗീകരിപ്പിക്കാനുള്ള സമ്മര്‍ദതന്ത്രം എന്ന നിലയിലായിരുന്നു ഭൂമി തിരിച്ചുപിടിക്കാന്‍ കലക്ടര്‍ക്കു നിര്‍ദേശം നല്‍കിയത്. പോക്കുവരവ് തടസ്സപ്പെട്ടത് അതിനാലാണ്. നേരത്തെ തങ്ങള്‍ വാങ്ങിയ 70 ഏക്കറില്‍ 70 ശതമാനം ഐടി വ്യവസായത്തിന് നീക്കിവയ്ക്കുമെന്ന് ബ്ളൂസ്റാര്‍ റിയല്‍റ്റേഴ്സ് പ്രതിനിധികള്‍ സമ്മതിച്ചു. അര ലക്ഷം പേര്‍ക്ക് തൊഴില്‍ നല്‍കുന്ന പദ്ധതിയാണ് ബ്ളൂസ്റാര്‍ മുന്നോട്ടുവച്ചത്. ഇതെല്ലാം പരിഗണിച്ച് പോക്കുവരവ് ചെയ്തുകൊടുക്കാനുള്ള തടസ്സം ഒഴിവാക്കാന്‍ വ്യവസായമന്ത്രിയും റെവന്യൂമന്ത്രിയും വിളിച്ച യോഗത്തില്‍ തീരുമാനിച്ചിരുന്നു. എന്നാല്‍, അതനുസരിച്ചുള്ള ഒരു നടപടിയും സര്‍ക്കാര്‍തലത്തില്‍ പിന്നീട് ഉണ്ടായിട്ടില്ല. ഇതാണ് എച്ച്എംടി ഭൂമി വില്‍പ്പനയുടെ അവസാന നില. വ്യവസായമന്ത്രി, റെവന്യൂമന്ത്രി എന്നിവരുടെ സാന്നിധ്യത്തില്‍ നടന്ന യോഗത്തില്‍ എച്ച്എംടിയിലെ ഉന്നത ഉദ്യോഗസ്ഥര്‍ക്കു പുറമെ കെ എന്‍ രവീന്ദ്രനാഥ്, ഡി സതീഷ്കുമാര്‍ (എച്ച്എംടി എംപ്ളോയീസ് യൂണിയന്‍- സിഐടിയു), എം കെ സാംബാജി (എച്ച്എംടി വര്‍ക്കേഴ്സ് കോണ്‍ഗ്രസ്- ഐഎന്‍ടിയുസി), കെ സി പ്രഭാകരന്‍ (എച്ച്എംടി എംപ്ളോയീസ് ഫെഡറേഷന്‍), ഡി രവീന്ദ്രന്‍ ഉണ്ണിത്താന്‍ (എച്ച്എംടി വര്‍ക്കേഴ്സ് യൂണിയന്‍), കെ വി ഷാജി (എച്ച്എംടി എംപ്ളോയീസ് ഫെഡറേഷന്‍), എം മയില്‍വേല്‍ (എച്ച്എംടി ഓഫീസേഴ്സ് അസോസിയേഷന്‍) എന്നിവരും റെവന്യൂ ഉദ്യോഗസ്ഥരും സംബന്ധിച്ചിരുന്നു. സംസ്ഥാന ഗവണ്‍മെന്റ് സ്വതന്ത്രാവകാശത്തോടെ പതിച്ചുതന്ന ഭൂമി വില്‍ക്കാന്‍ കേന്ദ്രസര്‍ക്കാര്‍ അനുമതി നല്‍കിയിട്ടുണ്ടെന്നാണ് എച്ച്എംടിയുടെ നിലപാട്. 2005ല്‍ എച്ച്എംടി ഇതിനുള്ള നടപടികള്‍ പൂര്‍ത്തിയാക്കി. വില്‍പ്പനയും രജിസ്ട്രേഷനും നടന്നു. തങ്ങളുടെ ആവശ്യങ്ങള്‍ അംഗീകരിപ്പിക്കുന്നതുവരെ വില്‍പ്പനനടപടി തടയണമെന്ന യൂണിയനുകളുടെ നിലപാടു മാത്രമേ സര്‍ക്കാരിനു മുമ്പിലുണ്ടായിരുന്നുള്ളൂ. ഭൂമികൈമാറ്റനടപടികള്‍ പൂര്‍ത്തിയായാല്‍ പോക്കുവരവ് നടത്തി തണ്ടപ്പേര് രജിസ്ററില്‍ ചേര്‍ക്കുക എന്ന നടപടി മാത്രമാണ് ബാക്കിയുണ്ടായിരുന്നത്. വില്‍പ്പനയുടെ ഘട്ടത്തിലൊന്നുമില്ലാത്ത വിവാദമാണ് സൈബര്‍ സിറ്റി സ്ഥാപിക്കുന്നു എന്ന പ്രഖ്യാപനത്തിനുശേഷം ദുരൂഹസാഹചര്യത്തില്‍ ചില മാധ്യമങ്ങള്‍ ഉയര്‍ത്തിയത്. ഭൂമിവില്‍പ്പനയില്‍ ക്രമക്കേടുണ്ടെങ്കില്‍ കര്‍ശനനടപടി എടുക്കണമെന്ന നിലപാടില്‍ത്തന്നെയാണ് സര്‍ക്കാര്‍. അതിന്റെ ഭാഗമായി ചീഫ് സെക്രട്ടറിയുടെ അധ്യക്ഷതയില്‍ ഉദ്യോഗസ്ഥസമിതിയെ നിയോഗിച്ചു കഴിഞ്ഞു.

കേരളീയന്‍ said...

ദാ..ഈ മനോരമ വാര്‍ത്ത കൂടി കാണുമ്പോള്‍ കാര്യങ്ങള്‍ ഒന്നു കൂടി വിശദമാവും:

http://www.manoramaonline.com/cgi-bin/MMOnline.dll/portal/ep/malayalamContentView.do?articleType=Malayalam%20Home&contentId=3520452&contentType=EDITORIAL&BV_ID=@@@

എന്തിനും ഏതിനും മാധ്യമങ്ങളെ ഉപയോഗിച്ച് കയ്യടി വാങ്ങുക എന്ന മുഖ്യന്റെ വ്യക്തിഗത അജന്‍ഡ മാത്രമാണോ വിവാദങ്ങള്‍ക്ക് പിന്നില്‍? ഏതെങ്കിലും വിഷയത്തില്‍ ഭരണ നൈപുണ്യം ഈ ദേഹം ഇനിയും പ്രകടിപ്പിക്കേണ്ടതായിട്ടാണിരിക്കുന്നത്. വി.എസിന്റെ കാര്യ വിവരവും, യോഗ്യതകളും വച്ച് വലിയ പ്രതീക്ഷകള്‍ക്ക് വകയില്ല താനും. ഈ ദേഹത്തെ ജനങ്ങളുടെ മേല്‍ അടിച്ചേല്‍പ്പിച്ച മാധ്യമ അജന്‍ഡയെപ്പറ്റിയല്ലേ സി.ബി.ഐ അന്വേഷണം ആവശ്യപ്പെടേണ്ടത്.

Anonymous said...

the radheyan is a ugly slave pf cpi.
give hime ....s of veliyam and all cpi leaders', he will suck it.!!

കിരണ്‍ തോമസ് തോമ്പില്‍ said...

കേരളിയ ഇതും കൂടെ വായിക്കുമ്പോള്‍ മുഖ്യന്‍ അറിഞു എന്ന വാദം കൂടുതല്‍ വെളിപ്പെടും

ഈ വിഷയത്തില്‍ മരീചന്റെ ലേഖനവും വായിക്കുക

കിരണ്‍ തോമസ് തോമ്പില്‍ said...

ഈ വിഷയത്തില്‍ വ്യവസായ മന്ത്രി മാത്രം കുറ്റക്കാരന്‍ എന്ന് വിശ്വസിക്കാനാണ് ഭൂരിപക്ഷത്തിനും ഇഷ്ടം വേണമെങ്കില്‍ റവന്യൂ മന്ത്രിയും കുറ്റക്കരനായിക്കോട്ടെ എന്ന്‍ കരുതുന്നവരും ഉണ്ട്.

ദിനം പ്രതി ചാനലുകള്‍ ഓരോ രേഖയുമായി വരുന്നുണ്ട് എന്നതാണ് രസകരം അവയെല്ലാം 2007 ജൂണ്‍ മാസത്തിന് മുന്‍പ്. റവന്യൂ നിയമ വ്യവസായ വകുപ്പുകള്‍ എല്ലാം ഈ ഭൂമി വില്‍പ്പനയെ എതിര്‍ത്തൂ എന്നാണ് അല്പം മുന്‍പ് വരേയുള്ള വാര്‍ത്തകള്‍ കണ്ടപ്പോള്‍ മനസ്സിലായത്. എന്നാല്‍ എന്തുകൊണ്ട് ആദ്യമായി ഈ ഭൂമി വില്‍ക്കാന്‍ അവകാശമില്ല എന്ന് പറഞ്ഞ ഏര്‍ണ്ണാകുളം ജില്ലാ കലക്ടര്‍ മന്ത്രിമാരുടെ യോഗം കഴിഞപ്പോള്‍ നിലപാട് മാറ്റി പോക്കുവരവ് ചെയ്യാന്‍ തയ്യാറായി എന്ന് വെളിപ്പെടുത്തിയാല്‍ ഈ വിവാദത്തിലെ 90% പ്രശ്നങളും തീരും. മാത്രമല്ല് മന്ത്രിമാരുടെ യോഗം കഴിഞ്ഞ് വ്യവസായ വകുപ്പ് പ്രിന്‍സിപ്പിള്‍ സെക്രട്ടറി ജില്ലാ കലക്ടര്‍ക്ക് ഇത് പോക്ക്വരവ് ചെയ്ത് കൊടുക്കാന്‍ കുറിപ്പ് നല്‍കുകയും ചെയ്തു. അപ്പോള്‍ ഒരിക്കല്‍ ഭൂമി വില്‍പ്പനയെ എതിര്‍ത്ത 2 ആള്‍ക്കാര്‍ ഇതിന് അനുമതി നല്‍കാം എന്ന് പറഞ്ഞത് എന്തുകൊണ്ടാണ് എന്നതും രസകരമായിത്തുടരുന്നു.


ഇനി ഈ പദ്ധതിയേപ്പറ്റി ഐ.ടി വകുപ്പ് അറിഞിട്ടുണ്ട് എന്നും ബ്ലൂസ്റ്റാറിന്റെ പ്രസന്റേഷന്‍ കാണാന്‍ ഐ.ടി സെക്രട്ടറി ജോതിലാല്‍ തനിക്കൊപ്പം ഉണ്ടായിരുന്നു എന്നും ഇന്ന് എളമരം കരീം പറഞിട്ടുണ്ട്. പിന്നെ മുഖ്യമന്ത്രിക്ക് ഈ കാര്യങ്ങളൊക്കെ അറിയാമായിരുന്നു എന്ന വാര്‍ത്ത പുറത്ത് കൊണ്ടുവരാന്‍ മനോരമ മാത്രമേ താല്‍പ്പര്യം എടുക്കുന്നുള്ളൂ എന്നതും ഈ അവസര്‍ത്തില്‍ ശ്രദ്ദേയമാണ്. മനോരമ മുഖ്യമന്ത്രിയേയും മറ്റ് രണ്ട് മന്ത്രിമാരേയും ടാര്‍ഗ്ഗറ്റ് ചെയ്ത് ഈ വിവാദം കൊഴിപ്പിക്കുമ്പോള്‍ മറ്റ് ചാനലുകളും പത്രങ്ങളും വി.എസിനെ രക്ഷിച്ച് നിര്‍ത്താന്‍ പ്രത്യേകം ശ്രമിക്കുന്നുണ്ട്. എന്നാല്‍ മനോരമ മൂന്നും കല്‍പ്പിച്ചാണ് അവര്‍ ഈ സോ കോള്‍ഡ് മാധ്യമ സിന്റിക്കേറ്റില്‍ പെടില്ല എന്ന് തെളിയിച്ചിരിക്കുന്നു. അവര്‍ എന്നും കമ്യൂണിസ്റ്റ് വിരുദ്ധ സിന്റിക്കെറ്റിലാണ്. അവര്‍ക്ക് അച്ചുതാനന്ദനും കരീമും രാജേന്ദ്രനുമൊക്കെ ഒരുപോലെ എതിര്‍ക്കപ്പെടെണ്ടവര്‍

Sebin Abraham Jacob said...

കിരണ്‍,

എറണാകുളത്തെ ഭൂമിയിടപാടു് സംബന്ധിച്ച കിരണിന്റെ രണ്ടു പോസ്റ്റുകളും അവയുടെ മേല്‍ നടന്ന ചര്‍ച്ചകളും വായിച്ചു. ഇതില്‍ അവിടിവിടെയൊക്കെ കോഴ മണക്കുന്നുണ്ടു് എന്നതു് സത്യമാണു്. മുഖ്യമന്ത്രി വെറുതെ മിടുക്കന്‍ കളിക്കുകയാണു് എന്നതിലും എതിരഭിപ്രായമില്ല. പണ്ടു് ആന്റണിക്കുണ്ടായിരുന്ന പ്രതിച്ഛായാ രോഗം അല്‍പ്പം മൂര്‍ച്ചിച്ച നിലയില്‍ അച്യുതാനന്ദനെ ആവേശിച്ചിരിക്കയാണു്. എന്നാല്‍ ഈ ഇടപാടിനെ മറ്റൊരു കോണില്‍ നിന്നു കൂടി കാണേണ്ടതല്ലേ എന്നാണു് എന്റെ ചോദ്യം.

അനുദിനം ആള്‍പ്പെരുപ്പമുണ്ടാകുന്ന നഗരങ്ങളിലൊന്നാണു് കൊച്ചി. പുകതുപ്പുന്ന പഴയ വ്യവസായങ്ങളുടെ സ്ഥാനത്തു് ഐ.സി.ടി.യുമായി ബന്ധപ്പെട്ട സ്ഥാപനങ്ങള്‍ വര്‍ദ്ധിക്കുന്നു. ഇവയില്‍ പണിയെടുക്കാന്‍ പലദേശക്കാരും ഭാഷക്കാരുമെത്തുന്നു. അതിനനുസരിച്ചു് ഇവിടെ പണവിനിമയം നടക്കുന്നു. പൊതുവിപണിയില്‍ അതിന്റെ പ്രതിഫലനങ്ങളുണ്ടാകുന്നു. ചുരുക്കത്തില്‍ ധാരാളം പുതിയ പണിയിടങ്ങള്‍ - ഹോട്ടലുകള്‍, റെസ്റ്റൊറന്റുകള്‍, പലയിനം കടകള്‍ - ഉണ്ടാകുന്നു. ഇവിടെയെല്ലാം ഉണ്ടാകുന്ന വര്‍ദ്ധിച്ച തോതിലുള്ള തൊഴിലവസരങ്ങളോടു് പ്രതികരിക്കാന്‍ നഗരത്തിലേക്കുള്ള തൊഴിലന്വേഷകരുടെ ഒഴുക്കു് വീണ്ടും വീണ്ടും കൂടുന്നു.

ഇവരില്‍ തീവണ്ടിയിലെങ്കിലും പോയിവരാവുന്ന അകലങ്ങളില്‍ താമസിക്കുന്നവരൊഴിച്ചാല്‍ മറ്റുള്ളവര്‍ക്കു് നഗരത്തിലോ പ്രാന്തപ്രദേശങ്ങളിലോ താമസസൌകര്യം കണ്ടെത്തിയേ മതിയാവൂ. എന്നാലോ‍ ഉള്ളഭൂമി വര്‍ദ്ധിക്കുന്നില്ല. അതൊരു സ്കേര്‍സ് റിസോഴ്സ് ആയതുകൊണ്ടു തന്നെ ഭൂമിക്കു് വില വര്‍ദ്ധിക്കുന്നു.

അങ്ങനെയിരിക്കെ അഫോര്‍ഡബിള്‍ ഹൌസിംഗു് ഉണ്ടാവുക എന്നതു് അവശ്യം ആവശ്യമാണു്. ഇവിടെ അതിനു് അവസരമൊരുക്കേണ്ട ബാധ്യത ഭരണകൂടത്തിനുണ്ടു് എന്നതാണു് എന്റെ അഭിപ്രായം. എന്നാല്‍ ഭരണകൂടം അങ്ങനെ ചെയ്യുന്നില്ല.

അപ്പോഴതാ, അവിടെ ഒരു നൂറേക്കര്‍ സ്ഥലം ഒരു പൊതുമേഖലാ സ്ഥാപനത്തിന്റെ കയ്യിലിരിക്കുന്നു. അതവിടെ വെറുതെ കിടന്നു് കാടുപിടിച്ചു് നശിക്കുകയാണു്. ആ സ്ഥാപനത്തിനാകട്ടെ, ആ സ്ഥലം കൊണ്ടു് പ്രത്യേകിച്ചൊരു ഉപയോഗവുമില്ല. അവരതു് വില്‍ക്കാന്‍ തീരുമാനിക്കുന്നു.

ഏതു വില്‍പ്പനയ്ക്കുമുള്ളതുപോലെ അവിടെയും ഇടനിലയും കമ്മിഷനുമൊക്കെ ഒഴുകിക്കാണും. അതൊന്നും പാടില്ല എന്നു പറയുന്നതില്‍ അര്‍ത്ഥമില്ല. എന്നാല്‍ അതു് ബന്ധപ്പെട്ട സ്ഥാപനത്തിനു് വന്‍ തോതില്‍ നഷ്ടം വരുത്തിവച്ചാകരുതു് എന്നു മാത്രം. അതായതു് ഭൂമിയുടെ നടപ്പുവില അനുസരിച്ചാവണം വില്‍പ്പന നടക്കാന്‍.

എച്ച്.എം.ടി. ഭൂമിയിടപാടില്‍ നടക്കാഞ്ഞതു് അതുമാത്രമാണു്. പ്രദേശത്തെ ഭൂമിവിലയുമായി താരതമ്യം ചെയ്താല്‍ ചെറിയവിലയ്ക്കാണു് എച്ച്.ഡി.ഐ.എല്‍ അവരുടെ സഹോദരസ്ഥാപനമായ ബ്ലൂസ്റ്റാര്‍ റിയല്‍റ്റേഴ്സ് വഴി ഭൂമി വാങ്ങിയതു്. ഇതില്‍ ടെന്‍ഡര്‍ നടപടിക്രമങ്ങള്‍ പാലിച്ചില്ല എന്ന വാദത്തില്‍ കഴമ്പില്ല. ഇന്ത്യയിലെ നിയമമനുസരിച്ചു് രണ്ടു പ്രധാന പത്രങ്ങളില്‍ എച്ച്.എം.ടി പരസ്യം നല്‍കിയിരുന്നു. ടൈംസ് ഓഫ് ഇന്ത്യയെ വെറും മുംബയ് പത്രമെന്നൊക്കെ പറഞ്ഞുതള്ളാനാവുമോ?

കരാറിലെ തുക കുറഞ്ഞുപോയതിനാല്‍ ആദ്യം ടെണ്ടര്‍ നടപടിക്രമങ്ങള്‍ റദ്ദാക്കിയെന്നും പിന്നീടു് അവ ചില സമ്മര്‍ദ്ദങ്ങള്‍ക്കു വിധേയമായി പുനസ്ഥാപിച്ചെന്നും വാര്‍ത്തകളില്‍ പറയുന്നു. ഇവിടെയാവും കരാറിലെ ആദ്യ അഴിമതി നടന്നിട്ടുണ്ടാവുക. ആദ്യം പോക്കുവരവു് നടത്താന്‍ വിസമ്മതിച്ച തൊഴിലാളിയൂണിയനുകളും സംസ്ഥാന സര്‍ക്കാരും പിന്നീടു് അതിനു് അനുകൂലമായെടുത്താകും രണ്ടാമത്തെ അഴിമതി. ഒരു ജനാധിപത്യ രാജ്യത്തു് നടക്കുന്ന സ്വാഭാവികമായ കാര്യമാണു് ഈ അഴിമതി. അതില്‍ ആര്‍ക്കൊക്കെ പങ്കുണ്ടെന്നു് കണ്ടെത്തേണ്ടതും അവരില്‍ നിന്നു് നഷ്ടം ഈടാക്കേണ്ടതും നിയമത്തിന്റെ ബാധ്യതയാണു്. എന്നാല്‍ അതൊന്നും ഇവിടെ നടക്കുന്നില്ല. പക്ഷെ അതിന്റെ പേരില്‍ ഭൂമിയിടപാടു് റദ്ദാക്കുന്നതില്‍​ അര്‍ത്ഥമുണ്ടോ?

ഒരാള്‍ വാഗ്ദാനം ചെയ്ത ഭൂമിക്കു് മറ്റൊരാള്‍ ഒരു വില പറഞ്ഞു, വില ഉറപ്പിച്ചു, കച്ചവടം നടന്നു. ആ ഭൂമിയില്‍ ൭൦ % ഐടി ആവശ്യങ്ങള്‍ക്കു് ഉപയോഗിക്കാമെന്നു് ബ്ലൂസ്റ്റാര്‍ പറയേണ്ടിയിരുന്നില്ല. അവര്‍ വാങ്ങിയ ഭൂമിയില്‍ രാഷ്ട്രദ്രോഹമൊഴികെ എന്തുചെയ്യാനും അവര്‍ക്കു് അവകാശമുണ്ടു്. എന്നാല്‍ എറണാകുളത്തു് ജോലി തേടിയെത്തുന്ന പല വരുമാനക്കാരായ ആളുകള്‍ക്കു് താങ്ങാവുന്ന ഹൌസിംഗു് ആയിരുന്നു അവിടെ ഏര്‍പ്പെടുത്തേണ്ടിയിരുന്നതു്. എച്ച്.ഡി.ഐ.എല്‍ ആകട്ടെ, ആ രംഗത്താണു് പ്രവര്‍ത്തിക്കുന്നതും. അതിനുപകരം ഐ.ടി. വ്യവസായം എന്നു തീരുമാനിച്ചതു് ശരിയായ ടൌണ്‍ പ്ലാനിംഗിന്റെ അഭാവമാണു്.

കൊച്ചിയുടെ അടിസ്ഥാന ആവശ്യമാണു് അഫോര്‍ഡബിള്‍ ഹൌസിംഗു് എന്നു് തിരിച്ചറിയാതെ ഇരിക്കുന്നിടത്താണു് ഈ വിവാദം വഴിതെറ്റുന്നതു്. അവിടെ ഐടി ഉപദേഷ്ടാവിന്റെ കൊതിക്കെറുവും മുഖ്യമന്ത്രിയുടെ മുഖംമിനുക്കും പാര്‍ട്ടിക്കുള്ളിലെ കണക്കുതീര്‍ക്കലുകളും മുഖ്യാസനം അലങ്കരിക്കുന്നു. ഭൂമി മാഫിയ, ഭൂമി മാഫിയ എന്നു വിളിച്ചുകൂവിയതുകൊണ്ടായില്ല. ഭൂമി മാഫിയ ഉണ്ടാകാനിടയുള്ള സാഹചര്യം ഇല്ലാതെയാക്കാന്‍ സര്‍ക്കാരിനാവും. അതു ചെയ്യാതെ ബാലവാടിക്കുട്ടികളുടെ നിലവാരത്തില്‍ വ്യവസായ മന്ത്രിയെ തെറിവിളിച്ചതുകൊണ്ടാകുമോ?

കിരണ്‍ തോമസ് തോമ്പില്‍ said...

സെബിന്‍
ഡോ.ബാബു പോളിന്റെ ഈ ലേഖനം കണ്ടിരുന്നോ?

Sebin Abraham Jacob said...

കിരണ്‍,
ആ ലേഖനം കണ്ടിരുന്നില്ല. നന്ദി.

ബാബു പോള്‍ പറയുന്നതു് ശരിയായ കാര്യമാണു്. പ്രത്യേകിച്ചു് ഈ ഖണ്ഡിക:

"ഐടി വ്യവസായം തുടങ്ങാന്‍ ഐടി വകുപ്പിനെ അറിയിച്ചില്ലെന്ന് പറയുന്നതിലും കാര്യമില്ല. ലൈസന്‍സ് പെര്‍മിറ്റ്രാജ് പോയതറിയാതെ പ്രസ്ഥാനത്തിന്റെ സംസ്ഥാന സമ്മേളനത്തിന് സ്റ്റാലിന്റെ പടം വെക്കുന്നവരുടെ മനസ്സാണത്. ലോകത്തൊരിടത്തും സ്റ്റാലിന്‍ ഇപ്പോള്‍ ഇല്ല, നമ്മുടെ നാട്ടിലൊഴികെ. ഐടി വ്യവസായത്തിന് സര്‍ക്കാര്‍ ലഭ്യമാക്കുന്ന സൌജന്യങ്ങളും സൌകര്യങ്ങളും വേണ്ടതുണ്ടെങ്കില്‍ സര്‍ക്കാറിന്റെ വകുപ്പിനെ അറിയിക്കണം. അല്ലാതെ ഒരു സ്വകാര്യവ്യവസായി എന്തിന് ഐടി വകുപ്പിന്റെ പിറകെ പോകണം?"

അന്യന്‍ said...

"നിയമ വകുപ്പിന്റെ നിര്‍ദ്ദേശം മറികടന്ന്‌ പോക്കുവരവ്‌ നടത്തിക്കൊടുത്തത്‌ റവന്യൂ വകുപ്പാണ്‌. ഇതില്‍ വ്യവസായ വകുപ്പിനും സമ്മതമായിരുന്നു"

"എര്‍ണ്ണാകുളം ജില്ലാ കലക്ടരുടെ കീഴിലുള്ള ഉദ്യോഗസ്ഥരാണ്‌ പോക്കുവരവ്‌ നടത്തിക്കൊടുത്തത്‌. ഉല്‍ഘാടനത്തിന്റെ തലേ ദിവസമാണ്‌ ഈ ഭൂമി വില്‍ക്കാമോ എന്നതില്‍ തര്‍ക്കമുണ്ടായത്‌. അതുകൊണ്ടാണ്‌ VS ഇതില്‍ നിന്ന് വിട്ടു നിന്നത്‌."

ജോജൂ പറഞ്ഞതാണ്‌ ന്യായം
സര്‍ക്കാര്‍ സൌജന്യമായി നല്‍കിയഭൂമി എന്തുന്യായം പറഞ്ഞാണെങ്കിലും വില്‍ക്കുന്നത് ശരിയല്ല, വില്‍ക്കുന്നെങ്കില്‍ ആ പണം സര്‍ക്കാരിനു വേണം ലഭിയ്ക്കാന്‍.